នគរបាលស្រុកបាទីចាប់ខ្លួនក្រុមគាស់បន្ទប់ទីចាត់ការសាលាបឋមសិក្សា សូរភី ៦នាក់ អនុវត្តនីតិវិធីច្បាប់

កម្លាំងជំនាញនគរបាលយុត្តិធម៌ នៃអធិការដ្ឋាននគរបាលស្រុកបាទី ស្នងការដ្ឋាននគរបាលខេត្តតាកែវ កាលពីថ្ងៃទី១៤ ខែកក្កដា ឆ្នាំ២០២៥ បានស្រាវជ្រាវបង្ក្រាប និងចាប់ខ្លួនក្រុមជនសង្ស័យសរុបចំនួន៦នាក់ ពាក់ព័ន្ធករណីគាស់បន្ទប់ទីចាត់ការសាលាបឋមសិក្សា សូរភី ស្ថិតក្នុងភូមិត្រពាំងសាប ឃុំត្រពាំងសាប យកសម្ភារៈមួយចំនួន។ តាមរបាយការណ៍របស់អធិការស្រុក ក្រុមជនសង្ស័យសុទ្ធសឹងជាមុខសញ្ញាប្រើប្រាស់គ្រឿងញៀន និងជាមុខសញ្ញាលួចយ៉ាងសកម្មក្នុងមូលដ្ឋាន ហើយជាមុខសញ្ញាទទួលផលចោរកម្មក្នុងករណីនេះដែរ។

តាមរបាយការណ៍ ជនសង្ស័យដែលកម្លាំងសមត្ថិកិច្ចឃាត់ខ្លួន ១/.ឈ្មោះ ឆុំ សុខហេង ហៅហេង ជាមុខសញ្ញាប្រើប្រាស់ និងចែកចាយគ្រឿងញៀន ហើយក៏ជាមុខសញ្ញាលួចយ៉ាងសកម្មក្នុងមូលដ្ឋាន។ ២/.ឈ្មោះ ម៉ម ធានី ហៅនី ជាមុខសញ្ញាប្រើប្រាស់គ្រឿងញៀន និងជាមុខសញ្ញាលួចយ៉ាងសកម្មក្នុងមូលដ្ឋាន។ ៣/.ឈ្មោះ រឿង សារ៉ន ហៅរ៉ន ជាមុខសញ្ញាករណីទទួលផលចោរកម្ម និងជាមុខសញ្ញាប្រើប្រាស់គ្រឿងញៀន។ ឈ្មោះ នាង រ៉ូត ហៅឌូក ជាមុខសញ្ញាសមគំនិតក្នុងករណីអំពើលួចមានស្ថានទម្ងន់ទោសខាងលើ និងជាមុខសញ្ញាប្រើប្រាស់ និងចែកចាយគ្រឿងញៀន។ ៥/.ឈ្មោះ សុខ ស្រីឡែន ហៅពៅ ជាមុខសញ្ញាសមគំនិតក្នុងករណីអំពើលួចមានស្ថានទម្ងន់ទោសខាងលើ និងជាមុខសញ្ញាប្រើប្រាស់ និងចែកចាយគ្រឿងញៀន។ ៦/.ឈ្មោះ ម៉ុន ស្រីនាថ ហៅពៅ ជាមុខសញ្ញាសមគំនិតក្នុងករណីអំពើលួចមានស្ថានទម្ងន់ទោសខាងលើ និងជាមុខសញ្ញាប្រើប្រាស់ និងចែកចាយគ្រឿងញៀន។

ក្រោយពីឃាត់ខ្លួន និងសួរនាំ ជនសង្ស័យត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ ចំណែកសម្ភារៈដែលបានដកហូត ត្រូវបានកម្លាំងសមត្ថកិច្ចប្រគល់ឱ្យទៅសាលាបឋមសិក្សាសូរភី យកទៅប្រើប្រាស់ក្នុងការងារវិញ។

សូមជ្រាបថា កាលពីថ្ងៃទី១៨ ខែមិថុនា ឆ្នាំ២០២៥ វេលាម៉ោង១១និង០០នាទីយប់ ក្រុមជនសង្ស័យបានយកវត្ថុរឹងគាស់ក្រវិលសោរទ្វាឈើ និងគាស់ចម្រឹងបង្អួចដែកខាងក្រោយបន្ទប់ទីចាត់ការរបស់សាលាបឋមសិក្សា សូរភី ចូលរុះរើកកាយលួចសម្ភារៈរបស់របរមានតម្លៃដែលជាទ្រព្យសម្បត្តិរដ្ឋនៅខាងក្នុងទីចាត់ការរបស់សាលាបឋមសិក្សាសូរភី លួចយកសម្ភារៈមួមចំនួនធំ រួចនាំគ្នាគេចខ្លួនបាត់អស់។

បន្ទាប់មានស្រាវជ្រាវ និងដឹកនាំបញ្ជាពីលោកវរសេនីយ៍ឯក ឆាយ កែវមុន្នី អធិការនៃអធិការដ្ឋាននគរបាលស្រុកបាទី រហូតដល់ថ្ងៃទី១៤កក្កដា ទើបកម្លាំងជំនាញឃាត់ខ្លួនក្រុមទាំងនេះបានតែម្ដង៕