សេដ្ឋកិច្ច

សហគមន៍កសិកម្មមួយទៀតនៅខេត្តសៀមរាប ទទួលបានជំនួយឥតសំណងប្រមាណ ៧០ ម៉ឺនដុល្លារ

បានផុស

១២ ខែ មុន

នៅ

ថ្ងៃពុធ ២៣ កក្កដា ២០២៥

ដោយ

បើតាមលោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា សហគមន៍កសិកម្មមួយទៀតនៅខេត្តសៀមរាបទទួលបានជំនួយឥតសំណងពីគម្រោងពិពិធកម្មកសិកម្មកម្ពុជា(CASDP) ក្នុងទំហំប្រាក់ប្រមាណ ៧០ ម៉ឺនដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅលើបណ្តាញទំនាក់ទំនងសង្គមផ្លូវការ អ្នកនាំពាក្យរូបនេះបានលើកឡើងថា ចំពោះជំនួយឥតសំណាងប្រមាណ ៧០ ម៉ឺនដុល្លារដែលសហគមន៍ទទួលបាននាពេលនេះ ៤០% ដើម្បីចូលរួមវិនិយោគលើផ្ទះសំណាញ់ ៥០ខ្នង និងផ្លូវគ្រួសក្រហមក្នុងសហគមន៍ប្រវែង ៥,៣គីឡូម៉ែត្រ។

លោក ឃឹម ហ្វីណង់ ក៏បានបញ្ជាក់ដែរថា កិច្ចព្រមព្រៀងហិរញ្ញប្បទានឥតសំណងបំពេញបន្ថែមទុនវិនិយោគនេះ ត្រូវបានធ្វើឡើងរវាងសហគមន៍កសិកម្មសម្ព័ន្ធកសិករខ្មែរអង្គរ និងគម្រោងពិពិធកម្មកសិកម្មកម្ពុជា នៅឃុំលាងដៃ ស្រុកអង្គរធំ ខេត្តសៀមរាប ដោយមានការចូលរួមពីលោកស្រី ចំរើន មុទិតា តំណាងធនាគារពិភពលោក ដែលនឹងអនុញ្ញាតឱ្យសហគមន៍អាចមានសមត្ថភាពផ្គត់ផ្គង់បន្លែសុវត្ថិភាពចម្រុះប្រមាណ ១៣៥តោន/ឆ្នាំ។

សូមជម្រាបថា ដើម្បីជួយគាំទ្រទុនបង្វិលដល់សហគមន៍កសិកម្មទំនើប រាជរដ្ឋាភិបាលកម្ពុជា បានសម្រេចជាគោលការណ៍ផ្តល់ឥណទានចំនួន ៣៥ លានដុល្លារថ្មី សម្រាប់ផ្តល់ឥណទានដល់សហគមន៍កសិកម្មទំនើបសម្រាប់រយៈពេល ៣ឆ្នាំ គឺ ២០២៥-២០២៧។

បច្ចុប្បន្ននេះ ក្រសួងកសិកម្ម, ក្រសួងសេដ្ឋកិច្ច និងហិរញ្ញវត្ថុ, ធនាគារ អភិវឌ្ឍន៍ជនបទនិងកសិកម្ម និងសាជីវកម្មធានាឥណទាន បាននឹងកំពុងរៀបចំដំណើការឥណទាន ៣៥ លានដុល្លារថ្មី សម្រាប់ផ្តល់ឥណទានដល់សហគមន៍កសិកម្មទំនើប៕