ព័ត៌មានជាតិ

Air Cambodia នឹងចាប់ផ្តើមហោះហើរពីអាកាសយានដ្ឋានអន្តរជាតិតេជោភ្នំពេញទាំងស្រុងចាប់ពីម៉ោង ៨ព្រឹក ថ្ងៃទី០៩ ខែកញ្ញា ឆ្នាំ២០២៥

បានផុស

១០ ខែ មុន

នៅ

ថ្ងៃអង្គារ ២៩ កក្កដា ២០២៥

ដោយ

ក្រុមហ៊ុនអាកាសចរណ៍ជាតិកម្ពុជា (Air Cambodia) បានឱ្យដឹងថា អាកាសយានដ្ឋានអន្តរជាតិភ្នំពេញ (PNH) នឹងត្រូវបិទទាំងស្រុងចាប់ពីម៉ោង ០០:០១ នាទីព្រឹក ថ្ងៃទី០៩ ខែកញ្ញា ឆ្នាំ២០២៥ ខាងមុខនេះ ខ្លួនឹងចាប់ផ្តើមហោះហើរពីអាកាសយានដ្ឋានអន្តរជាតិតេជោភ្នំពេញ (KTI)ចាប់ពីម៉ោង ០៨:០០ នាទីព្រឹកតទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីជូនដំណឹងរបស់ក្រុមហ៊ុនកាលពីល្ងាចថ្ងៃទី២៨ ខែកក្កដាថា៖« ក្រុមហ៊ុនអាកាសចរណ៍ជាតិកម្ពុជាមានសេចក្តីសោមនស្សរីករាយសូមជម្រាបជូនដំណឹងដល់អ្នកដំណើរទាំងអស់អោយបានជ្រាបថា ក្រោមការដឹកនាំដ៏ឈ្លាសវៃរបស់រាជរដ្ឋាភិបាលកម្ពុជា រាជធានីភ្នំពេញនឹងត្រៀមស្វាគមន៍បើកអោយដំនើរការនូវអាកាសយានដ្ឋានអន្តរជាតិថ្មីដ៏ធំមួយ លំដាប់ថ្នាក់ពិភពលោក គឺ អាកាសយានដ្ឋានអន្តរជាតិតេជោភ្នំពេញ (KTI)»។ Air Cambodia បានគូសបញ្ជាក់ថា អាកាសយានដ្ឋានអន្តរជាតិភ្នំពេញ (PNH) នឹងត្រូវបិទទាំងស្រុងចាប់ពីម៉ោង ០០:០១ នាទីព្រឹក ថ្ងៃទី០៩ ខែកញ្ញា ឆ្នាំ២០២៥ ខាងមុខនេះ។

«រាល់ជើងហោះហើរទាំងអស់ របស់ក្រុមហ៊ុនអាកាសចរណ៍ជាតិកម្ពុជា នឹងត្រូវបានផ្លាស់ប្តូរពី អាកាសយានដ្ឋានអន្តរជាតិភ្នំពេញ (PNH) ទៅកាន់ អាកាសយានដ្ឋានអន្តរជាតិ តេជោ (KTI) នៅថ្ងៃទី០៩ ខែកញ្ញា ឆ្នាំ២០២៥ វេលាម៉ោង ០៨:០០ នាទីព្រឹក» ។ នេះបើតាម Air Cambodia។

ក្រុមហ៊ុនថា ដើម្បីសម្រួលដល់ការផ្លាស់ប្ដូរនេះ ក្រុមហ៊ុនអាកាសចរណ៍ជាតិកម្ពុជា សូមជម្រាបជូនដំណឹងថាប្រព័ន្ធលក់របស់យើងនឹងត្រូវបានធ្វើបច្ចុប្បន្នភាពដើម្បីបញ្ចូលលេខកូដអាកាសយានដ្ឋានថ្មី KTI (សម្រាប់ជើងហោះហើរចូល រឺចេញពីភ្នំពេញ) សម្រាប់រាល់ការកក់ចាប់ពីថ្ងៃទី ១ ខែសីហា ឆ្នាំ២០២៥ នេះតទៅ ជាពិសេសសម្រាប់ជើងហោះហើរដែលមានកាលបរិច្ឆេទធ្វើដំណើរចាប់ពីថ្ងៃទី ៩ ខែកញ្ញា ឆ្នាំ២០២៥ ទៅ ។

លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល ប្រាប់កម្ពុជាថ្មីកាលពីពេលថ្មីៗនេះថា គម្រោងអាកាសយានដ្ឋានអន្តរជាតិតេជោបានបញ្ចប់ការសាងសង់រួចហើយ អ្វីដែលនៅសេសសល់គឺការងារសម្អាត បណ្ដុះបណ្ដាល ការងាររៀបចំឯកសារ ខណៈអាកាសចរស៊ីវិលនឹងចេញវិញ្ញាបនបត្រប្រតិបត្តិការអាកាសយានដ្ឋានអន្តរជាតិតេជោនៅថ្ងៃទី ៣១ ខែកក្កដា ឆ្នាំ ២០២៥។

អាកាសយានដ្ឋានអន្តរជាតិតេជោមាន៣ដំណាក់កាល គឺដំណាក់កាលទី១ តម្លៃជិត ២ ពាន់លានដុល្លារ សាងសង់រួចរាល់នៅឆ្នាំ ២០២៥ អាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ។

យោងតាមរដ្ឋលេខាធិការដ្ឋានអាកាសចរស៊ីវិល នៅក្នុងឆមាសទី១ ឆ្នាំ ២០២៥កម្ពុជាទទួលបានអ្នកដំណើរជាតិ និងអន្តរជាតិតាមផ្លូវអាកាសចំនួនជាង ៣,៦៥ លាននាក់ កើនឡើង ២០% ធៀបនឹងរយៈពេលដូចគ្នា កាលពីឆ្នាំ ២០២៤។

រដ្ឋលេខាធិការដ្ឋានអាកាសចរណ៍ស៊ីវិលបានព្យាករថា ការដឹកជញ្ជូនអ្នកដំណើរតាមផ្លូវអាកាសនឹងកើនដល់ចំនួន ៧,៥លាននាក់ និងទំនិញចំនួន ៨០ពាន់តោន នៅក្នុងឆ្នាំ ២០២៥នេះ៕