ព័ត៌មានអន្ដរជាតិ

Toyota និង Honda រំពឹងពីការធ្លាក់ចុះប្រាក់ចំណូល ដោយពន្ធអាមេរិក

បានផុស

១០ ខែ មុន

នៅ

ថ្ងៃអង្គារ ៥ សីហា ២០២៥

ដោយ

ក្រុមហ៊ុនផលិតរថយន្តជប៉ុន Toyota និង Honda រំពឹងប្រកាសពីការធ្លាក់ចុះនៃប្រាក់ចំណូលនៅសប្ដាហ៍នេះ ដោយសារតែផលប៉ះពាល់ពីពន្ធរបស់សហរដ្ឋអាមេរិក និងភាពរឹងមាំនៃតម្លៃប្រាក់យ៉េនជប៉ុន ទោះបីជាការលក់រថយន្តកូនកាត់ (ស៊ីសាំង និងសាកថ្ម) លើទីផ្សារបរទេសបានច្រើនក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ប្រាក់ចំណេញប្រតិបត្តិការរបស់ Toyota ប្រចាំត្រីមាសទី ១ រំពឹងថានឹងធ្លាក់ចុះ ៣១ ភាគរយ ធៀបនឹងរយៈពេលដូចគ្នាឆ្នាំមុន មកត្រឹម ៩០២ ប៊ីលានយ៉េន (៦,១៤ ប៊ីលានដុល្លារ) ដែលនេះជាចំនួនតិចបំផុតក្នុងរយៈពេល ២ ឆ្នាំ។

ចំណែកឯប្រាក់ចំណេញរបស់ក្រុមហ៊ុន Honda រំពឹងថាធ្លាក់ចុះប្រមាណ ៣៦ ភាគរយ មកនៅត្រឹម ៣១១,៧ ប៊ីលានយ៉េន ដែលជាការធ្លាក់ចុះ ២ ត្រីមាសជាប់ៗគ្នា ខណៈ Honda បានព្យាករពីការធ្លាក់ចុះ ៥៩ ភាគរយ នៃប្រាក់ចំណេញ ពេញមួយឆ្នាំរួចហើយ។

ក្រុមហ៊ុនផលិតរថយន្តយក្សរបស់ជប៉ុនទាំង២ កំពុងព្រួយបារម្ភពីផលប៉ះពាល់នៃពន្ធ ១៥ ភាគរយ ដែលសហរដ្ឋអាមេរិកដាក់លើជប៉ុន ខណៈភាពរឹងមាំនៃតម្លៃប្រាក់យ៉េន ក៏ដាក់សម្ពាធលើប្រាក់ចំណូលរបស់ក្រុមហ៊ុនផងដែរ។

មែនទែនទៅ ក្រុមហ៊ុន Honda ពឹងផ្អែកលើទីផ្សារសហរដ្ឋអាមេរិក ដែលរួមចំណែកប្រមាណ ៤០ ភាគរយ នៃការលក់នៅឆមាសទី១របស់ក្រុមហ៊ុន ខណៈការលក់ទូទាំងពិភពលោកបានធ្លាក់ចុះ ៥ ភាគរយ ទាំងនៅចិន អាស៊ី និងអឺរ៉ុប។ ចំណែកឯការលក់ជាសកលរបស់ក្រុមហ៊ុន Toyota វិញ បានកើនឡើង ៦ ភាគរយ ដោយសារតែតម្រូវការរឹងមាំលើរថយន្តកូនកាត់នៅទីផ្សារអាមេរិក៕