ព័ត៌មានអន្ដរជាតិ

អ្នកជំនាញថៃ៖ ពន្ធ ត្រាំ បង្កើនលំហូរទំនិញពីចិន ឥណ្ឌា និងអាមេរិក ប៉ះពាល់អាជីវកម្មក្នុងស្រុក

បានផុស

១១ ខែ មុន

នៅ

ថ្ងៃព្រហស្បតិ៍ ៧ សីហា ២០២៥

ដោយ

អ្នកជំនាញថៃបានព្រមានថា គោលនយោបាយពន្ធគយរបស់ប្រធានាធិបតីអាមេរិក ដូណាល់ ត្រាំ នឹងបង្កើនលំហូរទំនិញពីប្រទេសចិន ឥណ្ឌា និងសហរដ្ឋអាមេរិក ដែលអះអាចបង្កផលប៉ះពាល់សម្រាប់អាជីវកម្មក្នុងស្រុកថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់កាសែត The Nation លោក Pramook Chetphongsathorn នាយកប្រតិបត្តិនៃក្រុមហ៊ុន PJUS GROUP និងជាទីប្រឹក្សាកិត្តិយសនៃនាយកដ្ឋានជំរុញពាណិជ្ជកម្មអន្តរជាតិ បានប្រាប់កាសែត Thansettakij ថា បច្ចុប្បន្ន ទំនិញចិននាំចេញទៅអាមេរិកត្រូវជាប់ពន្ធត្រឹម ៣០ ភាគរយ ត្រឹមថ្ងៃទី ១២ សីហា។ ប៉ុន្តែផុតពីនោះ ទំនិញចិនអាចនឹងជាប់ពន្ធ ១៤៥ ភាគរយ តាមអត្រាចាស់ បើការចរចាពន្ធអាមេរិក-ចិន មិនបានសម្រេច។

ជាមួយគ្នានោះ អាមេរិកក៏ដាក់ពន្ធប្រមាណ ២៥ ភាគរយ លើឥណ្ឌា ផងដែរ ហើយកាលពីថ្ងៃពុធលោក ត្រាំ បានបន្ថែម ២៥ ភាគរយ ពីលើនោះទៀត។

លោក Pramook បានពន្យល់ថា នៅពេលដែលពន្ធកើនឡើង ទំនិញពីចិន និងឥណ្ឌា ទៅសហរដ្ឋអាមេរិកនឹងធ្លាក់ចុះ ប៉ុន្តែទំនិញទាំងនោះនឹងហូរកាន់តែច្រើនទៅកាន់ប្រទេសជាទីផ្សារជំនួសវិញ។

អ្នកជំនាញដដែលបានលើកឡើងថា ប្រទេសថៃរំពឹងថានឹងក្លាយជាគោលដៅសំខាន់ សម្រាប់ទំនិញរកទីផ្សារជំនួស ទាំងពីប្រទេសចិន និងឥណ្ឌា។ លើសពីនេះ ថៃក៏អាចនឹងឃើញពីកំណើននៃការនាំចូលពីសហរដ្ឋអាមេរិកផងដែរ នៅពេលដែលថៃបើកទីផ្សារស្ទើរទាំងស្រុងសម្រាប់អាមេរិក ក្រោមកិច្ចព្រមព្រៀងពាណិជ្ជកម្មថ្មីជាមួយរដ្ឋបាល ត្រាំ ដែលសម្រេចបាននូវការទម្លាក់ពន្ធមកត្រឹម ១៩ ភាគរយ កាលពីចុងខែកក្កដា។

គួរគូសបញ្ជាក់ថា អ្នកជំនាញបានព្រមានថា អាជីវកម្មក្នុងស្រុកថៃអាចនឹងរងនូវការប្រកួតប្រជែងកាន់តែខ្លាំង ដោយសារលំហូរទំនិញពីបរទេស ជាពិសេសទំនិញថោកៗពីចិន។ ឧស្សាហកម្មមួយចំនួនដូចជាសាច់ជ្រូក គោ និងមាន់ បានសម្ដែងក្ដីបារម្ភខ្លាំង ក្រោយឮថា ថៃអាចបើកទីផ្សារសម្រាប់សាច់ពីអាមេរិក។ លំហូរទំនិញច្រើនពីបរទេស អាចធ្វើឱ្យអាជីវកម្មថៃពិបាកប្រកួតប្រជែង ឬបិទដំណើរការតែម្ដង ប៉ះពាល់ដល់ប្រាក់ចំណូល និងបាត់បង់ការងារជាដើម៕