សេដ្ឋកិច្ច

សហគមន៍កសិកម្មទំនើបមួយទៀត នឹងមានវត្តមាននៅខេត្តកំពង់ឆ្នាំងឆាប់ៗ

បានផុស

១០ ខែ មុន

នៅ

ថ្ងៃចន្ទ ២៥ សីហា ២០២៥

ដោយ

បើតាមលោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ខេត្តកំពង់ឆ្នាំងនឹងមានសហគមន៍កសិកម្មទំនើបទីមួយរបស់ខ្លួន គឺ «សហគមន៍កសិកម្មទំនើបខេមស៊ីដ» ដែលមានទីតាំងស្ថិតនៅក្នុងឃុំពេជចង្វារ ស្រុកបរិបូណ៍ ខេត្តកំពង់ឆ្នាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ បានមានប្រសាសន៍ថា សហគមន៍កសិកម្មទំនើប «សហគមន៍កសិកម្មទំនើបខេមស៊ីដ» គ្រោងនឹងរៀបចំមហាសន្និបាតកំណើតរបស់ខ្លួននាពេលដ៏ខ្លីខាងមុខនេះ ជាមួយនឹងសមាជិកជាង ២០០ គ្រួសារ នៅលើផ្ទៃដីផលិតកម្មជិត ៥០០ហិកតា ដោយផ្តោតលើផលិតកម្ម និងការផ្គត់ផ្គង់មុខដំណាំ ២ ប្រភេទគឺ ស្រូវពូជ និងបន្លែសុវត្ថិភាពក្នុងផ្ទះសំណាញ់។

ក្នុងឱកាសនោះដែរ សហគមន៍ ក៏បានចុះកិច្ចព្រមព្រៀងទទួលយកជំនួយឥតសំណងភ្លាមៗពីគម្រោងពិពិធកម្មកសិកម្មកម្ពុជា ក្នុងទំហំទឹកប្រាក់ចំនួន ១៦ ម៉ឺនដុល្លារ (៤០% នៃទំហំផែនការវិនិយោគ) ដែលនឹងអនុញ្ញាតឱ្យសហគមន៍អាចវិនិយោគលើឡសម្ងួត ឃ្លាំងស្តុកពូជស្រូវ ម៉ាស៊ីនច្រូត ឡានដឹកជញ្ជូន ផ្ទះសំណាញ់ ៤៨ ខ្នង និងឧបករណ៍សម្ភារៈផលិតកម្មផ្សេងៗទៀត។

សូមជម្រាបថា យោងតាមសំណើរបស់ក្រសួងកសិកម្ម រុក្ខាប្រមាញ់ និងនេសាទ ដើម្បីជួយគាមទ្រទុនបង្វិលដល់សហគមន៍កសិកម្មទំនើប រាជរដ្ឋាភិបាលកម្ពុជា បានសម្រេចជាគោលការណ៍ផ្តល់ឥណទានចំនួន ៥៥ ០០០ ០០០ ដុល្លារថ្មី សម្រាប់ផ្តល់ឥណទានដល់សហគមន៍កសិកម្មទំនើបសម្រាប់រយៈពេល ៣ ឆ្នាំ គឺ ឆ្នាំ២០២៥-២០២៧៕

ដោយ៖ ឌិន ថារី