ទំនុកចិត្តអ្នកប្រើប្រាស់ថៃ ធ្លាក់ចុះទាបបំផុតក្នុងរយៈពេលជិត ៣ ឆ្នាំ

ទំនុកចិត្តអ្នកប្រើប្រាស់ថៃ បានបន្ត​ធ្លាក់ចុះ​ក្នុងរយៈពេល ៧ ខែជាប់ៗគ្នា​នៅខែសីហា ដល់កម្រិតទាបបំផុតក្នុងរយៈពេល ៣២ ខែ ចំពេល​មាន​កង្វល់អំពីការស្ទុះងើបឡើងវិញយឺតយ៉ាវនៃសេដ្ឋកិច្ច​ អស្ថិរភាពនយោបាយ និងពន្ធគយរបស់សហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ការស្ទង់មតិពីសាកលវិទ្យាល័យ​សភាពាណិជ្ជកម្ម​ថៃ បាន​រកឃើញថា សន្ទស្សន៍ទំនុកចិត្តអ្នកប្រើប្រាស់ថៃ បាន​ធ្លាក់ចុះដល់ ៥០,១ ពិន្ទុ នៅខែសីហា ពី ៥១,៧ ពិន្ទុ នៅខែកក្កដា។​ ការស្ទង់មតិនេះ ត្រូវបានធ្វើឡើងមុនការបោះឆ្នោតជ្រើសរើសលោក Anutin Charnvirakul ជានាយករដ្ឋមន្ត្រីថ្មីរបស់ប្រទេសកាលពីសប្តាហ៍មុន។

​សាកលវិទ្យាធិការ លោក Thanavath Phonvichai ​បាន​និយាយប្រាប់អ្នកកាសែតក្រោយ​ចេញរបាយការណ៍ស្ទង់មតិថា៖ «សន្ទស្សន៍ទំនុកចិត្តអ្នកប្រើប្រាស់ បានបន្តធ្លាក់ចុះនៅ​គ្រប់វិស័យ ដោយបង្ហាញពី​លទ្ធភាព​នៃការធ្លាក់ចុះបន្ថែមទៀត ប្រសិនបើស្ថិរភាពនយោបាយធ្លាក់ចុះ ហើយសេដ្ឋកិច្ចមិនអាចងើបឡើងវិញយ៉ាងឆាប់រហ័ស ក្រោមវិធានការជំរុញរបស់រដ្ឋាភិបាល»។

​លោកបានមានប្រសាសន៍ថា សមត្ថភាពរបស់រដ្ឋាភិបាលថ្មីក្នុងការផ្តល់នូវលទ្ធផលលេចធ្លោ និងជាក់ស្តែង នឹងក្លាយជាគន្លឹះដើម្បី​បញ្រ្ចាស់ការធ្លាក់ចុះ​។

ជាទូទៅ ការធ្លាក់ចុះទំនុកចិត្តអ្នកប្រើប្រាស់មាន​ន័យថាអ្នកប្រើប្រាស់មិនសូវមានទំនុកចិត្តលើសេដ្ឋកិច្ច ដែលអាចឱ្យពួកកាត់បន្ថយចំណាយប្រាក់ ឬវិនិយោគ។ លោក Thanavath បានបន្តថា ទំនុកចិត្តអាចស្ទុះងើបឡើងវិញ ដោយសុទិដ្ឋិនិយមលើការដឹកនាំរបស់លោក Anutin ជានាយករដ្ឋមន្រ្តីថ្មី។ ​

ក្រោយ​ជាប់ឆ្នោតក្នុងសភា លោក Anutin បានបង្ហាញផែនការក្នុងការជំរុញសេដ្ឋកិច្ចទន់ខ្សោយថៃឱ្យងើបឡើងវិញតាមរយៈជម្រើសគណៈរដ្ឋមន្ត្រីរបស់លោក និងដោយសន្យាថានឹងនាំយកកម្មវិធីបង់ប្រាក់រួមគ្នាដ៏ពេញនិយម Khon La Khrueng មកវិញ។ កម្មវិធី Khon La Khrueng គឺជាគំនិតផ្ដួចផ្ដើមរបស់រដ្ឋាភិបាលដែលជួយចំណាយ ៥០ ភាគរយ លើការទិញទំនិញរបស់ពលរដ្ឋ។

សេដ្ឋកិច្ចថៃឆ្នាំនេះ រំពឹងថានឹង​បន្តក្នុងកំណើនយឺតយ៉ាវ ត្រឹមចន្លោះ ១,៨-២៣ ភាគរយ ឆ្នាំនេះ ធៀបនឹងកំណើន ២,៥ ភាគរយ ឆ្នាំមុន។ ​បច្ចុប្បន្នសេដ្ឋកិច្ចប្រទេសនេះ ប្រឈមនឹង​បញ្ហាផ្សេងៗរួមទាំងបំណុលគ្រួសារខ្ពស់ វិបត្តិទេសចរណ៍ ពន្ធអាមេរិក ជម្លោះព្រំដែន និងវិបត្តិនយោបាយជាដើម៕