សេដ្ឋកិច្ច

តម្លៃមាសបន្តបំបែកកំណត់ត្រាខ្ពស់បំផុតជាថ្មី នៅសប្ដាហ៍នេះ

បានផុស

៩ ខែ មុន

នៅ

ថ្ងៃពុធ ២៤ កញ្ញា ២០២៥

ដោយ

តម្លៃហាងឆេងមាសបន្តបំបែកកំណត់ត្រាថ្មីខ្ពស់បំផុតក្នុងប្រវត្តិសាស្ត្រមិនធ្លាប់មាន ដោយបានហក់ឡើងដល់ជាង ៤ ៥៦៦ ដុល្លារ ក្នុងមួយតម្លឹង កាលពីថ្ងៃអង្គារ៍ ដោយសារអាមេរិកត្រៀមកាត់បន្ថយអត្រាការប្រាក់បន្ថែមទៀត នៅដំណាច់ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន PP Link securities បានឱ្យដឹងថា តម្លៃមាសបានកើនឡើងដល់ ៤៥៦៦ ដុល្លារ ក្នុងមួយតម្លឹងនៅថ្ងៃទី ២៣ ខែកញ្ញា ឆ្នាំ ២០២៥ ពាក់ព័ន្ធជាមួយនឹងអត្រាការប្រាក់ ដោយសារតែពេលវេលានៅសល់ខ្លី នៅក្នុងឆ្នាំ ២០២៥ ហើយនៅសល់ការកាត់បន្ថយអត្រាការប្រាក់ ២ ដងទៀត នៅឆ្នាំនេះ បន្ទាប់ពីកាត់នៅថ្ងៃទី ១៨ ខែកញ្ញា ហើយគ្រោងនឹងកាត់ ២ ដងទៀត ធ្វើឱ្យគេគិតថា ជាឱកាសក្នុងការទិញមាសគឺល្អ ដោយសារតែប្រាក់ដុល្លារនឹងធ្លាក់ថ្លៃ។

លោក ឡុង សំណាង បន្ថែមថា៖ «មុនពេលការកាត់បន្ថយអត្រាការប្រាក់នៅថ្ងៃទី ១៨ ខែកញ្ញា ឆ្នាំ ២០២៥ តម្លៃមាសមានការកើនឡើងខ្លាំង ដោយសារតែឥទ្ធិពលនៃការបុកទិញច្រើនលើតម្លៃហាងឆេងមាស ហើយបន្ទាប់មកគឺមានការធ្លាក់ចុះបន្តិច ជាពិសេសគឺយប់ថ្ងៃ ១៨ ចំណុចនេះ គឺធនាគារ ឬវិនិយោគិនជាច្រើនគេកាត់យកផលចំណេញ គេលក់ចេញដើម្បីយកផលចំណេញ»។

ម្យ៉ាងទៀត ភាពតានតឹងនៃភូមិសាស្ត្រនយោយបាយ ក៏រំខានទៅដល់ដំណើរការសេដ្ឋកិច្ច ដែលធ្វើឱ្យតម្លៃមាសកើនឡើង។

តម្លៃមាសបានបើកផ្សារជួញដូរ ក្នុងតម្លៃ ៤៥៣៦ ដុល្លារ ក្នុងមួយតម្លឹងនៅថ្ងៃទី ២៤ ខែកញ្ញា ឆ្នាំ ២០២៥។ ហាងឆេងមាសក្នុងស្រុក នៅតាមបណ្ដាហារនានានៅក្នុងរាជធានីភ្នំពេញ លក់ចេញ ក្នុងតម្លៃ ៤៥៣ ដុល្លារ ក្នុងមួយជី៕

អត្ថបទ៖ ឡេង ដេត