ថ្នាំគ្រាប់មួយប្រភេទទៀត ក្រុមហ៊ុនឱសថរបស់ឥណ្ឌាអះអាងថាអាចជួយព្យាបាលអ្នកជំងឺកូវីដ

ក្រុមហ៊ុន Natco Pharma Limited របស់ឥណ្ឌា បានឱ្យដឹងថា ខ្លួនកំពុងដាក់ពាក្យស្នើសុំទៅអង្គការត្រួតពិនិត្យស្តង់ដារឱសថថ្នាក់កណ្តាល (CDSCO) ដើម្បីអនុម័តលើការសាកល្បងថ្នាំគ្រាប់ Molnupiravir Capsules ក្នុងដំណាក់កាលទី ៣ សម្រាប់ប្រើព្យាបាលអ្នកជំងឺវិជ្ជមានកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីប្រកាសព័ត៌មានពីក្រុមហ៊ុន Natco និយាយថា ថ្នាំ Molnupiravir មិនត្រឹមតែមានសមត្ថភាពប្រឆាំងនឹងជំងឺផ្តាសាយប៉ុណ្ណោះទេ តែអាចទប់ស្កាត់វីរុស SARS-CoV-2 យ៉ាងមានប្រសិទ្ធភាពផងដែរ។

របាយការណ៍ពីក្រុមហ៊ុនឱសថនេះ អះអាងថា អ្នកជំងឺដែលលេបថ្នាំ Molnupiravir ទទួលបានការឆ្លើយតបក្នុងរយៈពេល ៥ ថ្ងៃ នៃការព្យាបាល ដែលនេះមានន័យថា វាត្រូវការរយៈពេលខ្លីក្នុងការជាសះស្បើយពីជំងឺ ហើយមានអត្ថប្រយោជន៍ខ្ពស់ថែមទៀត។

Natco សង្ឃឹមថា CDSCO នឹងផ្តល់ការយល់ព្រមជាបន្ទាន់ចំពោះការប្រើថ្នាំនេះ ដោយផ្អែកលើលទ្ធផលពិសោធន៍ ហើយក្រុមហ៊ុនក៏បានត្រៀមខ្លួនរួចរាល់ដើម្បីបើកដំណើរផលិតថ្នាំនៅខែនេះ បើសិនមិនមានការជំទាស់។

ប្រសិនបើទទួលបានការយល់ព្រមពី CDSCO ថ្នាំគ្រាប់ Molnupiravir នឹងក្លាយជាឱសថបន្ធូរបន្ថយករណីផ្ទុះឡើងនៃវីរុសកូវីដ-១៩ រលកទី២ នៅក្នុងប្រទេសឥណ្ឌា​ ក៏ដូចជាទំនងអាចជួយព្យាបាលអ្នកជំងឺកូវីដក្នុងប្រទេសនានាជុំវិញពិភលោកផងដែរ៕

ប្រែសម្រួល៖ សន្យា

ប្រភព៖ mint

ចុចអាន៖ ក្រុមហ៊ុន Fujifilm សាកល្បងថ្នាំគ្រាប់ព្យាបាលជំងឺកូវីដ-១៩ ដំណាក់កាលចុងក្រោយ

ចុចអាន៖ ក្តីសង្ឃឹមរបស់ពិភពលោក! ថ្នាំផ្តាសាយមួយប្រភេទ អាចសម្លាប់កូវីដក្នុងរយៈពេលត្រឹមប៉ុន្មានថ្ងៃ, អង់គ្លេសកំពុងពិនិត្យមើល