ទីបំផុត អាមេរិក អនុញ្ញាតឲ្យអ្នកចាក់វ៉ាក់សាំងរួច មិនចាំបាច់ពាក់ម៉ាស ពេលចេញក្រៅ

មជ្ឈមណ្ឌលគ្រប់គ្រងនិងបង្ការជំងឺសហរដ្ឋអាមេរិក (CDC) បានប្រកាសថា ជនជាតិអាមេរិកដែលចាក់វ៉ាក់សាំងបានពេញលេញហើយ គឺមិនចាំបាច់ពាក់ម៉ាសទេ នៅពេលពួកគេចេញក្រៅ។

ក្រុមមន្ត្រីសុខាភិបាល បានបង្ហាញគោលការណ៍ណែនាំសុវត្ថិភាពថ្មីនេះ នៅឯសន្និសីទកាសែតរបស់ក្រុមការងារជំងឺកូវីដ-១៩ សេតវិមានកាលពីថ្ងៃអង្គារ។

គោលការណ៍ណែនាំថ្មីបាននិយាយថា អ្នកដែលទទួលវ៉ាក់សាំងគ្រប់តាមតម្រូវការហើយនោះ អាចដោះម៉ាសបាន ប្រសិនបើពួកគេនៅម្នាក់ឯងឬជាក្រុមតូចៗជាមួយមនុស្សដែលទទួលបានថ្នាំបង្ករហើយដូចគ្នា។

ប៉ុន្តែ CDC នៅតែរក្សាគោលការណ៍ណែនាំរបស់ខ្លួន ឲ្យពាក់ម៉ាសនៅកន្លែងបិទជិតនិងនៅកន្លែងដែលមានមនុស្សកកកុញ។

រហូតមកដល់ពេលនេះ ជនជាតិអាមេរិកជាង ៩៥លាននាក់ហើយ ដែលបានទទួលវ៉ាក់សាំងគ្រប់ដូស។

បន្ទាប់ពីការប្រកាសរបស់ CDC កាលពីថ្ងៃអង្គារ លោកប្រធានាធិបតី Joe Biden បានអបអរការណែនាំថ្មីនេះថាជា “វឌ្ឍនភាពដ៏អស្ចារ្យ”។

លោកប្រធានាធិបតី ក៏បានជំរុញឲ្យជនជាតិអាមេរិកដែលមិនទាន់បានទទួលវ៉ាក់សាំង ត្រូវទៅចាក់ថ្នាំបង្ការផងដែរ ដោយលោកបានហៅរឿងនេះថាជា “សកម្មភាពស្នេហាជាតិ”៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ ហានិភ័យ​ណាស់! អ្នក​ឧស្សាហ៍​ស៊ក​ម៉ាស​ដាក់​កែង​ដៃ និង​ទាញ​ចុះ​ក្រោម​ចង្កា កាន់​តែ​បង្ក​ការ​ឆ្លង​កូវីដ