ខេត្តត្បូងឃ្មុំសម្រេចបិទខ្ទប់ភូមិរកាធំជាបណ្តោះអាសន្ន

រដ្ឋបាលខេត្តត្បូងឃ្មុំបានសម្រេចបិទខ្ទប់ទីតាំងភូមិរកាធំ ឃុំជីរោទ៍ទី១ ស្រុកត្បូងឃ្មុំ ខេត្តត្បូងឃ្មុំជាបណ្ដោះអាសន្នដើម្បីទប់ស្កាត់ការរីករាលដាលជំងឺកូវីដ-១៩ នៃ “ព្រឹត្តិការណ៍ ២០កម្ភៈ”។

 លោក ជាម ច័ន្ទសោភ័ណ្ឌ អភិបាលខេត្តត្បូងឃ្មុំបានឱ្យដឹងថា ការបិទខ្ទប់ក្នុងទីតាំងភូមិរកាធំ ឃុំជីរោទ៍ទី១ ស្រុកត្បូងឃ្មុំដើម្បីទប់ស្កាត់ការឆ្លងរីករាលដាលជំងឺកូវីដ-១៩ នៃ “ព្រឹត្តិការណ៍ ២០កម្ភៈ” ចាប់ពីថ្ងៃទី២៧ ខែមេសា ឆ្នាំ២០២១ រហូតដល់មានសេចក្តីសម្រេចជាថ្មី។

លោកអភិបាលខេត្តបានបន្តថា ដោយឡែកមានការលើកលែងក្នុងករណីចាំបាច់មួយចំនួនដូចជាការធ្វើដំណើរទៅទីកន្លែងលក់ម្ហូបអាហារ ឬគ្រឿងឧបភោគបរិភោគ និងសម្ភារៈប្រើប្រាស់ប្រចាំថ្ងៃដែលអនុញ្ញាតឱ្យបើកដំណើរការដោយអាជ្ញាធរមានសមត្ថកិច្ច។ ការធ្វើដំណើរដោយមានបញ្ហាសុខភាពបន្ទាន់ដោយមានការអនុញ្ញាតពីអាជ្ញាធរមានសមត្ថកិច្ច។ ការធ្វើដំណើរទៅបង្ហាញខ្លួនយកសំណាកទៅវិភាគរកជំងឺកូវីដ-១៩ និងទទួលការចាក់វ៉ាក់សាំងការពារកូវីដ-១៩ តាមការកំណត់។ ការធ្វើដំណើររបស់បុគ្គលិកពេទ្យរដ្ឋឯកជនមន្ត្រីរាជការក្រុមពន្លត់អគ្គិភ័យកងកម្លាំងប្រដាប់អាវុធគ្រប់ប្រភេទដើម្បីបំពេញបេសកកម្ម និងការធ្វើដំណើរដោយមូលហេតុចាំបាច់ និងបន្ទាន់ផ្សេងទៀតដែលមានការអនុញ្ញាតពីអាជ្ញាធរមានសមត្ថកិច្ច។

លោកអភិបាលខេត្តបានបញ្ជាក់ថា បុគ្គល ឬនីតិបុគ្គលទាំងឡាយណាដែលមិនអនុវត្តតាមខ្លឹមសារខាងលើនឹងត្រូវចាត់វិធានការយ៉ាងម៉ឺងម៉ាត់ស្របតាមវិធានការកំណត់ក្នុងច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តជាធរមាន៕

អត្ថបទ៖ សំអឿន