មិនមើលនឹងភ្នែកឡើយ! សហគមន៍អន្តរជាតិបន្តផ្តល់ជំនួយបន្ថែមទៀតដល់ប្រទេស ឥណ្ឌា ដែលកំពុងដុនដាបដោយកូវីដ

រដ្ឋាភិបាល ក៏ដូចជាក្រុមហ៊ុននានា នៅទូទាំងពិភពលោក កំពុងចូលរួមក្នុងកិច្ចប្រឹងប្រែង ដើម្បីជួយដល់ប្រទេសឥណ្ឌា នៅពេលដែលប្រទេសនេះ កំពុងព្យាយាមដោះស្រាយជាមួយនឹងការកើនឡើងនៃករណីឆ្លងជំងឹកូវីដ ១៩ ។

ប្រទេសឥណ្ឌា បានរាយការណ៍ករណីឆ្លងថ្មីជាង ៣៦០,០០០ ករណីនៅថ្ងៃពុធនេះ ខណៈដែលចំនួនករណីឆ្លងប្រចាំថ្ងៃដែលបានឡើងលើស ៣០ ម៉ឺនករណី គឺមានរយៈពេល ៦ ថ្ងៃជាប់គ្នាហើយ ។

នៅរដ្ឋធានីញូវដែលី មន្ទីរពេទ្យកំពុងអស់គ្រែក្នុងបន្ទប់ ICU ក៏ដូចជាការខ្វះខាត ផ្គត់ផ្គង់អុកស៊ីសែនវេជ្ជសាស្ត្រជាបន្ទាន់ ជាដើម ។

ទន្ទឹមនោះ កាលពីថ្ងៃអង្គារ ប្រទេសអង់គ្លេសបានសន្យា ផ្គត់ផ្គង់ឧបករណ៍វេជ្ជសាស្ត្រជាង ៦០០ គ្រឿង ក្នុងនោះមាន ម៉ាស៊ីនអុកស៊ីសែន និងបំពង់ខ្យល់ជំនួយការដកដង្ហើម ។

រដ្ឋមន្ត្រីការបរទេសអង់គ្លេសលោក Dominic Raab បានបង្ហោះរូបភាព នៅលើបណ្តាញសង្គម Twitter អំពីការមកដល់នៃការដឹកជញ្ជូនលើកដំបូង នៅក្នុងប្រទេសឥណ្ឌា ។ ប៉ុន្តែលោកបានព្រមានថា គ្មាននរណាម្នាក់មានសុវត្ថិភាពនោះទេ ទាល់តែមនុស្សទាំងអស់ធ្វើឲ្យមានសុវត្ថិភាពដោយខ្លួនឯង ហើយបាននិយាយថា “កិច្ចសហការអន្តរជាតិ គឺជាគន្លឹះក្នុងការប្រយុទ្ធប្រឆាំងនឹងការគំរាមកំហែងជាសកលនេះ” ។

បន្ថែមពីនេះ សហរដ្ឋអាមេរិក បារាំង អាល្លឺម៉ង់ និងអូស្ត្រាលី ក៏ស្ថិតក្នុងចំណោមប្រទេសដទៃទៀត ដែលផ្តល់ជំនួយដល់ប្រទេសឥណ្ឌា ផងដែរ ។

ស្របពេលជាមួយគ្នានេះ ប្រទេសប៉ាគីស្ថាន ដែលនៅជិតខាងគ្នា ក៏បានប្រកាសពីផែនការផ្តល់ជំនួយផ្នែកវេជ្ជសាស្រ្ត ដល់ឥណ្ឌា ផងដែរ ។ ជំនួយនេះកើតឡើង ទោះបីជាមានជម្លោះជាច្រើនទសវត្ស រវាងគូប្រជែងទាំងពីរ លើតំបន់កាស្មៀរក៏ដោយ ។

ចំណែក នាយកប្តិបត្តិក្រុមហ៊ុន Google លោក Sundar Pichai បាននិយាយថា ក្រុមហ៊ុននឹងផ្តល់ជំនួយហិរញ្ញវត្ថុ ដើម្បីជួយប្រយុទ្ធប្រឆាំងនឹងរោគរាតត្បាតនៅឥណ្ឌា ខណៈនាយកប្រតិបត្តិក្រុមហ៊ុន Microsoft លោក Satya Nadella ក៏បានប្រកាសដែរថា ក្រុមហ៊ុននឹងប្រើបច្ចេកវិទ្យារបស់ខ្លួន ដើម្បីគាំទ្រដល់កិច្ចខិតខំប្រឹងប្រែងផ្តល់ជំនួយសង្គ្រោះនៅក្នុងប្រទេសឥណ្ឌា ដោយសារតែ នាយកប្រតិបត្តិទាំងពីររូបនេះកើតនៅប្រទេសឥណ្ឌា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ WHO ទទួលស្គាល់កូវីដបំប្លែងខ្លួន ឥណ្ឌា ពិតជាអាចយកឈ្នះវ៉ាក់សាំងបច្ចុប្បន្ន ហើយបានបន្ថែមវ៉ារ្យ៉ង់នេះក្នុងបញ្ជីវីរុសរបស់ខ្លួន

ចុចអាន ៖ ថ្ងៃនេះ ឥណ្ឌាបំបែកកំណត់ត្រា​ឆ្លង​កូវីដ-១៩ ​ថ្មី និង​អ្នក​ស្លាប់សរុប​ជាង​​ជាង ២០ ម៉ឺន​នាក់​