កូវីដ-១៩

មុនបើកឡើងវិញថៅកែរោងចក្រទាំងអស់ ត្រូវត្រៀមលក្ខណៈឲ្យរួចរាល់ជាមុនសិនចៀសវាងបិទម្តងទៀត

បានផុស

៥ years មុន

នៅ

ថ្ងៃព្រហស្បតិ៍ ៦ ឧសភា ២០២១

ដោយ

លោក ហេងសួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានណែនាំដល់ថៅកែរោងចក្រសហគ្រាស ដែលត្រូវបើកដំណើរការឡើងវិញ ត្រូវត្រៀមលក្ខណៈឲ្យរួចរាល់ជាមុនសិន ដើម្បីកុំឲ្យមានឆ្លងជំងឺកូវីដ១៩ ចៀសវាងផ្អាកដំណើរការផលិតកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងតាមរយៈសារសំឡេងពាក់ព័ន្ធនឹងវិធានការសំខាន់ៗមួយចំនួននាយប់ថ្ងៃទី០៥ ខែឧសភា ឆ្នាំ២០២១នេះ លោក ហេងសួរបានបន្តថា«ខ្ញុំសូមរោងចក្រទាំងអស់ កុំធ្វើឲ្យការផ្តើមសកម្មភាពអាជីវកម្មឡើងវិញនេះ ទៅជាឱកាសធ្វើឲ្យមានការឆ្លងរាលដាលជំងឺកូវីដ-១៩ នៅក្នុងរោងចក្ររបស់ខ្លួន ហើយដែលនឹងនាំឲ្យមានការបិទរោងចក្រនោះឡើងវិញ ដោយរដ្ឋបាលរាជធានី ឬខេត្ត»។ លោកហេងសួរបានបានណែនាំដល់អ្នកគ្រប់គ្រងរោងចក្រ ត្រូវយកថ្ងៃទីទី១ ដែលត្រូវជាថ្ងៃទី៦ ខែឧសភានៃការផ្តើមដំណើរការរបស់ខ្លួនឡើងវិញនេះ ដើម្បីប្រជុំកំណត់ឈ្មោះ និងចំនួនកម្មករ ៥០% ដែលត្រូវធ្វើការវេនដំបូង ដែលមានរយៈពេល ២សប្តាហ៍ និង៥០%ទៀត ដែលត្រូវធ្វើក្នុងវេនបន្ទាប់ ដែលមានរយៈពេល២សប្តាហ៍ដូចគ្នា។ លោកបានបន្តទៀតថា«ខ្ញុំសូមរំឮកថាគ្រប់ម្ចាស់ម៉ាក និងអ្នកបញ្ជាទិញ ព្រមទាំងគម្រោងរោងចក្រកាន់តែប្រសើរនៅកម្ពុជាបានគាំទ្រការផ្តើមសង្វាក់ផលិតកម្មនៃរោងចក្រក្នុងវិស័យកាត់ដេរជាជំហានៗ ដោយផ្តើមចេញពី ៥០% នៃកម្លាំងកម្មករនិយោជិកសរុប និងឆ្លាស់វេនគ្នារៀងរាល់ពេល ២សប្តាហ៍»។

ទន្ទឹមនឹងនេះលោក ហេង សួរ បានណែនាំឲ្យត្រួតពិនិត្យលើស្ថានភាពអនាម័យ និងសុវត្ថិភាពនៃគ្រឿងម៉ាស៊ីនបម្រើឲ្យសង្វាក់ផលិតកម្មរបស់ខ្លួន និងប្រព័ន្ធបញ្ចេញបញ្ចូលចរន្តខ្យល់ក្នុងអាគារផលិតកម្ម។ វិធានអនាម័យ និងសុវត្ថិភាពការងារ ដូចជាផ្តល់ម៉ាសឲ្យកម្មករនិយោជិតយ៉ាងតិច១ ក្នុង១ថ្ងៃ ,ការបាញ់អាល់កុលពេលចូលនិងចេញពីការងារ, ការបន្ថែមម៉ាស៊ីនបាញ់អាល់កុលនៅក្នុងអាគារផលិតកម្ម, ការវាស់កម្ដៅ, សាប៊ូលាងដៃនៅក្នុងបន្ទប់ទឹក និងកន្លែងហូបបាយ។

ជាងនេះទៀត ត្រូវធ្វើការការបែងចែកវេនអាហារថ្ងៃត្រង់ និងលើកទឹកចិត្តឲ្យកម្មករនិយោជិតយកម្ហូបមកពីផ្ទះ។ ត្រៀមរំឭកកម្មករនិយោជិតឲ្យពាក់ម៉ាសជានិច្ចពេលជិះរថយន្ត និងពេលធ្វើការ ព្រមទាំងរក្សាឲ្យបាននូវ គោលការណ៍ ៣កុំ ៣ការពារ។ លោក ហេង សួរ បានណែនាំដល់អ្នកគ្រប់គ្រងរោងចក្រសហគ្រាសគួរពិនិត្យលើសេចក្ដីថ្លែងការរបស់គណៈកម្មការក្រុមប្រឹក្សាការងារនាថ្ងៃទី៤ ខែឧសភា ឆ្នាំ២០២១កន្លងទៅ។

គួរបញ្ជាក់ថា គិតត្រឹមចុងខែមេសាឆ្នាំ២០២១កន្លងទៅមានកម្មករកម្មការិនី ចំនួន១៦៧៣នាក់ក្នុងនោះនៅរាជធានីភ្នំពេញចំនួន១៥៩៨នាក់បានឆ្លងជំងឺកូវីដ១៩ នៅតាមរោងចក្រសហគ្រាសចំនួន២០៦រោងចក្រ។ ក្នុងចំណោមកម្មករឆ្លងទាំងនោះ មានឆ្លងនៅរាជធានីភ្នំពេញចំនួន១៣៤រោងចក្រ កណ្តាលចំនួន២៣រោងចក្រ តាកែវ២៣រោងចក្រ ព្រះសីហនុ១៦រោងចក្រ កំពង់ចាម១រោងចក្រនិងកំពង់ឆ្នាំង១រោងចក្រ។ ក្រៅពីនេះមានកម្មករកម្មការិនីជាង១៧០០០រោងចក្រកំពុងធ្វើចត្តាឡីស័កផងដែរ៕

អត្ថបទ៖ សំអឿន

សូមចុចអាន៖ ការិយាល័យសុខាភិបាលខណ្ឌច្បារអំពៅបញ្ជាក់ អ្នករើសអេតចាយម្នាក់នោះពុំមានផ្ទុកកូវីដ-១៩ទេ