កូវីដ-១៩

ត្រឹមតែរយៈពេល៥ថ្ងៃ ចាក់បានជិត២០ម៉ឺននាក់ នៃយុទ្ធនាការចាក់វ៉ាក់សាំងជូនប្រជាពលរដ្ឋនៅតំបន់ក្រហម

បានផុស

៥ years មុន

នៅ

ថ្ងៃព្រហស្បតិ៍ ៦ ឧសភា ២០២១

ដោយ

នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិបានឲ្យដឹងកាលពីយប់មិញថា រយៈពេល៥ ថ្ងៃ(គិតត្រឹមល្ងាចថ្ងៃទី០៥ ខែឧសភា) នៃយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋនៅតំបន់ក្រហម នៅរាជធានីភ្នំពេញ ក្រសួងការពារជាតិបានចាក់វ៉ាក់សាំងជូនបងប្អូនប្រជាពលរដ្ឋបានចំនួន១៩៦,០៦៦នាក់ ក្នុងនោះស្ត្រី១០២,៣៣៨នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកនៅថ្ងៃទី០៥ ខែឧសភា ឆ្នាំ២០២១នេះ ក្រសួងការពារជាតិ បានចាក់វ៉ាក់សាំងបង្ការជំងឺកូវីដ-១៩ ដល់បងប្អូនប្រជាពលរដ្ឋនៅតំបន់ក្រហម បានចំនួន៤៨,៨៤៨នាក់ ក្នុងនោះមាននារី២៥,៣៨១នាក់ ហើយតាមផែនការ ក្រសួងការពារជាតិ នឹងខិតខំចាក់វ៉ាក់សាំងបង្ការជំងឺកូវីដ១៩ នៅតំបន់ក្រហម រហូតបានរួចរាល់។

ជាមួយគ្នានោះ នាយឧត្តមសេនីយ៍ ឈុំ សុជាតិ បានអំពាវនាវដល់បងប្អូនប្រជាពលរដ្ឋនៅតំបន់នេះទាំងអស់ កុំមានការព្រួយបារម្ភខ្លាចអស់វ៉ាក់សាំង ឬមិនបានចាក់វ៉ាក់សាំង គឺរាជរដ្ឋាភិបាលបានត្រៀមវ៉ាក់សាំងរួចរាល់ហើយ ដើម្បីផ្តល់ជូនបងប្អូនក្នុងយុទ្ធនាការនេះ ហើយសូមបងប្អូនអនុវត្តតាមវិធានការសុខាភិបាល និងចៀសវាងបង្កភាពកកកុញ។

សូមបញ្ជាក់ថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី០៥ ខែឧសភា ឆ្នាំ២០២១ បានបញ្ជាក់ថា ការចាក់វ៉ាក់សាំងសម្រាប់ពលរដ្ឋនៅតំបន់ក្រហម នឹងធ្វើរហូតអស់។ សម្ដេចបន្តថា សម្រាប់នៅតំបន់ក្រហម កន្លងទៅគណៈកម្មការចំពោះកិច្ចបានបញ្ជូនវ៉ាក់សាំងចំនួន៩០ ម៉ឺនដូស ជូនទៅកងយោធពលខេមរភូមិន្ទ ដែលត្រូវចូលទៅចាក់នៅតំបន់ក្រហម ហើយចំនួនប្រជាពលរដ្ឋនៅតំបន់នោះមានរហូតជាង៥២ ម៉ឺននាក់ ប៉ុន្តែទោះបីជាចំនួនវ៉ាក់សាំងមិនគ្រប់ទៅតាមចំនួនប្រជាពលរដ្ឋក៏ដោយ ក៏មិនដើរចោលប្រជាពលរដ្ឋនោះទេ ពីព្រោះនៅថ្ងៃទី១១ ខែឧសភា ខាងមុខ វ៉ាក់សាំង នឹងមកដល់៥០ ម៉ឺនដូស ហើយថ្ងៃទី១៥ និងមកដល់៥០ ដូសទៀត ដូច្នេះនឹងចាក់រហូតអស់ប្រជាពលរដ្ឋ៕

អត្ថបទ៖ កោះកែវ

សូមចុចអាន៖ មូលហេតុតំបន់ក្រហមនៅតែក្រហម ទោះបីបានបិទខ្ទប់៣សប្ដាហ៍មកហើយ

Related Topics:កូវីដ-១៩