កុំជឿផ្តេសផ្តាស ហាលថ្ងៃមិនអាចព្យាបាលវីរុសកូវីដ-១៩បានទេ

ពន្លឺព្រះអាទិត្យពិតជាចាំបាច់សម្រាប់សុខុមាលភាព ប្រសិនរាងកាយទទួលបានក្នុងកម្រិតសមស្រប ប៉ុន្តែអាចបណ្តាលឱ្យមានបញ្ហាស្បែក បើវាលើសពីតម្រូវការ។

កន្លងមកមានពាក្យចចាមរ៉ាមថា ​ វីរុសកូវីដ-១៩ មិន​អាច​ទ្រាំ​នឹង​កម្តៅ​ថ្ងៃនោះទេ ដូចនេះ​ដើម្បី​សម្លាប់​មេរោគ​យើងត្រូវ​ឈរ ឬ​ហាត់​ប្រាណ​ហាល​ថ្ងៃ។ ផ្ទុយទៅវិញ អង្គការសុខភាពពិភពលោក​បញ្ជាក់​ថា វា​មិន​ត្រឹម​ត្រូវ​ឡើយ។ កម្តៅ​ក្តៅ​ខ្លាំង​ប៉ុនណាក៏​មិន​អាច​ការពារ ឬ​សម្លាប់​វីរុសកូវីិដ-១៩បាន​ដែរ ក្រៅ​ពី​ធ្វើ​អនាម័យ​ឱ្យបាន​ខ្ជាប់ខ្ជួន​តាម​ការ​ណែនាំ​របស់​ក្រសួងសុខាភិបាល។

ចំណែក ការ​ងូត​ទឹក​ក្តៅ​ក៏​មិន​អាច​ការពារ​មិន​ឆ្លងកូវីដ-១៩បាន​ដូចគ្នា ព្រោះ​សីតុណ្ហភាព​រាងកាយ​នៅ​តែ​មាន​ចាប់ពី ​៣៦-៣៧​អង្សាសេ ទោះ​អាកាសធាតុ​នៅ​ខាង​ក្រៅ​ក្តៅ ឬ​ត្រជាក់​ប៉ុ​នណាក៏​ដោយ។

ដោយឡែក ជំនឿមួយទៀតដែលថា អាកាសធាតុក្ដៅអាចកាត់បន្ថយអត្រាចម្លងងរោគ ក៏ត្រូវបានអ្នកជំនាញមកពីសហរដ្ឋអាមេរិកបដិសេធថាជារឿងមិនពិត។

យ៉ាងណាមិញ តាមការស្រាវជ្រាវមុនៗបានឱ្យដឹងថា វីរុសងាយនឹងងាប់ពេលវាត្រូវកម្ដៅថ្ងៃ។ តួយ៉ាងសម្ភារប្រើប្រាស់មួយចំនួន ក្រោយពីលាងសម្អាតឬបោកគក់ កាលណាយកទៅហាលថ្ងៃ នោះមេរោគដែលតោងជាប់នឹងឆាប់ងាប់លឿន។

រីឯការសិក្សាមួយដែលធ្វើឡើងនៅប្រទេសស្កុតឡេន បានអះអាងថា កាំរស្មីយូវីពីព្រះអាទិត្យប្រហែល ២០ នាទី អាចធ្វើឱ្យស្បែកអ្នកជំងឺកូវីដ-១៩បញ្ចេញជាតិគីមីម្យ៉ាងដែលអាចបន្ថយរោគសញ្ញា និងអត្រាមរណភាពដោយសារវីរុសនេះបានផងដែរ។

ទោះយ៉ាងណា ជំនឿតៗគ្នាអំពីការហាលថ្ងៃឬឈរក្រោមពន្លឺព្រះអាទិត្យអាចធ្វើឱ្យជាសះស្បើយពីជំងឺកូវីដ-១៩ ឬអាចសម្លាប់វីរុសបាន សុទ្ធតែជារឿងតំណាល ពុំមានការអះអាងខាងវិទ្យាសាស្ត្រដើម្បីគាំទ្រឡើយ៕

ប្រែសម្រួល៖ សន្យា

ប្រភព៖ BBC

ចុចអាន៖ អនុញ្ញាតឱ្យអ្នកជំងឺកូវីដប៉ះពន្លឺព្រះអាទិត្យអាចបន្ថយហានិភ័យនៃរោគសញ្ញាធ្ងន់ធ្ងរឬស្លាប់​

ចុចអាន៖ អ្នកជំនាញថា អាកាសធាតុក្តៅមិនអាចកាត់បន្ថយការចម្លងវីរុសកូវីដ-១៩បានទេ