កូវីដ-១៩

ជប៉ុនហាមចូលអ្នកដំណើរចេញពីកម្ពុជា ថៃ និង៥ប្រទេសទៀត

បានផុស

៣ years មុន

នៅ

ថ្ងៃព្រហស្បតិ៍ ២០ ឧសភា ២០២១

ដោយ

រដ្ឋាភិបាលប្រទេសជប៉ុននិយាយនៅថ្ងៃពុធថា ជប៉ុននឹងហាមអ្នកដំណើរបរទេសទាំងអស់ដែលចេញពីប្រទេសកម្ពុជា ថៃ និង៥ប្រទេសផ្សេងទៀតមិនឲ្យចូលប្រទេសខ្លួនឡើយដើម្បីទប់ស្កាត់កូវីដ-១៩។

ចំណាត់ការនេះនឹងត្រូវមានប្រសិទ្ធភាពចាប់ពីថ្ងៃសុក្រ ទី២១ ខែឧសភា សប្តាហ៍នេះ។ ការហាមអ្នកដំណើរជនបរទេសទាំងអស់ដែលចេញពីប្រទេសកម្ពុជា ថៃ និង៥ប្រទេសផ្សេងទៀតមាន ស្រីលង្កា សីស្ហែល សេនលូសៀ ទីម័រខាងកើត និងម៉ុងហ្គោលីដែលបានធ្វើឲ្យកើតចំនួនប្រទេស និងតំបន់ដែលត្រូវរឹតត្បិុតដល់ទៅ១៥៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកដំណើរបរទេសទាំងអស់ដែលបានទៅកាន់តំបន់ទាំងនោះក្នុងរយៈពេល១៤ថ្ងៃនៃការមកដល់នឹងមិនត្រូវអនុញ្ញាតឲ្យចូលប្រទេសជប៉ុនឡើយ លើកលែងតែមានករណីពិសេស។ ជនជាតិជប៉ុនមិនស្ថិតនៅក្រោមបំរាមនេះទេ។

ការចេញវិធានការនេះដើម្បីទប់ស្កាត់កូវីដ-១៩ដែលកំពុងរាលដាលនៅប្រទេសជប៉ុន ខណៈប្រទេសអាស៊ីមួយនេះគ្រោងនឹងបើកព្រឹត្តិការណ៍កីឡាអូឡាំពិករដូវក្តៅនៅថ្ងៃទី២៣ ខែកក្កដា ខាងមុខ។

ទន្ទឹមជាមួយគ្នានេះ មហាជនជាច្រើនបានដាក់ញត្តិតាមអនឡាញឲ្យជប៉ុនលុបចោលគម្រោងធ្វើម្ចាស់ផ្ទះព្រឹត្តិការណ៍កីឡាអូឡាំពិកនេះដោយសារប្រឈមនឹងកូវីដ-១៩ ប៉ុន្តែទាំងរដ្ឋាភិបាលជប៉ុន និងគណៈកម្មាធិការអូឡាំពិកអន្តរជាតិនៅតែប្តេជ្ញាដំណើរការព្រឹត្តិការណ៍កីឡានេះដដែល។

សូមបញ្ជាក់ថា ប្រទេសជប៉ុនគិតត្រឹមថ្ងៃទី១៩ ខែឧសភា ម្សិលមិញនេះមានករណីឆ្លងសរុបចំនួន៦៩២ ៧០២នាក់ និងករណីស្លាប់ចំនួន១១៨៥១នាក់៕