កូវីដ-១៩

អ្នកជំងឺកូវីដ១៩ ចំនួន១២នាក់ ត្រូវអនុញ្ញាតឲ្យសម្រាកព្យាបាលនៅក្នុងផ្ទះ នៅសង្កាត់បឹងទំពន់ទី១

បានផុស

៥ years មុន

នៅ

ថ្ងៃព្រហស្បតិ៍ ៨ កក្កដា ២០២១

ដោយ

ភ្នំពេញ ៖ ក្រុមគ្រូពេទ្យ និងអាជ្ញាធរសង្កាត់បឹងទំពន់ទី១ បានបន្តរកឃើញអ្នកវិជ្ជមានកូវីដ១៩ ចំនួន១២នាក់ទៀតហើយ នៅក្នុងមូលដ្ឋានសង្កាត់បឹងទំពន់ទី១ នៃខណ្ឌមានជ័យ នៅវេលាថ្ងៃទី០៨ ខែកក្កដា ឆ្នាំ២០២១ ប៉ុន្តែអ្នកទាំងនោះ ពុំត្រូវដឹកយកទៅព្យាបាលនៅមន្ទីរពេទ្យ ឬទីតាំងសម្រាប់សម្រាកព្យាបាលឡើយ គឺក្រុមគ្រូពេទ្យអនុញ្ញាតឲ្យមានការព្យាបាលដោយខ្លួនឯងនៅក្នុងផ្ទះ រៀងៗខ្លួន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកវិជ្ជមានទាំង១២នាក់ គឺរស់នៅក្នុងភូមិចំនួន៣ នៃសង្កាត់បឹងទំពន់ទី១ មានភូមិសន្សំកុសល២ , ភូមិចំរើនផល១ និងភូមិចំរើនផល៤ ។

លោកកុយ សាមឺឌី ស្មៀនសង្កាត់បឹងទំពន់ទី១ បានប្រាប់អោយដឹងថា អ្នកវិជ្ជមានកូវីដ១៩ ទាំង១២នាក់ ដែលត្រូវក្រុមគ្រូពេទ្យ អនុញ្ញាត្តិអោយព្យាបាលដោយខ្លួនឯងនៅក្នុងផ្ទះ គឺក្រុមគ្រូពេទ្យបានធ្វើការពិនិត្យលើអាការៈសុខភាព ឃើញថាមានសុខភាពមាំទាំល្អ ហើយទីសំណាក់របស់ពួកគេគឺមានលក្ខណៈធំទូលាយ មានខ្យល់គ្រប់គ្រាន់ចេញចូល ទើបក្រុមគ្រូពេទ្យសម្រេចអនុញ្ញាតអោយសម្រាកនៅផ្ទះព្យាបាល ដោយគោរពតាមគោលការណែនាំមួយចំនួន ពិសេសវិធានសុខាភិបាល ។

ស្មៀនសង្កាត់ដដែលបន្តថា អ្នកវិជ្ជមានទាំង១២នាក់ ត្រូវបានណែនាំអោយដាក់ខ្លួនអោយនៅដាច់ដោយឡែក ពីសមាជិកក្នុងគ្រួសារ ហើយត្រូវពាក់ម៉ាស់ បាញ់អាល់កុលអោយទៀងទាត់ ត្រូវនៅកន្លែងដែលមានខ្យល់ចេញចូល ធ្វើលំហាត់ប្រាណជាប្រចាំ សម្រាក និងញាំម្ហូបអាហារដែលមានជីវជាតិគ្រប់គ្រាន់ ក៏ដូចជាញាំទឹកឲ្យបានច្រើន ហើយពិសេសនោះ បើក្នុងករណីអាការៈសុខភាពមានការធ្វើទុក្ខណាមួយនោះ គឺត្រូវទំនាក់ទំនងទៅកាន់ក្រុមគ្រូពេទ្យដែលប្រចាំការក្នុងមូលដ្ឋានសង្កាត់ ដើម្បីចុះពិនិត្យតាមដានអាការៈសុខភាពបន្តទៀត។

លោកបានបន្តថា ចំពោះកុមារតូចៗ ឬមនុស្សចាស់ជរានោះ គឺពុំត្រូវអនុញ្ញាតអោយមានការសម្រាកព្យាបាលនៅផ្ទះឡើយ គឺត្រូវដឹកយកទៅព្យាបាល លើកលែងតែជាមនុស្សជំទង់ មានសុខភាពមាំទាំងពេញកម្លាំងប៉ុណ្ណោះដែលត្រូវបានអនុញ្ញាត្តិ ។ ទន្ទឹមនឹងការអនុញ្ញាតអោយសម្រាកនៅផ្ទះដោយខ្លួនឯងនោះ គឺពុំមានការផ្តល់ថ្នាំសម្រាប់លេបឡើយ ដោយសារមិនទាន់មានគោលការណ៍ក្នុងការផ្តល់ជូនសម្រាប់លេប ។ ក្នុងនោះក្រុមគ្រូពេទ្យបានណែនាំអោយ អ្នកជំងឺអាចពឹងពាក់បងប្អូនសាច់ញាតិ ឬអ្នកស្គាល់គ្នា ជួយទិញថ្នាំតាមឱសថស្ថាន មកលេបដោយខ្លួនឯង ឧទាហរណ៍ថា បើមានអាការៈឈឺក សូមទិញថ្នាំឈឺក មានឈឺក្បាលសូមទិញថ្នាំព្យាបាល ជាដើម។

សូមបញ្ជាក់ថា ចំពោះទីតាំងដែលត្រូវរកឃើញមានអ្នកវិជ្ជមានកូវីដ១៩ហើយនោះ ក្រុមអាជ្ញាធរ បានសម្រេចធ្វើការឃ្លុំប៉េទីតាំងជាបណ្តោះអាសន្ន។ ក្នុងនោះដែរ សមាជិកដែលនៅក្នុងទីតាំង ក្រោយតេស្តសំណាកឃើញថា អវិជ្ជមានហើយនោះ គឺត្រូវតម្រូវឲ្យធ្វើចត្តាឡីស័ក១៤ថ្ងៃទាំងអស់គ្នា។

គួរបញ្ជាក់ថា ចំពោះការអនុញ្ញាតឲ្យអ្នកជំងឺសម្រាកព្យាបាលនៅផ្ទះដោយខ្លួនឯងនោះ គឺពុំមែនជាការអនុញ្ញាតអោយឯកឯងពីសំណាក់ក្រុមគ្រូពេទ្យឡើយ គឺដោយមានការស្នើសុំពីអ្នកជំងឺ ហើយបន្ទាប់ពីមានការស្នើសុំរួច ក្រុមគណៈកម្មាការ មានគ្រូពេទ្យ និងអាជ្ញាធរតំបន់ នឹងពិនិត្យ ធ្វើការវាយតម្លៃ លើអាការៈអ្នកជំងឺ ទីតាំងសំណាក់ដែលកំពុងរស់នៅ បូករួមជាមួយចំនួនសមាជិកក្នុងគ្រួសារជាដើម មុនឈានដល់ការអនុញ្ញាតអោយសម្រាកព្យាបាលនៅផ្ទះដោយខ្លួនឯង ។ ហើយវិធាន នៃការព្យាបាល និងការពារ គឺដូចបានរៀបរ៉ាប់នៅខាងលើ ៕

ដោយ ៖ លីហេង