មេចលនាអាវលឿង ទម្លាយខ្ទេចខ្ទីរឿង Anne និងនាយក MU ឃុបឃិតគ្នា ដល់ថ្នាក់វេចលុយ ១៨៥ លានដុល្លារគេចខ្លួន

មេចលនាអាវលឿង លោក សន្ធិ លឹមថុងគុល (Sondhi Limthongkul) កាលពីថ្ងៃទី២១ ខែវិច្ឆិកា បានទម្លាយខ្ទេចខ្ទីរឿងរ៉ាវនៅពីក្រោយកម្មវិធីប្រកួតបវរកញ្ញាចក្រវាលលើកទី៧៤ លើទឹកដីថៃថា នាយកប្រតិបត្តិក្រុមហ៊ុន JKN គឺនាង Anne Jakrajutatip បានរត់គេចខ្លួនជាមួយលុយជាង ៦ ពាន់លានបាត (១៨៥ លានដុល្លារ) ដោយប្ដូរទៅជារូបិយប័ណ្ណគ្រីបតូ ហើយឥឡូវនេះកំពុងរស់នៅក្នុងប្រទេសម៉ិកស៊ិកយ៉ាងសុខសប្បាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបង្ហាញថា Anne ទទួលជំនួយដ៏ធំពីលោក Raul Rocha ប្រធានបច្ចុប្បន្នរបស់ (Miss Universe) MU និងជាដៃគូអាជីវកម្មសំខាន់ម្នាក់ ដែលជួយនាងទទួលបានសញ្ជាតិម៉ិកស៊ិក និងអនុញ្ញាតឲ្យស្រ្តីកែភេទរូបនេះរស់នៅប្រកបដោយផាសុកភាព ដោយមិនភ័យខ្លាចចំពោះសកម្មភាពផ្លូវច្បាប់នៅក្នុងប្រទេសថៃ។

មេចលនាអាវលឿងក៏បានស៊ើបអង្កេតទំនាក់ទំនងរវាង Ann និង Raul ដោយបញ្ជាក់ថា កិច្ចព្រមព្រៀងលក់ភាគហ៊ុន JKN Legacy ដែលមានតម្លៃជាង ៥៨១លានបាត ទៅឲ្យលោក ​Raul គ្រាន់តែជាការក្លែងបន្លំសម្រាប់កិច្ចព្រមព្រៀងសម្ងាត់ ដើម្បីផ្លាស់ប្តូរអត្ថប្រយោជន៍ និងការការពារផ្នែកច្បាប់ប៉ុណ្ណោះ។

លោក សន្ធិ ក៏បានបង្ហាញពីប្រវត្តិដ៏អស្ចារ្យរបស់លោក Raul រួមទាំងភាពជាម្ចាស់កម្មសិទ្ធិពីមុនរបស់គាត់ លើកាស៊ីណូដែលត្រូវបានដុតបំផ្លាញ ដែលបណ្តាលឲ្យមានមនុស្សស្លាប់ជាច្រើន និងទំនាក់ទំនងទៅនឹងក្រុមដែលមានឥទ្ធិពលនៅក្នុងប្រទេសម៉ិកស៊ិកថែមទៀតផង។

លោកបានរិះគន់ការធ្លាក់ចុះនៃឆាក Miss Universe ក្រោមការគ្រប់គ្រងថ្មីរបស់លោក Raul Rocha ដោយបញ្ជាក់ថា Raul បានជាប់ពាក់ព័ន្ធនឹងអាជីវកម្មមិនពិតនៅក្នុងការប្រកួត MU ដោយប្រើប្រាស់គេហទំព័រល្បែងស៊ីសងតាមអ៊ីនធឺណិត សម្រាប់អ្នកចូលរួមក្នុងការថតរូប និងវីដេអូផ្សព្វផ្សាយ។

នោះបាននាំឲ្យមានរឿងអាស្រូវមួយដែលបវរកញ្ញាសម្រស់ជាច្រើន ត្រូវបង្ខំផ្សព្វផ្សាយគេហទំព័រល្បែងស៊ីសង ដែលនាំឲ្យមានរបាយការណ៍របស់ប៉ូលិស ដាក់ដោយលោក Nawat Itsaragrisil។ ស្ថានភាពកាន់តែធ្ងន់ធ្ងរឡើងដល់ចំណុចដែល MGI បានលុបចោលកិច្ចព្រមព្រៀងទិញភាគហ៊ុន JKN ចំនួន ៥០ លានបាតជាផ្លូវការភ្លាមៗ ដោយលើកឡើងពីកង្វះទំនុកចិត្តលើការគ្រប់គ្រងផ្ទៃក្នុងរបស់ MUO/JKN និងបញ្ហារូបភាព។ កាលណោះ Nawat ក៏បានដកខ្លួនចេញពីតំណែងជាម្ចាស់ភាគហ៊ុន និងជានាយកប្រតិបត្តិជាន់ខ្ពស់របស់ MU ផងដែរ។

មិនតែបុណ្ណោះ លោក សន្ធិ លឹមថុងគុល បានប្រៀបធៀបឋានៈបច្ចុប្បន្នរបស់ Anne មិនខុសពីឋានៈរបស់ពួកអ្នកមានអំណាចចិន និងថៃដែលប្រើលុយដើម្បីទិញចំណងជើង ស្វែងរកកន្លែងគេងដ៏ស្រួល ហើយបានសន្និដ្ឋានថា នាងមិនអាចវិលមកប្រទេសថៃបានទេ ព្រោះនាងត្រូវប្រឈមមុខនឹងដីកាចាប់ខ្លួន និងសំណុំរឿងផ្លូវច្បាប់ដែលមានរយៈពេលយូរ។

ទោះជាយ៉ាងនេះក្ដី ការបង្ហាញព័ត៌មានពីអតីតអ្នកនៅខាងក្នុងបានជំរុញឲ្យមានការរិះគន់យ៉ាងទូលំទូលាយ អំពីកម្មវិធី Miss Universe ប៉ុន្តែមកទល់ពេលនេះ មិនមានការបំភ្លឺណាមួយត្រូវបានចេញដោយស្ថាប័នសម្រស់នូវឡើយទេ ខណៈបវរកញ្ញាម៉ិកស៊ិក Fatima Bosch (ហ្វាទីម៉ា បូស) បានយកឈ្នះលើបេក្ខនារីជិត ១២០ នាក់ ក្លាយជាម្ចាស់មកុដបវរកញ្ញាចក្រវាលលើកទី៧៤ ក្នុងឆ្នាំ២០២៥៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

Fatima Bosch ឈ្នះមកុដ MU ទាំងដែលមានជម្លោះជាមួយ Nawat