Fatima Bosch ឈ្នះមកុដ MU ទាំងដែលមានជម្លោះជាមួយ Nawat

នៅក្នុងវគ្គផ្តាច់ព្រ័ត្រនៃកម្មវិធីប្រកួតបវរកញ្ញាចក្រវាលឆ្នាំ ២០២៥ បានធ្វើឡើងជាផ្លូវការនៅទីក្រុងបាងកក ខណៈដែលលទ្ធផលចុងក្រោយ បវរកញ្ញាវ័យ ២៤ ឆ្នាំ Fatima Bosch (ហ្វាទីម៉ា បូស) តំណាងឲ្យប្រទេសម៉ិកស៊ិក បានយកឈ្នះលើបេក្ខនារីជិត ១២០ នាក់ ក្លាយជាម្ចាស់មកុដ Miss Universe (MU) ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះជាបែបនេះក្ដី លទ្ធផលនៃរដូវកាលឆ្នាំនេះ បានបង្កឲ្យមានភាពចម្រូងចម្រាសយ៉ាងខ្លាំងនៅលើបណ្តាញសង្គមទូទាំងពិភពលោក។ មនុស្សជាច្រើនគិតថា បវរកញ្ញាម៉ិកស៊ិករូបនេះ មិនសក្តិសមនឹងទទួលបានមកុដនោះទេ ព្រោះចម្លើយរបស់នាងគឺមិនសមហេតុផល នៅក្នុង Top 5 ឡើយ។ លទ្ធផលនេះដែរ ហាក់ដូចជាការពេញចិត្តរបស់ប្រធានកម្មវិធីប្រកួត គឺអ្នកជំនួញម៉ិកស៊ិក លោក Raul Rocha។ លោកត្រូវបានចោទប្រកាន់ថា មានទំនាក់ទំនងជិតស្និទ្ធជាមួយរាជិនីសម្រស់នេះយ៉ាងខ្លាំង។

មិនតែប៉ុណ្ណោះ តាំងពីដើមដំបូងនៃការប្រកួតមក បវរកញ្ញាវ័យ២៥ឆ្នាំរូបនេះ ទទួលបានការចាប់អារម្មណ៍យ៉ាងខ្លាំងពីអ្នកគាំទ្រសម្រស់អន្តរជាតិ បន្ទាប់ពីហេតុការណ៍ដែលបានកើតឡើងនៅក្នុងពិធីបំពាក់ឈាងផ្លូវការ។ នៅក្នុងពិធីនោះ លោក Nawat បានហៅបវរកញ្ញាថា ជាមនុស្សល្ងង់ ចំពោះការមិនអនុវត្តតាមកាតព្វកិច្ចនៃការប្រកួត និងឲ្យសន្តិសុខបណ្តេញនាងចេញពីព្រឹត្តិការណ៍នោះភ្លាមៗ ។

បន្ទាប់មក នាងបានព្យាយាមបង្ហាញទស្សនៈផ្ទាល់ខ្លួន ប៉ុន្តែបរិយាកាសរវាងភាគីទាំងពីរកាន់តែតានតឹងឡើងៗ។ ដោយសារតែមានការខឹងសម្បារខ្លាំងពេក Fátima បានចាកចេញពីសាលប្រជុំ។ នាងក៏មិនស្ទាក់ស្ទើរក្នុងការលាតត្រដាងចរិតលោក Nawat ដែរ ដោយថា នាងមានការអាក់អន់ចិត្ត និងមិនត្រូវបានគោរព នៅពេលដែលលោក Nawat ហៅនាងថាល្ងង់នៅចំពោះមុខគេឯង ហើយស្រែកឲ្យបិទមាត់ ទោះបីជានាងមិនបានធ្វើអ្វីខុសក៏ដោយ។

ទោះបីជាបង្កឲ្យមានភាពចម្រូងចម្រាសជាច្រើនក៏ដោយ ក៏មិនអាចបដិសេធបានថា Fatima Bosch មានចំណុចខ្លាំងជាច្រើន រាប់ចាប់ពីរូបរាង រហូតដល់ឥទ្ធិពលលើបណ្តាញសង្គម។ ការបង្ហោះថ្មីៗរបស់នាងទៀតសោត ក៏ទទួលបានទទួលការចាប់អារម្មណ៍យ៉ាងច្រើន ជាមួយនឹងការចូលចិត្តរាប់រយពាន់ដង និងមតិយោបល់ ព្រមទាំងការចែករំលែករាប់លានដងឯណោះ។

ដោយសារតែតំណាងម៉ិចស៊ិចមានឥទ្ធិពលខ្លាំងបែបនេះ មុនពេលត្រូវបានគ្រងមកុដ នៅលើវេទិកាសម្រស់ និងទស្សនិកជនបានទស្សន៍ទាយរួចហើយថា Fatima Bosch នឹងក្លាយជាគូប្រជែងដ៏ខ្លាំងក្លាបំផុតម្នាក់ក្នុងការឈ្នះមកុដនៅក្នុងឆ្នាំ២០២៥នេះ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

បវរកញ្ញា MU ជាច្រើន ថា ប្រព័ន្ធផ្សព្វផ្សាយថៃផ្សាយបំភ្លើសពីការពិត