ស្រ្តី ចិន កែសម្ផស្ស ៣៧ ដង ឲ្យដូច Fan Bingbing ចុងក្រោយបែរជារងទឹកភ្នែក

ស្ត្រីជនជាតិចិនម្នាក់មានការខកចិត្តយ៉ាងខ្លាំង បន្ទាប់ពីចំណាយប្រាក់ជាង៨លានយ័ន លើការវះកាត់កែសម្ផស្សដើម្បីផ្លាស់ប្តូរមុខដោយសង្ឃឹមថា នឹងទទួលបានកិត្តិនាមដូច Fan Bingbing។ នៅទីបំផុតនាងបានប្រឈមមុខនឹងផលវិបាកទាំងស្រុង នោះគឺកេរ្តិ៍ឈ្មោះជាតារាសម្តែងដ៏ល្បីល្បាញត្រូវបានបំផ្លាញ ជីវិតត្រូវផ្លាស់ប្តូរ ហើយត្រូវអ្នកលេងអ៊ីនធឺណិតចំអក។

ស្ត្រីឈ្មោះ He Chengxi អាយុ ៣១ ឆ្នាំ មកពីគ្រួសារអ្នកមានមួយនៅទីក្រុង Shenzhen ភាគខាងត្បូងប្រទេសចិន បានទទួលការវះកាត់កែសម្ផស្សចំនួន ៣៧ ដងរវាងឆ្នាំ ២០០៨ និង ២០១៦។ ការវះកាត់ស្ទើរតែទាំងអស់គឺជាការវះកាត់មុខដើម្បីទទួលបានរូបរាងដូច Fan Bingbing ដែលនាងស្រឡាញ់រហូតដល់ចំណុចដែលសុខចិត្តលះបង់អ្វីៗគ្រប់យ៉ាងសឹងតែទាំំងអស់។

នាងធ្លាប់បាននិយាយដោយស្មោះត្រង់នៅក្នុងបទសម្ភាសន៍មួយថា ខ្លួនមិនពេញចិត្តនឹងរូបរាងធម្មតាទេ ហើយចង់ធ្វើដូច Fan Bingbing ដែរ។ ទោះបីជាឪពុកម្តាយនាង ដំបូងឡើយប្រឆាំងយ៉ាងខ្លាំងក៏ដោយ ក៏នាងមានការតាំងចិត្ត ថែមទាំងគំរាមកំហែងធ្វើបាបខ្លួនឯងទៀតផង ប្រសិនបើបំណងប្រាថ្នាត្រូវបានបដិសេធ។ នាងបានវះកាត់ត្របកភ្នែកពីរជាន់ចំនួនបីដង ដោយតែងតែណែនាំគ្រូពេទ្យឲ្យមើលទៅដូច Fan Bingbing ឲ្យបានច្រើនតាមដែលអាចធ្វើទៅបាន។

កិច្ចខិតខំប្រឹងប្រែងរបស់នាងបានចាប់ផ្តើមបង្កើតផ្លែផ្កានៅឆ្នាំ ២០១៦ នៅពេលដែល He Chengxi ទទួលបានការទទួលស្គាល់យ៉ាងទូលំទូលាយ បន្ទាប់ពីចូលរួមក្នុងការប្រកួតចម្រៀងជាតិ។ ដែលមានឈ្មោះថា «Little Fan Bingbing» នាងទទួលបានតួនាទីតូចៗនៅក្នុងខ្សែភាពយន្ត និងរឿងភាគទូរទស្សន៍ ដែលបើកផ្លូវសម្រាប់អាជីពជាតារាល្បីដែលនាងស្រមៃចង់បាន។

ជីវិតរបស់នាងទាក់ទាញការចាប់អារម្មណ៍កាន់តែខ្លាំង នៅពេលដែលនាងបានណាត់ជួប និងរៀបការជាមួយ Yu Xiaoquan ដែលជាគ្រូពេទ្យវះកាត់កែសម្ផស្សម្នាក់ផ្ទាល់ខ្លួន។ គាត់ក៏បានវះកាត់ច្រើនដង ដើម្បីឲ្យស្រដៀងនឹង Li Chen ដែលជាមិត្តប្រុសរបស់ Fan Bingbing នៅពេលនោះដែរ។ គូស្នេហ៍នេះត្រូវបានគេអញ្ជើញឲ្យចូលរួមក្នុងការផ្សាយពាណិជ្ជកម្ម និងព្រឹត្តិការណ៍ពាណិជ្ជកម្មនៅទូទាំងប្រទេសចិន ក្នុងនាមជាគូស្នេហ៍ចម្លងរបស់តារាល្បីៗ។

ទោះជាយ៉ាងណាក៏ដោយ អាពាហ៍ពិពាហ៍របស់ពួកគេបានបញ្ចប់យ៉ាងឆាប់រហ័ស។ ពួកគេបានរៀបការនៅឆ្នាំ ២០១៧ ហើយមានកូនប្រុសម្នាក់នៅឆ្នាំដដែលនោះ មុនពេលដែល He បានលាតត្រដាងការពិតនៅលើបណ្តាញសង្គម។ ប្តីរបស់នាងមានទំនាក់ទំនងស្នេហាជាមួយបុរសម្នាក់ទៀត ដែលនាំឲ្យមានការលែងលះគ្នានៅឆ្នាំ ២០១៨ ដោយតុលាការបានផ្តល់សិទ្ធិចិញ្ចឹមកូនឲ្យ Yu។

ចំណុចរបត់ដ៏សំខាន់មួយបានកើតឡើងនៅក្នុងឆ្នាំដដែលនោះ នៅពេលដែល Fan Bingbing ជាប់ពាក់ព័ន្ធនឹងរឿងអាស្រូវគេចពន្ធ ដែលបណ្តាលឲ្យមានការពិន័យសរុបជាង ៨៨៤ លានយ័ន និងការហាមឃាត់ពីឧស្សាហកម្មកម្សាន្តចិន។ កេរ្តិ៍ឈ្មោះដែលធ្លាប់ទទួលបានជោគជ័យរបស់គាត់បានក្លាយជាបន្ទុកមួយ។ នាងត្រូវបានអ្នកលេងអ៊ីនធឺណិតចំអកយ៉ាងខ្លាំង បាត់បង់ឱកាសសម្តែងទាំងអស់ហើយរូបភាព «Little Fan Bingbing» របស់នាងបានក្លាយជាដាវមុខពីរទៅវិញ។

បច្ចុប្បន្ន He Chengxi បានបង្កើតជីវិតឡើងវិញជាអ្នកសរសេរប្លុកម៉ូដ និងអ្នកផ្សាយផ្ទាល់ដែលមានអ្នកតាមដានប្រហែល ៣៣០,០០០ នាក់។ នាងបានវះកាត់កែសម្ផស្សបន្ថែមទៀត ដើម្បីកាត់បន្ថយភាពស្រដៀងគ្នារបស់នាងទៅនឹង Fan Bingbing ដោយបាននិយាយនៅក្នុងវីដេអូមួយថា «ខ្ញុំគឺជាខ្ញុំ ហើយគោលការណ៍មួយក្នុងជីវិតរបស់ខ្ញុំគឺមិនត្រូវព្យាយាមផ្គាប់ចិត្តនរណាម្នាក់ឡើយ»។

រឿងរ៉ាវរបស់នាងនៅតែបន្តត្រូវបានពិភាក្សាយ៉ាងទូលំទូលាយតាមអ៊ីនធឺណិតនៅក្នុងប្រទេសចិន ថាជាមេរៀនដ៏មានតម្លៃមួយអំពីគ្រោះថ្នាក់នៃការពឹងផ្អែកលើកិត្តិនាមរបស់អ្នកដទៃ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

Liu Yifei លុបរូបចោលភ្លាមៗ ក្រោយត្រូវគេចំអកដល់នាង