ជីវិតកម្សាន្ដ

ខេមរៈ សិរីមន្ត និងភរិយាកាន់តែធ្វើឲ្យអ្នកគាំទ្រផ្ទុះការសរសើរខ្លាំងក្រោយធ្វើរឿងនេះ

បានផុស

៤ years មុន

នៅ

ថ្ងៃព្រហស្បតិ៍ ២៣ ធ្នូ ២០២១

ដោយ

ភ្នំពេញ ៖ មហាជនបានដឹងហើយថា កំពូលតារាចម្រៀងលោក ខេមរ: សិរីមន្ត ថ្មីៗនេះបានសម្រេចឧបត្ថម្ភនូវថវិកាផ្ទាល់ខ្លួនចំនួន២លានដុល្លារ ដើម្បីចូលរួមចំណែកក្នុងការកសាងផ្លូវនិងប្រឡាយទឹកជួយសម្រួលដល់ប្រជាពលរដ្ឋដែលរស់នៅស្រុកម៉ាឡៃខេត្តបន្ទាយមានជ័យ។

ការចូលរួមចំណែកការងារសប្បុរសធម៌ជួយដល់សង្គមពីសំណាក់តារាចម្រៀងលោក ខេមរៈ សិរីមន្ត នេះគឺទទួលបានការសរសើរនិងគាំទ្រច្រើនពីទស្សនិកជនរួចមកហើយ។ លើសពីនេះទៀតរឿងដែលកាន់តែធ្វើឲ្យមហាជនចាប់អារម្មណ៍ទៀតនោះ ដោយកាលពីថ្ងៃទី២២ខែធ្នូម្សិលមិញលោក ខេមរៈ សិរីមន្ត បានបង្ហាញសកម្មភាពមនុស្សធម៌មួយទៀតគឺការចែកអំណោយដល់សិល្បករ-សិល្បការិនីចាស់ជរានិងខ្វះខាតជាដើម។

បើតាមការបញ្ជាក់ឲ្យដឹងគឺតារាចម្រៀងលោក ខេមរៈ សិរីមន្ត ក្នុងសកម្មភាពនេះបានចំណាយថវិកាប្រមាណ៤,០០០ដុល្លារតាមរយៈសមាគមសិល្បករខ្មែរឧបត្ថម្ភដល់សិល្បករចាស់ជរាបាត់បង់ទីផ្សារសិល្បៈក្នុងម្នាក់ៗទទួលបានថវិកាចំនួន២០ម៉ឺនរៀល និងគ្រឿងឧបភោគបរិភោគជាច្រើន ដែលជាការដឹងគុណដល់សិល្បកររៀមច្បង។

លោក ខេមរ: សិរីមន្ត បានបញ្ជាក់ថា អំណោយនិងទឹកប្រាក់នេះជាទឹកចិត្តបន្តិចបន្តូចចំពោះលោក គ្រូ អ្នកគ្រូសិល្បកររៀមច្បង។ សង្ឃឹមថានឹងអាចជួយរំលែកការលំបាកគាត់បានខ្លះ។ សូមជូនពរឲ្យគាត់មានសុខភាពល្អ រកស៊ីមានបានព្រមទាំងជួយផ្តល់ដំបូន្មានល្អៗដល់ខ្ញុំនិងប្អូនៗជំនាន់ក្រោយ។

ជាមួយគ្នានឹងសកម្មភាពជួយសង្គមរបស់កំពូលតារាចម្រៀងលោក ខេមរ: សិរីមន្ត ពេលនេះកំពុងទទួលបានការគាំទ្រច្រើន ពីសំណាក់មហាជននិងអ្នក ប្រើប្រាស់បណ្តាញសង្គមហ្វេសប៊ុក។ សូមបញ្ជាក់ដែរថា នេះពុំមែនជាលើកទី១ទេសម្រាប់លោក ខេមរៈ សិរីមន្ត ខណៈដែលកន្លងមកលោកក៏បានចូលរួមចំណែកច្រើនមកហើយដែរក្នុងការជួយដល់សង្គមជាតិ៕

ដោយ ៖ ចាន់រ៉ា