ជីវិតកម្សាន្ដ

តារាជើងចាស់ រិទ្ធ សារី ស្នើឲ្យបញ្ឈប់យករូបភាពទៅបង្ហោះដើម្បីផលប្រយោជន៍ផ្ទាល់ខ្លួន

បានផុស

២ years មុន

នៅ

ថ្ងៃសៅរ៍ ២៨ ឧសភា ២០២២

ដោយ

ភ្នំពេញ ៖ តារាសម្តែងជើងចាស់ នាអំឡុងទសវត្សន៍ឆ្នាំ៨០និង៩០លោកតារិទ្ធ សារី ថ្មីៗនេះបានធ្លាក់ ខ្លួនឈឺត្រូវចូលព្យាបាលនៅមន្ទីរពេទ្យនាទឹកដីខេត្តបាត់ដំបង ខណៈលោកតាក៏ជួបបញ្ហាខ្វះខាតផងដែរ។ ដោយសារមូលនេះហើយទើបមានការបង្ហោះផ្សព្វផ្សាយនៅលើគណនីហ្វេសប៊ុកនិងផេកមួយចំនួនដើម្បីស្វែងរកជំនួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញបន្ទាប់ពីមានការបង្ហោះនូវដំណឹងនៃការធ្លាក់ខ្លួនឈឺរបស់លោកតា រិទ្ធ សារី នេះដែរភ្លាមៗនោះលោកតារិទ្ធ សារី ក៏ទទួលបានក្តីសណ្តោះពីសម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជាដោយសម្តេចបានឧបត្ថម្ភថវិកាចំនួន១ម៉ឺនដុល្លារ ដើម្បីទុកព្យាបាលជំងឺ។ ដោយឡែកអំឡុងពេលនេះដែរ ក៏មានជនឆ្លៀតឱកាសមួយចំនួនបានយករូបភាពរបស់លោកតារិទ្ធ សារី ទៅបង្ហោះផ្សព្វផ្សាយក្នុងគោលបំណងទាញយកផល ប្រយោជន៍ផ្ទាល់ខ្លួនផងដែរ។

ក្រោយពីឃើញមានសកម្មភាពមិនល្អបែបនេះតារាជើងចាស់លោកតារិទ្ធ សារី បានចេញមុខដោយអំពាវនាវស្នើឲ្យបញ្ឈប់រាល់សកម្មភាពដែលយករូបភាពគាត់ទៅបង្ហោះដើម្បីផលប្រយោជន៍ផ្ទាល់ខ្លួន។

តាមរយៈការបង្ហោះនៅលើគណនីហ្វេសប៊ុកលោក ជា សំនៀង ដែលជាតារាសម្តែងជើងចាស់ដែរនោះបានរៀបរាប់ថា ខ្ញុំបាទ ឈ្មោះជា សំនៀងសូមប្រកាសបដិសេធមិនទទួលខុសត្រូវចំពោះfacebook account ទាំងអស់នេះ ដែលបានផ្សព្វផ្សាយរកជំនួយជូនលោកតា រិទ្ធ សារី ដោយគ្មានការអនុញ្ញាតពីសាមីខ្លួនគាត់។ សូមម្ចាស់អាខោនទាំងអស់នេះបញ្ឈប់ការផ្សព្វផ្សាយជាបន្ទាន់។

លោកបន្តថា តំណាងឲ្យលោកតាសិល្បករជើង ចាស់ រិទ្ធ សារី ហៅ ឈុនទីវ សូមធ្វើការបដិសេធចំពោះអាខោនហ្វេសបុកទាំងនេះនិងឈ្មោះ ផេក អារម្មណ៍ដែលបានផុសស្វែងរកសប្បុរសជនដោយគ្មានការអនុញ្ញាតពីសាមីម្ចាស់ខ្លួនលោកតា រិទ្ធសារីដោយដាក់អាខោនABA ផ្ទាល់ខ្លួន។

សូមសំណូមពរឲ្យឈ្មោះហ្វេស ប៊ុក ហ៊ុយ ស្រីហួច ទាំង២អាខោន និងផេក ឈ្មោះ អារម្មណ៍ លុបចេញជាបន្ទាន់នូវការផុសស្វែងរកជំនួយចំពោះលោក តា រិទ្ធ សារី។

លោក ជា សំនៀង បានបញ្ជាក់ថា ខ្ញុំបាទសូមជម្រាបជូនសាធារណជនឲ្យបានជ្រាបថា ការស្វែងរកជំនួយជូនលោកតា រិទ្ធ សារី បានបិទបញ្ចប់ហើយក្រោយពីសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាលោកមានសេចក្តីសណ្តោសផ្តល់ថវិកាជូនលោក តារិទ្ធសារី ចំនួន១០០០០ដុល្លារ។ ខ្ញុំបាទសូមគោរពថ្លែង អំណរគុណនឹងសូមគោរពជូនពរសម្តេចតេជោនឹងសម្តេចកិត្តិព្រឹទ្ធបណ្ឌិតព្រមទាំងបុត្រា បុត្រី ចៅប្រុសចៅស្រីសូមបានជួបប្រទះនូវពុទ្ធពរបួនប្រការគឺ អាយុ វណ្ណ: សុខ: ពល: កុំបីឃ្លៀងឃ្លាតឡើយ។ សូមអរព្រះគុណនិងសូមអរគុណ៕

ដោយ ៖ ចាន់រ៉ា