ក្រុមចម្រៀង BTS ប្រកាសបំបែកគ្នា

ក្រុម​ចម្រៀង​ប្រុស K-Pop ដែល​ទទួល​បាន​ជោគជ័យ​​យ៉ាងខ្លាំងក្លាទូទាំងពិភពលោក BTS ប្រកាសបំបែកគ្នាមួយរយៈ ខណៈសមាជិកម្នាក់ៗសន្យានឹងត្រឡប់មករួមក្រុមគ្នាវិញ នៅពេលណាមួយខាងមុខនេះ។

ក្រុមតន្រ្តីកូរ៉េខាងត្បូងដ៏ល្បី BTS បានចែករំលែកថា ពួកគេកំពុងស្ថិតក្នុងការសម្រាកច្រៀងនិងសម្ដែងរួមគ្នាជាបណ្តោះអាសន្នសិន ដើម្បីស្វែងរកអាជីពទោលវិញ។ ដំណឹងនេះបានកើតឡើងក្នុងអំឡុងអាហារពេលល្ងាច FESTA ប្រចាំឆ្នាំ ពេលពួកគេកំពុងប្រារព្ធខួប ៩ឆ្នាំដែលបានរួមក្រុមតន្រ្តីជាមួយគ្នា។

BTS គឺ​ជា​ក្រុម​ចម្រៀង​ប្រុស​កូរ៉េ​ខាង​ត្បូង​ដែល​ត្រូវ​បាន​បង្កើត​ឡើង​ក្នុង​ឆ្នាំ ២០១០ និង​បាន​បង្ហាញ​ខ្លួន​ដំបូង​ក្នុង​ឆ្នាំ ២០១៣។

គួររំលឹកថា វាមិនមែនជាលើកទីមួយទេដែលពួកគេប្រកាសសម្រាកបែបនេះ។ កាលពីខែធ្នូ ឆ្នាំ២០២១ កន្លងទៅ ពួកគេធ្លាប់និយាយថា ពួកគេត្រូវការពេលវេលាសម្រាកខ្លះ ដើម្បីបញ្ចូលថាមពលឡើងវិញ ខណៈកាលពី​ឆ្នាំ ២០១៩ ក្រុម BTS ក៏ធ្លាប់ផ្អាកការងារជាក្រុមមួយរយៈផងដែរ។

ទោះយ៉ាងណា ក្រុមនេះនឹងមិនបំបែកគ្នាជារៀងរហូតនោះទេ ដោយពួកគេសន្យាថានឹងត្រឡប់មកធ្វើការជួបជុំរួមក្រុមនឹងគ្នាម្ដងទៀតនៅថ្ងៃណាមួយ៕

ប្រែសម្រួល៖ សន្យា

ប្រភព៖ Daily Mail

ចុចអាន៖ ក្រោយរងការរិះគន់យ៉ាងចាស់ដៃ Mario បង្ហោះឃ្លិបសុំទោស Lisa ភ្លាមៗ