តារាចម្រៀង Shakira ពាក់ព័ន្ធសំណុំរឿងបន្លំពន្ធនៅប្រទេសអេស្ប៉ាញ

ប្រព័ន្ធផ្សព្វផ្សាយ Reuters កាលពីថ្ងៃពុធបានចុះផ្សាយថា តារាចម្រៀងជនជាតិអាមេរិកឡាទីន Shakira បានច្រានចោលដំណោះស្រាយដែលផ្តល់ដោយរដ្ឋអាជ្ញា ក្នុងសំណុំរឿងក្លែងបន្លំពន្ធនៅប្រទេសអេស្ប៉ាញចំនួន ១៤.៥ លានអឺរ៉ូ (១៤.៦លានដុល្លារ) ខណៈពេលនេះ នាងជិតឡើងតុលាការដើម្បីកាត់ក្តីហើយ។

សេចក្តីថ្លែងការណ៍មួយនិយាយថា តារាចម្រៀងដើមកំណើតកូឡុំប៊ីរូបនេះ តែងតែបំពេញកាតព្វកិច្ចបង់ពន្ធទាំងអស់ ក្រោយទទួលចំណូលពីការលក់អាល់ប៊ុមរបស់ខ្លួន។ ដូច្នេះការចោទប្រកាន់ពីរដ្ឋអាជ្ញាអេស្ប៉ាញពេលនេះ ​ត្រូវបាន​ Shakira ចាត់ទុកជា​ការ​រំលោភ​សិទ្ធិ​របស់​នាង​ទាំងស្រុង។

Shakira អះអាងថា នាងមានទំនុកចិត្តពេញទំហឹងចំពោះភាពគ្មានកំហុសរបស់ខ្លួន ដូច្នេះនាងមិនទទួលយកដំណោះស្រាយ ដោយការបង់ពន្ធនោះទេ។

ចំពោះករណីនេះ ខាងការិយាល័យ​រដ្ឋអាជ្ញា​នៅ Barcelona មិន​បាន​ឆ្លើយ​តប​ជាមួយអ្នកសារព័ត៌មានទៅនឹង​សំណើ​សុំ​ការ​អត្ថាធិប្បាយឡើយ។

គួរបញ្ជាក់ថា Shakira ត្រូវបានចោទប្រកាន់ពីបទខកខានមិនបានបង់ពន្ធចំនួន ១៤.៥លានអឺរ៉ូ ក្នុងប្រាក់ចំណូលពន្ធរវាងឆ្នាំ ២០១២ និង ២០១៤។ អំឡុងពេលនេះជារយៈពេលដែលអ្នកតំណាងរបស់ Shakira និយាយថា នាងមិនបានរស់នៅក្នុងប្រទេសអេស្ប៉ាញនោះទេ៕

ប្រែសម្រួល៖ សន្យា

ចុចអាន៖ Amber នៅតែមិនសុខចិត្ត​លើសេចក្តី​សម្រេចរបស់តុលាការ​ ​ពេលនេះកំពុងបន្តប្ដឹងទៅឧទ្ធរណ៍

ចុចអាន៖ Jennifer Lopez អាក្រាតកាយជាថ្មី អបអរខួបកំណើត ៥៣ឆ្នាំ