ជនរងគ្រោះក្នុងឧបទ្ទវហេតុធ្លាក់ LED អាចទទួលបានសំណង ៥លានដុល្លារ

ក្រោយពីនាយកផលិតកម្មរបស់ក្រុមចម្រៀងបុរសហុងកុង Mirror ប្រកាសផ្ដល់ប្រាក់ឧបត្ថម្ភជាង ១លានដុល្លារដល់ជនរងគ្រោះក្នុងឧបទ្ទវហេតុធ្លាក់អេក្រង់ LED មេធាវីជំនាញម្នាក់ ចេញមុខមកនិយាយថា ប្រាក់សំណងគួរទទួលបានច្រើនជាងនេះ ដែលយ៉ាងហោចណាស់ក៏ ៥លានដុល្លារអាមេរិកដែរ។

ស្របពេលដែលមហាសេដ្ឋី Richard Li Tzar Kai ប្រធានក្រុមហ៊ុនផលិតកម្មដែលគ្រប់គ្រងលើក្រុម Mirror កាលពីថ្ងៃចន្ទ ទី១២ ខែកញ្ញា បានសន្យាថានឹងបរិច្ចាគ ១០លានដុល្លារហុងកុង (ប្រហែល ១.២៧លានដុល្លារអាមេរិក) ដល់ Mo Li Kai Yin និងគ្រួសារ អ្នកជំនាញផ្នែកច្បាប់បានធ្វើការវាយតម្លៃលើប្រាក់សំណងដែលជនរងគ្រោះគួរទទួលបាន ហើយថាប្រាក់នេះមិនសមាមាត្រនឹងចំណូលរបស់ជនរងគ្រោះឡើយ ព្រោះគេកំពុងប្រឈមនឹងពិការភាពអស់មួយជីវិត។

ជាមួយគ្នានោះ បន្ទាប់ពីមហាសេដ្ឋី Richard Li Tzar Kai ប្រកាសផ្ដល់ប្រាក់ឧបត្ថម្ភ ប៉ុន្មានម៉ោងក្រោយមក លោក Derek Li ជាឪពុកជនរងគ្រោះ បានច្រានចោលមិនទទួលយកការបរិច្ចាគណាមួយឡើយ រហូតទាល់តែក្រុមការងារបញ្ចប់ការស៊ើបអង្កេតរបស់ខ្លួនសិន។ គាត់និយាយថា កូនប្រុសរបស់គាត់អាចទទួលបានប្រាក់សំណងយ៉ាងហោចណាស់ ៣០លានដុល្លារហុងកុង (ប្រហែល ៥លានដុល្លារអាមេរិក) ។ គាត់បន្ថែមថា Mo Li នៅក្មេងនៅឡើយ ដូច្នេះប្រាក់សំណង គួរគិតដល់ចំណូលដែលគេទទួលបានក្នុងរយៈពេល ៣៥ឆ្នាំខាងមុខ ទើបសក្តិសម។

ចំពោះបញ្ហានេះ ​នៅមិនទាន់មានសេចក្ដីសម្រេចពីតុលាការនៅឡើយទេ ព្រោះថារឿងក្ដីកំពុងស្ថិតក្នុងការស៊ើបអង្កេត៕

ប្រែសម្រួល៖ សន្យា

ចុចអាន៖ ជនរងគ្រោះក្នុងហេតុការណ៍ធ្លាក់អេក្រង់ LED អាចពិការអស់មួយជីវិត

ចុចអាន៖ តារាប្រុសចិន Li Yifeng ត្រូវប៉ូលិសចាប់ឃុំ ពីបទពេស្យាចារ