តារាប្រុសចិន Li Yifeng ត្រូវប៉ូលិសចាប់ឃុំ ពីបទពេស្យាចារ

យោងតាមទូរទស្សន៍រដ្ឋ CCTV បានរាយការណ៍កាលពីថ្ងៃអាទិត្យ ទី១១ ខែកញ្ញា ថា តារាសម្ដែងចិន Li Yifeng ដែលដើរតួជាលោក ម៉ៅ សេទុង ក្នុងរឿង “The Pioneer” កាលពីឆ្នាំមុន ត្រូវបានប៉ូលិសក្រុងប៉េកាំងឃាត់ខ្លួន ដោយចោទប្រកាន់ពីបទពេស្យាចារ។

នៅក្នុងសេចក្តីថ្លែងការណ៍របស់ប្រព័ន្ធផ្សព្វផ្សាយសង្គម ប៉ូលិសក្រុងប៉េកាំងបាននិយាយថា តារាសម្តែងប្រុស Li Yifeng អាយុ ៣៨ឆ្នាំ ត្រូវបានចាប់ឃុំខ្លួន លើបទចោទ​ស្វែងរកការកម្សាន្តផ្លូវភេទជាមួយស្ត្រីពេស្យាជាច្រើន​ដង​។ ទោះយ៉ាងណា ព័ត៌មានលម្អិតផ្សេងទៀតអំពីរឿងអាស្រូវនេះ ប៉ូលិសមិនបានបញ្ជាក់ឡើយ។

ក្រោយព័ត៌មានអាស្រូវបែកធ្លាយ ​ម៉ាកយីហោល្បីៗដូចជា ប្រេនអ៊ីតាលី Prada, ក្រុមហ៊ុនថ្នាំដុសធ្មេញ Sensodyne និងក្រុមហ៊ុនឱសថបុរាណចិន King To Nin Jiom បានបញ្ចប់កុងត្រាជាមួយតារារូបនេះភ្លាមៗ។

គួរបញ្ជាក់ថា ​ការស្វែងរកសេវាផ្លូវ​ភេទពេស្យាចារក្នុងចំណោមតារាចិន ​គឺជាអំពើ​ខុស​ច្បាប់​ ព្រោះរដ្ឋាភិបាលចាត់ទុកអំពើនេះជាការបំពុលសង្គមយ៉ាងធ្ងន់ធ្ងរ ហើយអាជ្ញាធរវប្បធម៌របស់ទីក្រុងប៉េកាំង បានបញ្ជាឱ្យវិស័យកម្សាន្តចិន ហាមឃាត់តារាសម្តែងទាំងអស់ បើតារារូបណាបំពានច្បាប់ ពួកគេត្រូវជាប់ឃុំក្នុងរយៈពេលខ្លី ដែល​ជា​ទូទៅជនជាប់ចោទ នឹងត្រូវចាប់ឃុំ​ខ្លួន​ផ្នែក​រដ្ឋបាល​ចន្លោះ​ពី ១០-១៥ ថ្ងៃ។ យ៉ាងណាមិញ ទោសទណ្ឌអាចត្រូវបានកាត់បន្ថយមកត្រឹម ៥ថ្ងៃ ឬតិចជាងនេះ ប្រសិនបើបទល្មើសមានលក្ខណៈតូចតាច៕

ប្រែសម្រួល៖ សន្យា

ចុចអាន៖ ជនរងគ្រោះក្នុងហេតុការណ៍ធ្លាក់អេក្រង់ LED អាចពិការអស់មួយជីវិត

ចុចអាន៖ រឿងពីរយ៉ាងគត់ ចៀវៃ ទម្លាប់អនុវត្តជាប្រចាំ ដើម្បីរក្សាសម្រស់ឱ្យក្មេងជាងវ័យ