លេចដំណឹងថា មកុដបវរកញ្ញាចក្រវាលជំនាន់ថ្មី នឹងត្រូវប្រគល់ឱ្យម្ចាស់ស្ថាប័នជាអ្នកផ្ទេរ

មហាជនគាំទ្រវិស័យសម្រស់កំពុងផ្ទុះការវែកញែកពេញបណ្ដាញសង្គម ក្រោយធ្លាយដំណឹងថា ការផ្ទេរមកុដសម្រាប់ម្ចាស់ជយលាភីជំនាន់ថ្មី នឹងមិនធ្វើឡើងដោយបវរកញ្ញា Harnaaz Sandhu ដែលជាម្ចាស់មកុដឆ្នាំចាស់ឡើយ ផ្ទុយទៅវិញនឹងជំនួសដោយម្ចាស់ស្ថាប័ន Miss Universe ផ្ទាល់តែម្ដងគឺសេដ្ឋីនី Anne Jakrajutatip។

ប្រិយមិត្តតាមដានវិស័យសម្រស់ ច្បាស់ជាជ្រាបហើយ កម្មវិធីបវរកញ្ញាចក្រវាល ឆ្នាំ២០២២ គឺជារដូវកាលដំបូងនៃការប្រឡងសម្រស់សម្រាប់សេដ្ឋីស្រីថៃ Anne Jakrajutatip ក្រោយពេលនាងទិញយកស្ថា​ប័ននេះ កាលពីខែមុន។ បន្ទាប់ពីឡើងតំណេងជាម្ចាស់ភ្លាម Anne ផ្លាស់ប្តូរលក្ខខណ្ឌកម្មវិធីមួយចំនួន  រួមទាំងការផ្ទេរមកុដផងដែរ ដែលរឿងនេះនាំឱ្យអ្នកគាំទ្រមិនពេញចិត្តប៉ុន្មាននោះទេ។

បច្ចុប្បន្ន ដំណឹងអំពីការផ្ទេរមកុដកំពុង​បង្ក​ជម្លោះ​យ៉ាង​ខ្លាំង​នៅ​លើ​វេទិកា​សម្រស់​អន្តរជាតិ ដោយសារតែទស្សនិកកម្មវិធី Miss Universe រកមិនឃើញមូលហេតុសមរម្យដែលត្រូវឱ្យបវរកញ្ញា Harnaaz Sandhu គ្មានវត្តមាននៅពេលផ្ទេរមកុដ ហើយអ្នកគាំទ្រ​សម្រស់​ជាច្រើនកំពុង​មិន​យល់ស្រប​យ៉ាងខ្លាំងចំពោះលក្ខខណ្ឌនេះ។

ពេលនេះ ម្ចាស់ស្ថាប័នថ្មី មិនទាន់ចេញមុខបកស្រាយនៅឡើយ៕

ប្រែសម្រួល៖ សន្យា

ចុចអាន៖ ក​ម្មវិធីប្រកួតបវរកញ្ញាចក្រវាល ២០២២ នឹងផ្លាស់ប្ដូរលក្ខខណ្ឌមួយចំនួន ក្រោយម្ចាស់ថ្មីឡើងកាន់តំណែង