ទម្លាប់ពេលព្រឹក បង្កើតលទ្ធផលវិជ្ជមាន ពីបុគ្គលល្បីៗ​ ៧រូប មនុស្សភាគច្រើនមិនសូវអនុវត្ត

ការអនុវត្តទម្លាប់ពេលព្រឹកល្អៗ នឹងជួយរុញច្រានឱ្យអាជីព និងជីវិតផ្ទាល់ខ្លួនមានឱកាសទទួលជោគជ័យខ្ពស់ ព្រមទាំងជួយសុខភាពឱ្យរឹងមាំផងដែរ។ ប៉ុន្តែជាទូទៅ ទម្លាប់ល្អៗទាំងនោះ មិនមានមនុស្សច្រើនទេបានយកមកអនុវត្ត ផ្ទុយពីបុគ្គលល្បីៗលើលោកចំនួន ៧រូប ដែលធ្លាប់ទទួលជោគជ័យយ៉ាងត្រចះត្រចង់ បានធ្វើវាជារៀងរាល់ព្រឹក។ ពួកគេទាំងនោះរួមមាន៖

១. តារាសម្ដែង Jennifer Aniston ទម្លាប់ក្រោកពីព្រហាម

តារាសម្ដែងរៀមច្បង Jennifer Aniston តែងតែក្រោកពីដំណេកនៅម៉ោង ៤:៣០ព្រឹក ដោយធ្វើកិច្ចការពេលព្រឹកយ៉ាងរហ័សដូចជា​លុបលាងមុខ​ ផឹក​ទឹក​ក្តៅ​ជាមួយ​ក្រូចឆ្មា និងធ្វើ​សមាធិ​រយៈពេល ២០នាទី ។

២. អ្នកនិពន្ធ Oprah Winfrey ទម្លាប់សមាធិ

Oprah ចាប់ផ្តើមរាល់ព្រឹកជាមួយនឹងការធ្វើសមាធិរយៈពេល ២០នាទី រួមទាំងថ្ងៃឈប់សម្រាក និងចុងសប្តាហ៍។ សមាធិ​អាចជួយឱ្យអារម្មណ៍​ស្កប់ស្កល់ និងបង្កើន​ភាព​រីករាយ​។

៣. តារាទូរទស្សន៍ Lea Michele ទម្លាប់សូណា

រៀងរាល់ព្រឹក បន្ទាប់ពីញ៉ាំកាហ្វេមួយកែវភ្លាម Lea Michele ទៅសូណា។ ទម្លាប់​នេះ​ជួយ​ឱ្យ​នាង​បញ្ចេញ​ជាតិពុល និង​បញ្ចេញ​ញើស​ចេញពី​រាងកាយបានយ៉ាងច្រើន​។

៤. តារាសម្ដែង Jessica Alba ទម្លាប់ហាត់ប្រាណជាមួយមិត្តភក្តិ

Jessica សារភាពថា នាងមិនចូលចិត្តហាត់ប្រាណទាល់តែសោះ។ ទោះបីជាយ៉ាងណាក៏ដោយ នាងនៅតែទៅកន្លែងហាត់ប្រាណជាមួយមិត្តភក្តិ ដើម្បីពង្រឹងសុខភាព និងបំបាត់ភាពតានតឹង។ មិត្តភក្តិរបស់នាងតែងតែលើកទឹកចិត្តនាងឱ្យចូលរៀនយូហ្គា ឬជិះកង់ រហូតវាបានបង្កើតទម្លាប់នេះឱ្យនាងអនុវត្តជារៀងរាល់ថ្ងៃ។

៥. តារាសម្ដែង Brittany Snow ទម្លាប់ស្តាប់តន្ត្រី

បន្ទាប់​ពី​ញ៉ាំ​អាហារ​ពេល​ព្រឹក Brittany Snow ចាក់​ចម្រៀង​ដែល​នាងចូលចិត្ត​ ដើម្បី​បង្កើន​អារម្មណ៍ស្រស់ស្រាយ​ឱ្យ​នាង។

៦. តារាសម្ដែង Kate Hudson ទម្លាប់ត្រាំមុខជាមួយទឹកកក

ដំបូង Kate រៀបចំចានមួយដោយដាក់ទឹកកកលាយជាមួយទឹក។ បន្ទាប់មកនាងត្រាំមុខ នៅក្នុងចានឱ្យបានយូរតាមដែលអាចធ្វើបាន។ ទម្លាប់​នេះ​ជួយ​ឱ្យ​អារម្មណ៍​របស់​នាង​ស្វាងឡើង និង​ធ្វើ​ឱ្យ​ស្បែក​មុខ​របស់​នាង​កាន់តែ​ទន់ល្មើយ។

៧. សេដ្ឋីបច្ចេកវិទ្យា Steve Jobs តែងរំលឹកខ្លួនឯងពីសុបិនរាល់ព្រឹក

ថ្លែងនៅក្នុងសុន្ទរកថាមួយនៅ Stanford លោក Steve Jobs ធ្លាប់និយាយថា រាល់ព្រឹកលោកតែងតែឆ្លុះកញ្ចក់ ហើយសួរខ្លួនឯងនូវសំណួរមួយថា “ប្រសិនបើថ្ងៃនេះជាថ្ងៃចុងក្រោយនៃជីវិតរបស់ខ្ញុំ តើខ្ញុំចង់ធ្វើអ្វីនៅថ្ងៃនេះ?” ។ សំណួរមួយនេះ ជួយជម្រុញទឹកចិត្តលោកឱ្យខំធ្វើការ និងព្យាយាមសម្រេចក្ដីសុបិនរបស់ខ្លួនឱ្យក្លាយជាការពិត៕

ប្រែសម្រួល៖ សន្យា

ចុចអាន៖ ជឿអត់ថាមនុស្សឆ្លាត ច្រើនធ្វើទម្លាប់មិនល្អទាំង ១២ នេះ?