ជីវិតកម្សាន្ដ

បាត់មុខមួយរយៈធំ! សូ លីដូ លេចមុខច្រៀងបទ«មនុស្សពិបាកចិត្តជាងគេក្នុងលោកនេះ» នៅតែពីរោះ

បានផុស

៣ years មុន

នៅ

ថ្ងៃចន្ទ ៣ កក្កដា ២០២៣

ដោយ

លោក សូ លីដូ ជាតារាចម្រៀងល្បីឈ្មោះគួរសមនាអំឡុងឆ្នាំ ២០០៧ ជាពិសេសគេនៅចាំបានថា បទដែលទទួលបានការគាំទ្រច្រើនជាងគេ ខណៈពេលលោកបោះជំហានចូលសិល្បៈដំបូង គឺបទ«មនុស្សពិបាកចិត្តជាងគេក្នុងលោកនេះ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក្ដីបន្ទាប់ពីសាងប្រជាប្រិយភាព និងកេរ្តិ៍ឈ្មោះល្បីល្បាញមួយសន្ទុះធំ ស្រាប់តែអំឡុងពេលក្រោយមក លោក សូ លីដូ ក៏បានបាត់មុខពីវិថីសិល្បៈអស់រយៈកាលជាច្រើនឆ្នាំ ខណៈកាលនោះលេចឮព័ត៌មានថា លោកសម្រាកសិល្បៈ ដើម្បីយកពេលបើកមុខជំនួញផ្ទាល់ខ្លួន។ ចំណែកខ្លះទៀតសង្ស័យថា លោក សូ លីដូ អាចចេញទៅរស់នៅក្រៅប្រទេស។

ចំណែកនាពេលថ្មីៗនេះ ក៏ស្រាប់តែមានដំណឹង និងព័ត៌មានចុងក្រោយថា លោក សូ លីដូ មានចេតនាវិលចូលក្នុងវិថីសិល្បៈជាថ្មីឡើងវិញ បន្ទាប់ពីអវត្តមានមួយរយៈធំ ធ្វើឲ្យអ្នកគាំទ្រនឹករលឹកគ្រប់គ្នា។ ទន្ទឹមគ្នា នៃការបង្ហាញតម្រុយចូលវិស័យចម្រៀងនេះដែរ លោក សូ លីដូ មុននេះ បានបង្ហាញខ្លួនតាមរយៈការច្រៀងបទ«មនុស្សពិបាកចិត្តជាងគេក្នុងលោកនេះ» ខណៈទឹកដមសំឡេងនៅតែពីរោះជាប់ចិត្តមហាជន។

ជាក់ស្ដែងមានការបង្ហោះនៅលើបណ្ដាញសង្គម Tik Tok មួយ កាលពីថ្មីៗ ដោយបង្ហាញពីសកម្មភាពច្រៀងរបស់លោក សូ លីដូ អមជាមួយខ្លឹមសារខ្លីថា «តារាចម្រៀងដែលបាត់មុខមួយរយៈធំ សូ លីដូ នៅក្មេងជាងមុន សង្ហាជាងមុនទៀត នៅតែពីរោះ។ សូមបញ្ជាក់ដែរថា លោក សូ លីដូ មានស្រុកកំណើតនៅភូមិតាកឹម ឃុំតាភេម ស្រុកត្រាំកក់ ខេត្តតាកែវ»។

លោក សូ លីដូ បានប្រឡូកក្នុងអាជីពជាអ្នកចម្រៀងនៅតាមភោជនីយដ្ឋាន និងបៀរហ្គាឌិនបាន ៥ ឆ្នាំ។ បណ្ដាស្ថានីយទូរទស្សន៍នានាចាប់អារម្មណ៍អញ្ជើញលោក សូ លីដូ ឡើងច្រៀងជារឿយៗ មិនតែប៉ុណ្ណោះ ផលិតកម្មសាន់ដេ ទាក់ទងលោកឲ្យចូលច្រៀងដោយចុះកិច្ចសន្យារយៈពេល ៣ ឆ្នាំ កាលពីឆ្នាំ ២០០៦។ នៅផលិតកម្មសាន់ដេ លោកច្រៀងបានប្រមាណ ៥០ បទ៕

អត្ថបទ ៖ ចាន់រ៉ា