ជីវិតកម្សាន្ដ

អេង វ៉ាណង បន្តចាក់គីមីលើកទី ៤ ប្រឆាំងជំងឺមហារីកដំណាក់កាលទី ៣

បានផុស

៣ years មុន

នៅ

ថ្ងៃសៅរ៍ ១២ សីហា ២០២៣

ដោយ

ដូចប្រិយមិត្តបានដឹងហើយថា តារាសម្ដែងអ្នកនាង អេង វ៉ាណង បច្ចុប្បន្នកំពុងតែធ្លាក់ខ្លួនឈឺដោយសារជំងឺមហារីកដំណាក់កាលទី ៣ មិនទាន់ធូរស្រាលដូចដើមនៅឡើយទេ ពោលនៅតែជាក្តីព្រួយបារម្ភសម្រាប់អ្នកគាំទ្រ និងមិត្តភ័ក្ដិនៅក្នុងរង្វង់សិល្បៈ។

ស្របពេលជាមួយគ្នានេះ ក្រៅតែពីក្តីរន្ធត់ និងអាណិតអាសូរចំពោះអ្នកនាង អេង វ៉ាណង ក៏មានអ្នកសិល្បៈមួយចំនួនទៀតបានឧបត្ថម្ភថវិកាជួយសង្គ្រោះជីវិត ព្រមទាំងជូនពរឲ្យតារារូបនេះ ឆាប់ជាសះស្បើយពីជំងឺគ្រប់គ្នា។

យ៉ាងណាមិញបើតាមការបញ្ជាក់ឲ្យដឹងពីអ្នកនាង អេង វ៉ាណង បាននិយាយថា នាងបានបន្តចាក់គីមីលើកទី ៤ ដើម្បីព្យាបាលជំងឺមហារីកដំណាក់កាលទី ៣ តាមការណាត់របស់ក្រុមគ្រូពេទ្យរួចហើយ។

តារាសម្ដែង អេង វ៉ាណង បាននិយាយថា «ដល់ថ្ងៃគ្រូពេទ្យណាត់មកចាក់គីមីលើកទី ៤ ហើយ ពេលចាក់ម្តងៗ គឺធ្វើទុក្ខខ្លាំងណាស់បងប្អូន»។ អេង វ៉ាណង បានអរគុណផងដែរចំពោះអ្នកគាំទ្រ និងសប្បុរសជនទាំងអស់ ដែលផ្ដល់កម្លាំងចិត្ត ក៏ដូចជាថវិកា ដើម្បីជួយសម្រាលដល់នាងក្នុងការបានមកព្យាបាលសង្គ្រោះជីវិត។

សូមជម្រាបថា កន្លងមកអ្នកគាំទ្រ និងមិត្តភ័ក្ដិក្នុងចង្កោមសិល្បៈមានការភ្ញាក់ផ្អើល ហើយបង្ហាញក្តីបារម្ភស្ទើរគ្រប់គ្នា បន្ទាប់ពីតារាសម្ដែងអ្នកនាង អេង វ៉ាណង បានទម្លាយថា បច្ចុប្បន្នអ្នកនាងកំពុងធ្លាក់ខ្លួនឈឺជំងឺដ៏កាចសាហាវ គឺ ជំងឺមហារីក ដែលបាននិងកំពុងញាំញីរាងកាយយ៉ាងពិបាកខ្លាំង។

ក្នុងការទម្លាយពីស្ថានភាពជំងឺធ្ងន់ធ្ងរនេះ អេង វ៉ាណង បានបញ្ជាក់ដែរថា នាងអស់លទ្ធភាពក្នុងការព្យាបាលទៀតហើយ ខណៈស្ថានភាពជំងឺបានធ្វើទុក្ខខ្លាំងលើរាងកាយ៕

អត្ថបទ ៖ ចាន់រ៉ា