តើត្រូវញ៉ាំអ្វី ដើម្បីចៀសពីជំងឺមហារីក?

មនុស្សគួរតែផ្តល់អាទិភាពដល់អាហារដែលសម្បូរទៅដោយជាតិសរសៃ សារធាតុប្រឆាំងអុកស៊ីតកម្ម និងលក្ខណៈសម្បត្តិប្រឆាំងនឹងការរលាក ដើម្បីជួយកាត់បន្ថយហានិភ័យនៃជំងឺមហារីក។

អាហារមិនត្រឹមតែជាប្រភពថាមពលប៉ុណ្ណោះទេ ប៉ុន្តែវាក៏ជាអាវុធ ដើម្បីការពាររាងកាយប្រឆាំងនឹងជំងឺផងដែរ។ យោងតាមលោកវេជ្ជបណ្ឌិត Sunitha N អ្នកជំនាញអាហារូបត្ថម្ភនៅមន្ទីរពេទ្យ Vasavi ប្រទេសឥណ្ឌា អាហារដែលសម្បូរទៅដោយសារធាតុប្រឆាំងអុកស៊ីតកម្ម និងលក្ខណៈសម្បត្តិប្រឆាំងនឹងការរលាក ដើរតួនាទីយ៉ាងសំខាន់ក្នុងការការពារកោសិកាមហារីក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលរំលាយអាហារ រាងកាយផលិតរ៉ាឌីកាល់សេរីដែលអាចបំផ្លាញ DNA។ សារធាតុប្រឆាំងអុកស៊ីតកម្មពីផ្លែឈើស្រស់ៗ បន្លែ រមៀត និងខ្ទឹមស មានសមត្ថភាពបន្សាបរ៉ាឌីកាល់សេរីទាំងនេះ ដោយកាត់បន្ថយការខូចខាតកោសិកា និងការរលាក។

លោកវេជ្ជបណ្ឌិត Sunitha N ជឿជាក់ថា របបអាហារសមហេតុផលក៏សំខាន់ផងដែរ។ ម៉ឺនុយដែលមានមូលដ្ឋានលើរុក្ខជាតិច្រើនតែមានប្រយោជន៍ដោយសារតែមាតិកាជាតិសរសៃខ្ពស់របស់វា ខណៈពេលដែលសាច់កែច្នៃដូចជាសាច់ក្រកមានផ្ទុកសារធាតុ nitroso ដែលបង្កគ្រោះថ្នាក់ និងជាតិពុលសំណ។

ការរំលងអាហារពេលព្រឹក ឬញ៉ាំយឺតអាចបណ្តាលឲ្យមានបញ្ហារំលាយអាហារ ខណៈពេលដែលរបៀបរស់នៅមិនសូវសកម្មបង្កើនហានិភ័យនៃជំងឺមហារីកវ័យចំណាស់ដូចជាមហារីកក្រពេញប្រូស្តាត និងមហារីកអូវែរ។ មនុស្សចាស់ត្រូវបានណែនាំឲ្យធ្វើលំហាត់ប្រាណស្រាលៗ ឬអនុវត្តការដកដង្ហើម pranayama ជារៀងរាល់ថ្ងៃដើម្បីរក្សាការរំលាយអាហារ។

ក្នុងចំណោមក្រុមអាហារដែលគួរតែត្រូវបានបង្កើន បន្លែប្រភេទ cruciferous ដូចជាផ្កាខាត់ណាខៀវ មានផ្ទុកសមាសធាតុស្ពាន់ធ័រដែលជួយលុបបំបាត់រ៉ាឌីកាល់សេរី។ ខ្ទឹមសសម្បូរទៅដោយអាលីស៊ីន ដែលបង្កើនភាពស៊ាំ និងកាត់បន្ថយការរលាក ហើយការទទួលទានខ្ទឹមសឆៅត្រឹមតែមួយកំពឹសក្នុងមួយថ្ងៃក៏នាំមកនូវអត្ថប្រយោជន៍ជាច្រើនផងដែរ។

ប៉េងប៉ោះមានផ្ទុកសារធាតុ lycopene ច្រើន ដែលជាសារធាតុប្រឆាំងអុកស៊ីតកម្មដែលខ្លាំងជាងនៅពេលចម្អិន។ ទោះជាយ៉ាងណាក៏ដោយ អ្នកជំនាញណែនាំកុំឱ្យញ៉ាំគ្រាប់ប៉េងប៉ោះជាមួយស្ពៃខ្មៅជាប្រចាំ ព្រោះវាអាចបណ្តាលឲ្យកើតគ្រួសក្នុងតម្រងនោមបានយ៉ាងងាយស្រួល។

សណ្តែកជួយកាត់បន្ថយហានិភ័យនៃជំងឺមហារីកពោះវៀនធំ ហើយផ្លែក្រូចឆ្មារសម្បូរទៅដោយវីតាមីន C ដែលជួយស្រូបយកជាតិដែក និងបង្កើនភាពធន់។ លោកវេជ្ជបណ្ឌិត Sunitha ណែនាំឲ្យប្រើប្រេងល្ង អូលីវ និងសណ្តែកដីជំនួសឱ្យប្រេងឧស្សាហកម្ម ដើម្បីការពារប្រព័ន្ធសរសៃឈាមបេះដូង។

រមៀតក៏ជាអាហារដ៏អស្ចារ្យ ដោយសារតែសារធាតុ curcumin ប្រឆាំងនឹងការរលាករបស់វា។ ការផឹកទឹកដោះគោក្តៅឧណ្ហៗលាយជាមួយរមៀត ១/៤ ស្លាបព្រាកាហ្វេ និងម្រេចបន្តិចជារៀងរាល់ថ្ងៃជួយជំរុញភាពស៊ាំ។ អាហារដែលមានតុល្យភាពគួរតែរួមបញ្ចូលអាហារដែលសម្បូរជាតិសរសៃ ទឹកដោះគោជូរដើម្បីជួយរំលាយអាហារ និងផ្លែឈើដូចជាផ្លែល្ហុង និងផ្លែប៉ោមដើម្បីបំពេញបន្ថែមវីតាមីន។

លើសពីនេះ ការរក្សាទម្ងន់គឺជាកត្តាមួយដែលមិនអាចមើលរំលងបាន។ ភាពធាត់បង្កើនសម្ពាធលើសរីរាង្គខាងក្នុង ហើយការទល់លាមកយូរអាចនាំឱ្យកើតមហារីកពោះវៀនធំបានយ៉ាងងាយ។

លោកស្រីវេជ្ជបណ្ឌិត Sunitha N បានសង្កត់ធ្ងន់ថា ទម្លាប់នៃការញ៉ាំអាហារដែលមានសុខភាពល្អគួរតែត្រូវបានបង្កើតឡើងតាំងពីដំបូង។ សូម្បីតែកុមារតូចៗក៏អាចរៀនញ៉ាំអាហារបានត្រឹមត្រូវដែរ។ អ្វីដែលអ្នកជ្រើសរើសនៅថ្ងៃនេះនឹងកំណត់សុខភាពរបស់អ្នកនៅថ្ងៃស្អែក៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

តើចេកខ្ចី ឬចេកទុំ មានជីវជាតិដូចគ្នាដែរទេ?