តួ លី តាវហួ អន់ចិត្តនឹងអ្នកដឹកនាំរឿង ដែលមិនឱ្យលោកសម្ដែងតួអាក្រក់

ធ្លាប់មានបទពិសោធន៍សម្ដែងជាច្រើនឆ្នាំ និងរាប់សិបរឿងទៅហើយ នៅក្នុងជាអាជីពជាតារាសម្ដែង ប៉ុន្តែទស្សនិកជនពិតជាកម្របានទស្សនាភាពយន្តដែលតួ លី តាវហួ (Andy Lau) ដើរតួចិត្តអាក្រក់ណាស់ ហើយថ្មីៗនេះលោកបានចេញមុខលាតត្រដាងពីមូលហេតុដល់ប្រិយមិត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសចូលរួមកម្មវិធីបញ្ចាំងភាពយន្តថ្មីរឿង “Operation Moscow” ក្នុងទីក្រុងប៉េកាំង កាលពីពេលថ្មីៗកន្លងទៅ តារាសម្តែងជើងចាស់ Andy Lau បានចែករំលែកអារម្មណ៍ក្រៀមក្រំ និងការអាក់អន់ចិត្តរបស់ខ្លួនចំពោះការខកខានឱកាសមិនបានដើរតួអាក្រក់ នៅក្នុងខ្សែភាពយន្តរបស់លោកកន្លងមក។

កំពូលតារាវ័យ ៦២ឆ្នាំរូបនេះ បាននិយាយថា “គ្មានអ្នកដឹកនាំរឿងណាផ្តល់ឱ្យខ្ញុំនូវតួនាទីជាតួអាក្រក់ឡើយ ខ្ញុំក៏មិនដឹងថាហេតុអ្វីដែរ”។

លោកបានបន្ថែមថា ទោះបីធ្លាប់ដើរតួអាក្រក់ប៉ុន្មានរឿង តែរឿងទាំងនោះឆ្លុះបញ្ចាំងពីតួដែលចេះធ្វើអាក្រក់ដោយសារមូលហេតុផ្សេងៗដែលបង្ខំគេ។ សម្រាប់លោកចង់សម្ដែងជាតួអាក្រក់ផុតលេខ ហើយអាក្រក់ដោយគ្មានមូលហេតុអ្វីទាំងអស់។

កន្លងមក តារាសម្ដែងហុងកុងរូបនេះធ្លាប់បង្ហាញខ្លួនជាតួអាក្រក់ នៅក្នុងរឿង “Infernal Affairs” ឆ្នាំ២០០២ រឿង “Protege” ឆ្នាំ២០០៧ និងរឿង Shaolin ឆ្នាំ២០១១ ប៉ុន្តែតួអង្គទាំងនោះសុទ្ធតែមានហេតុផលគ្រប់គ្រាន់សម្រាប់ការក្លាយជាមនុស្សអាក្រក់។

ដោយឡែកចំពោះភាពយន្ត “Operation Moscow” គឺជាខ្សែភាពយន្តរៀបរាប់អំពីការប្លន់រថភ្លើង Sino-Russia ដ៏ល្បីល្បាញក្នុងទសវត្សរ៍ឆ្នាំ១៩៩០ ខណៈ លី តាវហួ សម្ដែងជាប្រធានក្រុមឧក្រិដ្ឋកម្មដែលរៀបចំផែនការប្លន់រថភ្លើង។ យ៉ាងណាមិញ តួនេះជាតួអាក្រក់ប្រភេទណា ទស្សនិកជនមិនទាន់ដឹងនៅឡើយ។

សូមទស្សនា Trailer ភាពយន្តរឿង Operation Moscow ខាងក្រោម!

ប្រែសម្រួល៖ សន្យា

ចុចអាន៖ មិននឹកស្មាន អតីតតួ លី តាវហួ អត់ហូបបាយ ១០ឆ្នាំ ដើម្បីថែរក្សារាង

ចុចអាន៖ Lisa បំបែកកំណត់ត្រាពិភពលោក លើកទី៧