ជីវិតកម្សាន្ដ

តារាភាពយន្តជើងចាស់ គង់ ប៊ុនសុន ជីវិតកាន់តែដុនដាប ខណៈរបរលក់នំមិនសូវដាច់

បានផុស

១ year មុន

នៅ

ថ្ងៃចន្ទ ២៣ តុលា ២០២៣

ដោយ

អតីតតារាភាពយន្តជើងចាស់អ្នកស្រី គង់ ប៊ុនសុន ជីវិតពេលនេះកាន់តែជួបការលំបាកខ្លាំង ខណៈរបរលក់នំនៅតាមចិញ្ចើមផ្លូវមិនសូវលក់ដាច់ ពោលរកបានព្រឹកខ្វះល្ងាច។ យ៉ាងណាមិញ តារាជើងចាស់រូបនេះ នៅតែប្រឹងខំត្រដរលក់នំ ដើម្បីតែចិញ្ចឹមជីវិត ទោះហាលក្តៅ ខ្យល់ ភ្លៀង….។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជារឿយៗ តារាសម្តែងជើងចាស់ គង់ ប៊ុនសុន ត្រូវបានអ្នកធ្វើដំណើរប្រទះឃើញកំពុងអង្គុយលក់នំហាលខ្យល់ ភ្លៀង រងាញ័រខ្លួន ដើម្បីរកប្រាក់ចិញ្ចឹមជីវិត ព្រោះរាល់ថ្ងៃគាត់មានវ័យកាន់តែចាស់ទៅហើយ។ តាមរយៈរូបភាពដែលបានបង្ហោះនៅលើបណ្ដាញសង្គមហ្វេសប៊ុក បង្កការចាប់អារម្មណ៍ និងក្តីអាណិតអាសូរសម្រាប់មហាជនអ្នកគាំទ្រ ពិសេសអ្នកធ្វើដំណើរឆ្លងកាត់។

អ្នកស្រី គង់ ប៊ុនសុន មានប្រសាសន៍ដូច្នេះថា «រាល់ថ្ងៃ គឺ ពេលព្រឹក ខ្ញុំយួរនំលក់នៅក្នុងផ្សារដើមថ្កូវ ពេលថ្ងៃរសៀល ដើរលក់តាមផ្ទះ ពេលម៉ោង ៦ ល្ងាច ខ្ញុំកណ្ដៀតនំទៅលក់នៅតាមដងផ្លូវ ២៧១ ជិតអតីតធនាគារ ANZ ផ្សារដើមថ្កូវ ពេលម៉ោង ១០ យប់ ខ្ញុំកណ្ដៀតនំមកលក់នៅជិតផ្ទះវិញ នៅមុខផ្សារដើមថ្កូវ រហូតដល់រំលងអធ្រាត្រ»។

អ្នកស្រី គង់ ប៊ុនសុន បន្ថែមថា បើមេឃកំពុងភ្លៀង គឺគាត់លក់នំមិនដាច់ទេ ដូច្នេះសូមបងប្អូនជួយទិញនំគាត់ផង។ ចំណែកលេខទូរស័ព្ទ គឺ ០៩៨ ៤៤៤ ៨៥៨ ឬ ABA គាត់ផ្ទាល់ ,០០៣៣៩០១៣៧ (KONG BUN SON)។

គួរជម្រាបថា តារាស្រី អ្នកស្រី គង់ ប៊ុនសុន បានប្រឡូកវិស័យសិល្បៈតាមរយៈអាជីពសម្ដែងតាំងពីឆ្នាំ ២០១២។ ក្រៅពីសម្តែង កន្លងមកអ្នកស្រីក៏ចេះច្រៀង និងបានបង្ហើរសំនៀងបទមរតកដើមជាច្រើនផងដែរ។ អ្នកស្រី គង់ ប៊ុនសុន ជាសិល្បការិនីម្នាក់ ក្នុងចំណោមអ្នកសិល្បៈវ័យជរាមួយចំនួនទៀតដែលកំពុងមានជីវភាពខ្វះខាត និងមានជំងឺប្រចាំកាយ។ ប៉ុន្តែអ្វីដែលអភ័ព្វជាងគេទៀតនោះ គឺពុំមានកូនចៅមានដៃរឹងស្មាមាំជួយជ្រោមជ្រែងនោះទេ ដោយគាត់ត្រូវដើររាល់ថ្ងៃដើម្បីលក់នំតាមផ្លូវ ឬ បាំងឆ័ត្រអង្គុយលក់នំពេលមេឃកំពុងរលឹមជាដើម៕

អត្ថបទ ៖ ចាន់រ៉ា