ជីវិតកម្សាន្ដ

យឿន ពិសី រកបានទ្រនំថ្មីផ្ដល់ភាពកក់ក្ដៅ

បានផុស

២ years មុន

នៅ

ថ្ងៃអង្គារ ១៤ វិច្ឆិកា ២០២៣

ដោយ

ទីបំផុត តារាចម្រៀងលោក យឿន ពិសី បានរកឃើញទ្រនំថ្មីក្នុងផលិតកម្មធំដើម្បីឈរឈ្មោះវិញហើយ បន្ទាប់ពីអវត្តមានក្លាយជាអ្នកចម្រៀងឯករាជ្យក្រៅផលិតកម្មមានរយៈពេលច្រើនឆ្នាំកន្លងមកនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យឿន ពិសី បានបញ្ជាក់ថា បន្ទាប់ពីលោកអវត្តមានក្នុងផលិតកម្មមួយសន្ទុះ ពេលនេះបានរកឃើញទ្រនំផលិតកម្មធំដើម្បីផ្ញើខ្លួនវិញហើយ ពិសេសការចេញបទចម្រៀងបម្រើអារម្មណ៍អ្នកគាំទ្រតាមការទន្ទឹងរង់ចាំ។ យឿន ពិសី និយាយថា លោកពិតជាមានសេចក្ដីរំភើបរីករាយក្នុងជីវិតខ្លាំងណាស់ ដែលបានទទួលនូវឱកាសមួយនេះ។

តារាចម្រៀងរូបនេះ បន្តថា «ខ្ញុំបាទ យឿន ពិសី សុំថ្លែងអំណរអរគុណជាខ្លាំងដល់ផលិតកម្ម Galaxy ដែលបានផ្ដល់ឱកាសជូនដល់រូបខ្ញុំបានចូលរួមរស់ជាមួយក្រុមគ្រួសារដ៏សែនកក់ក្ដៅមួយនេះ ខ្ញុំបាទ សូមគោរពអរគុណ និងដឹងគុណយ៉ាងខ្លាំងដល់អ្នកឧកញ៉ាដែលបានផ្ដល់ឱកាសដ៏មានតម្លៃមួយនេះជូនដល់រូបខ្ញុំ ជាពិសេសខ្ញុំបាទក៏សូមគោរពអរគុណបង ខេង គុយលី ដែលបងតែងតែជួយជ្រោមជ្រែងដល់រូបប្អូន ដែលធ្វើឲ្យប្អូនមានថ្ងៃនេះ»។

ជាមួយគ្នានេះ យឿន ពិសី ក៏គោរពអរគុណ និងដឹងគុណយ៉ាងក្រៃលែងជូនចំពោះអ្នកគាំទ្រទាំងអស់ ដែលបានគាំទ្រ និងស្រឡាញ់ដល់លោកកន្លងមក។

គួរបញ្ជាក់ថា យឿន ពិសី គឺជាបេក្ខជនជ័យលាភីលេខ ១ នៅក្នុងកម្មវិធី Cambodia’s Got Talent រដូវកាលទី ១ ដែលទទួលបានការគាំទ្រច្រើនពីមហាជន។ ហើយកន្លងមក លោក យឿន ពិសី ក៏ជាតារាចម្រៀងជាប់កុងត្រាជាមួយផលិតកម្មហង្សមាសផងដែរ។ ប៉ុន្តែនៅកំឡុងពាក់កណ្ដាលឆ្នាំ ២០២២ ស្រាប់តែ ពិសី ប្រកាសដំណឹងបញ្ចប់កុងត្រាជាមួយក្រុមហ៊ុនហង្សមាស ធ្វើឲ្យអ្នកគាំទ្រភ្ញាក់ផ្អើលគ្រប់គ្នា៕

អត្ថបទ ៖ ចាន់រ៉ា