ជីវិតកម្សាន្ដ

ទស្សនិកជនស្រែកពេញឆាក Miss Universe ក្រោយឃើញសម្រស់បវកញ្ញានេប៉ាល់

បានផុស

១២ នាទី មុន

នៅ

ថ្ងៃសុក្រ ១៧ វិច្ឆិកា ២០២៣

ដោយ

saostar បានរាយការណ៍ថា កាលព្រឹកថ្ងៃទី ១៦ ខែវិច្ឆិកា ការប្រកួតវគ្គពាក់កណ្តាលផ្តាច់ព្រ័ត្របវរកញ្ញាចក្រវាលឆ្នាំ ២០២៣ បានប្រព្រឹត្តទៅនៅប្រទេស El Salvador ជាមួយនឹងការទន្ទឹងរង់ចាំរបស់ទស្សនិកជនសម្រស់ទូទាំងពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះមានបវកញ្ញាជាង៨០ នាក់បានសម្តែងជាពីរផ្នែក គឺការប្រកួតឈុតប៊ីគីនីនិងឈុតពេលល្ងាច។ ក្នុងចំណោមនោះ រាជិនីសម្រស់ដែលគួរឲ្យកត់សម្គាល់បំផុតគឺ ប្រទេសនេប៉ាល់ នាង Jane Dipika Garrett។

នៅលើឆាក បវកញ្ញាតំណាងឲ្យប្រទេសនេប៉ាល់បានស្លៀកឈុតហែលទឹកពណ៌ទឹកប្រាក់មួយឈុតកាត់ត្រង់ដើមទ្រូង អមនឹងម៉ូដសក់រួញ។ Jane Dipika Garrett ដើរដោយទំនុកចិត្ត ចំពេលមានការអបអរសាទររបស់អ្នកទស្សនាទាំងអស់នៅក្នុងសាលប្រជុំ។

ទោះបីជានាងមានរូបរាងមិនស្រឡូនស្អាតដូចបវកញ្ញាដទៃទៀតក៏ពិតមែន ប៉ុន្តែ Jane Dipika Garrett នៅតែសម្តែងដោយស្មារតីពោរពេញដោយថាមពល។ នាងគឺជាបវរកញ្ញាប្រទេសនេប៉ាល់ដែលមានទំហំធំដំបូងគេក្នុងប្រវត្តិសាស្ត្រ។

ការសម្តែងប្រកបដោយទំនុកចិត្តរបស់នាង បានទទួលការសរសើរជាច្រើនពីសាធារណជន។ ទស្សនិកជនជាច្រើនបញ្ជាក់ថា Jane Dipika Garrett គឺជាទឹកចិត្តដ៏ល្អសម្រាប់ទស្សនិកជនទាំងសម្រស់ និងនារីដែលមិនមានរូបរាងស្តង់ដារ។

Jane Dipika Garrett មានអាយុ ២២ ឆ្នាំ បច្ចុប្បន្នជាគិលានុបដ្ឋាយិកា។ ក្នុងអំឡុងពេលប្រកួតប្រជែងនៅ Miss Universe Nepal 2023 នាងបាននិយាយថា “ក្នុងនាមជាស្ត្រីដែលមិនស្របតាមស្តង់ដារសម្រស់ជាក់លាក់ ខ្ញុំមកទីនេះដើម្បីតំណាងឲ្យស្ត្រីដែលតស៊ូជាមួយបញ្ហាឡើងទម្ងន់ ប្រយុទ្ធប្រឆាំងនឹងបញ្ហាអ័រម៉ូន។ ខ្ញុំជឿថាមិនមែនមានសម្រស់ស្ដង់ដារតែមួយនោះទេ ប៉ុន្តែគឺថាមនុស្សស្រីគ្រប់រូបស្អាតតាមរបៀបរបស់ខ្លួន”។

ក្រោយពីរាត្រីពាក់កណ្តាលផ្តាច់ព្រ័ត្រ សម្រស់នេប៉ាល់ទទួលបានអ្នកគាំទ្រយ៉ាងច្រើន។ នាងត្រូវបានគេទស្សន៍ទាយថានឹងអាចសម្រេចបានលទ្ធផលខ្ពស់សម្រាប់ប្រទេសក្នុងកម្មវិធីបវរកញ្ញាចក្រវាលឆ្នាំនេះ ដោយសារថាមពល និងភាពជឿជាក់របស់នាង។ ទោះជាយ៉ាងណាក៏ដោយ លទ្ធផលចុងក្រោយគឺពឹងផ្អែកភាគច្រើនទៅលើសមត្ថភាពរបស់បេក្ខជនក្នុងការយកឈ្នះលើចៅក្រមនៅក្នុងផ្នែកសម្ភាសន៍បិទទ្វារ។

សូមបញ្ជាក់ដែរថា ការប្រកួតផ្តាច់ព្រ័ត្របវរកញ្ញាចក្រវាលឆ្នាំ ២០២៣ នឹងប្រព្រឹត្តទៅនៅព្រឹកថ្ងៃទី ១៩ ខែវិច្ឆិកា ទម្រង់នៃឆ្នាំនេះនឹងផ្លាស់ប្តូរបើប្រៀបធៀបទៅនឹងរដូវកាលមុន។ បេក្ខនារីនឹងជាប់ឈ្មោះពី Top 20, Top 10, Top 5 និង Top ៣ រៀងៗខ្លួនដូចដែលបានរៀបចំដោយកម្មវិធី៕