ជីវិតកម្សាន្ដ

តារាជើងចាស់ គង់ ប៊ុនសុន ធ្លាក់ខ្លួនឈឺ ស្របពេលជីវិតជួបការលំបាកខ្លាំង

បានផុស

១០ ខែ មុន

នៅ

ថ្ងៃអាទិត្យ ១៩ វិច្ឆិកា ២០២៣

ដោយ

អ្នកគាំទ្រមានការចាប់អារម្មណ៍បន្ទាប់ពីតារាសម្តែងជើងចាស់អ្នកស្រី គង់ ប៊ុនសុន បានធ្លាក់ខ្លួនឈឺដេកដួលនៅលើកន្ទេលក្នុងបន្ទប់ជួលតែម្នាក់ឯងគួរឲ្យអាណិត និងសង្វេគបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតតារាភាពយន្តជើងចាស់អ្នកស្រី គង់ ប៊ុនសុន បច្ចុប្បន្នជីវិតពេលនេះកាន់តែជួបការលំបាកខ្លាំង ខណៈរបរលក់នំនៅតាមចិញ្ចើមផ្លូវមិនសូវលក់ដាច់ ពោល រកបានព្រឹកខ្វះល្ងាច។ យ៉ាងណាមិញតារាជើងចាស់រូបនេះ នៅតែប្រឹងខំត្រដរលក់នំ ដើម្បីចិញ្ចឹមជីវិត ទោះហាលក្តៅខ្យល់ភ្លៀង….។

បើតាមការបញ្ជាក់របស់តារាសម្តែងជើងចាស់អ្នកស្រី គង់ ប៊ុនសុន បានឲ្យដឹងដូច្នេះថា «ខ្ញុំឈឺចុកទ្រូងខ្លាំង ឈឺក្រោមក្លៀកខាងស្តាំ ហើមជើងខាងឆ្វេង ជូនពរខ្លួនឯងឆាប់ជា»។ ក្នុងនោះ អ្នកស្រី គង់ ប៊ុនសុន បានអំពាវនាវដែរថា «ខ្ញុំលក់នំមួយថ្ងៃសម្រាប់មួយថ្ងៃ បើខ្ញុំឈឺអ៊ីចឹងបានអ្វីហូប សូមបងប្អូនមេត្តាជួយឧបត្ថម្ភខ្ញុំផង»។

ជាការកត់សម្គាល់ តារាសម្តែង គង់ ប៊ុនសុន ត្រូវបានអ្នកធ្វើដំណើរប្រទះឃើញអង្គុយលក់នំហាលខ្យល់ភ្លៀងរងាញ័រខ្លួន ដើម្បីរកប្រាក់ចិញ្ចឹមជីវិត ព្រោះរាល់ថ្ងៃគាត់មានវ័យកាន់តែចាស់ទៅហើយ។

អ្នកស្រី គង់ ប៊ុនសុន ជាសិល្បការិនីម្នាក់ ក្នុងចំណោមអ្នកសិល្បៈវ័យជរាមួយចំនួនទៀតដែលកំពុងមានជីវភាពខ្វះខាត និងមានជំងឺប្រចាំកាយ។ ប៉ុន្តែអ្វីដែលអភ័ព្វជាងគេទៀតនោះ ពុំមានកូនចៅមានដៃរឹងស្មាមាំជួយជ្រោមជ្រែងនោះទេ ដោយគាត់ត្រូវដើររាល់ថ្ងៃដើម្បីលក់នំតាមផ្លូវ ឬ បាំងឆត្រអង្គុយលក់នំពេលមេឃកំពុងរលឹមជាដើម៕

អត្ថបទ ៖ ចាន់រ៉ា