ជីវិតកម្សាន្ដ

ប៉ូគឹមថេង សុតធីតា រម្លឹកអនុស្សាវរីយ៍ ២ឆ្នាំ តំណាងកម្ពុជាលើឆាកអន្តរជាតិដោយក្តីមោទនភាព

បានផុស

២ years មុន

នៅ

ថ្ងៃព្រហស្បតិ៍ ៧ ធ្នូ ២០២៣

ដោយ

បវរកញ្ញាកម្ពុជា ប៉ូគឹមថេង សុតធីតា ដែលជាម្ចាស់ជ័យលាភីគ្រងមកុដ Miss Grand Cambodia 2021បានធ្វើឲ្យមហាជន និងអ្នកគាំទ្របានសម្ដែងក្តីរំភើបជាថ្មី ខណៈតារាស្រីរូបនេះបានរម្លឹកនូវអនុស្សាវរីយ៍ចងចាំមិនភ្លេចគ្រាទទួលបានឱកាសតំណាងកម្ពុជាលើឆាកអន្តរជាតិកាលពីអំឡុង ២ឆ្នាំមុន។

បើតាមការកត់សម្គាល់ឃើញថា Miss Grand Cambodia 2021 រូបនេះក្រោយពីសាងកេរ្តិ៍ឈ្មោះល្បីក្នុងវិស័យបវរកញ្ញាស្រីស្អាត ប៉ូគឹមថេង សុតធីតា គឺមានឱកាសច្រើនដោយនាងតែងតែលេចវត្តមាននៅតាមបណ្តាកម្មវិធីតូច ធំនានា ជាបន្តបន្ទាប់។ មិនប៉ុណ្ណោះបើយើងសង្កេតមើលពីរូបសម្រស់របស់នាងវិញនៅតែស្រស់ស្អាតសម្រាប់អ្នកគាំទ្រ ពិសេសមិត្តៗយុវវ័យតែម្តង។

រម្លឹកពីអនុស្សាវរីយ៍តំណាងកម្ពុជាលើឆាកអន្តរជាតិកញ្ញា សុតធីតា បានបង្ហាញក្តីរំភើបថា “ថ្ងៃនេះគឺគម្រប់ខួប ២ ឆ្នាំនៃការវិលត្រលប់មកពីប្រកួតលើឆាកអន្តរជាតិវិញ អរគុណប្រជាជនកម្ពុជាសម្រាប់ការស្រលាញ់ ការយកចិត្តទុកដាក់ ផ្តល់តម្លៃ និងការគោរពមកកាន់រូបនាងខ្ញុំ“។

ស្រីស្អាត ប៉ូគឹមថេង សុតធីតា បានបញ្ជាក់ដែរថា «បើគិតពេលវេលានៃការថយក្រោយនៃរយៈពេល ២ឆ្នាំមុនវិញ នាងខ្ញុំពិតជាសប្បាយរីករាយជាខ្លាំង និងមានមោទនភាពជាទីបំផុតដែលមានឱកាសតំណាងឲ្យកម្ពុជាលើឆាកអន្តរជាតិ។ បងប្អូនប្រជាជនកម្ពុជា ជាបេះដូងនៃនាងខ្ញុំ សូមទទួលការគោរពពីនាងខ្ញុំ ប៉ូគឹមថេង សុតធីតា»។

ជាការពិតម្ចាស់ជ័យលាភីគ្រងមកុដMiss Grand Cambodia 2021កញ្ញា ប៉ូគឹមថេង សុតធីតា កន្លងមកត្រូវបានគេកត់សម្គាល់ថា នាងតែងតែទទួលបានការគាំទ្រព្រមទាំងការលើកសរសើរពីមហាជន ពោលគឺចាប់តាំងពីនាងបានជាប់ជាម្ចាស់មកុដ MGC 2021 និងក្លាយជាតំណាងឲ្យកម្ពុជាទៅចូលរួមប្រកួតដណ្ដើមមកុដលើឆាកអន្តរជាតិនាពេលកន្លងមក៕

អត្ថបទ៖ ចាន់រ៉ា