ជីវិតកម្សាន្ដ

សិល្បករ-សិល្បការិនី អបអរសាទរ និងគាំទ្រយ៉ាងពេញទំហឹងគម្រោង «ព្រែកជីកហ្វូណនតេជោ»

បានផុស

២ years មុន

នៅ

ថ្ងៃចន្ទ ៥ សីហា ២០២៤

ដោយ

ប្រធានសមាគមសិល្បករខ្មែរដែលមានលោកជំទាវអ្នកឧកញ៉ា ម៉ៅ ចំណាន នៅព្រឹកថ្ងៃទី០៥ ខែសីហា ឆ្នាំ២០២៤ នេះ បានដឹកនាំក្រុមការងារ និងសិល្បករ-សិល្បការិនី ដែលជាសមាជិកសមាជិកា នៃសមាគមសិល្បករខ្មែរទៅចូលរួមអបអរសាទរពិធីបើកការដ្ឋានសាងសង់ជាផ្លូវការនូវគម្រោង «ព្រែកជីក ហ្វូណនតេជោ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ ថ្នាក់ដឹកនាំរួមទាំងក្រុមការងារ និងសិល្បករ-សិល្បការិនី ជាសមាជិកនៃសមាគមសិល្បករខ្មែរបានប្រកាសគាំទ្រយ៉ាងពេញទំហឹងចំពោះគម្រោង «ព្រែកជីក ហ្វូណនតេជោ» ។ នេះជាមហាព្រឹត្តិការណ៍ជាប្រវត្តិសាស្ត្ររបស់ប្រទេសកម្ពុជានៃការបើកការដ្ឋាន«ព្រែកជីក ហ្វូណនតេជោ»ប្រកបដោយមោទនភាពបំផុតសម្រាប់កូនខ្មែរគ្រប់រូប។

សមាគមសិល្បករខ្មែរបានបញ្ជាក់ថា សមិទ្ធផលជាប្រវត្តិសាស្ត្ររបស់កម្ពុជាក្រោមគំនិតផ្តួចផ្តើមប្រកបដោយគតិបណ្ឌិត និងចក្ខុវិស័យវែងឆ្ងាយរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា ហើយបន្តអនុវត្តដោយរាជរដ្ឋាភិបាលកម្ពុជានីតិកាលទី៧ ក្រោមការដឹកនាំប្រកបដោយភាពស្វាហាប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ពិតជានាំមកនូវឧត្តមប្រយោជន៍សេដ្ឋកិច្ច និងសង្គមជាតិយ៉ាងពិតប្រាកដតាមរយៈការផ្តល់អត្ថប្រយោជន៍ដ៏មហាសាលសម្រាប់កម្ពុជាជាអាទិ៍៖

-ភាពជឿនលឿនផ្នែកសេដ្ឋកិច្ច និងជំរុញពាណិជ្ជកម្ម ដោយផ្តល់នូវភាពងាយស្រួល និងតម្លៃសមរម្យបន្ថែមទៀតទៅកាន់ទីផ្សារទាំងក្នុងស្រុក និងក្រៅស្រុកទាក់ទាញអ្នកវិនិយោគ និងជំរុញការពង្រីកសេដ្ឋកិច្ច។

-កំណើនហេដ្ឋារចនាសម្ព័ន្ធ ធ្វើឲ្យប្រសើរឡើងនូវប្រព័ន្ធដឹកជញ្ជូនទាំងមូល ជួយសម្រួលដល់ការចូលទៅកាន់តំបន់ដាច់ស្រយាលបានប្រសើរជាងមុន ជំរុញសមាហរណកម្មក្នុងតំបន់ និងកំណើនសេដ្ឋកិច្ច។

-និរន្តរភាពបរិស្ថាន កាត់បន្ថយទឹកជំនន់ និងការអភិរក្សទឹកដោយការគ្រប់គ្រងធនធានទឹកប្រកបដោយប្រសិទ្ធភាព និងការផ្លាស់ប្តូរលំហូរទឹក។ ជួយលើកកម្ពស់អេកូទេសចរណ៍ និងការពារសម្រស់ធម្មជាតិនៃផ្លូវទឹករបស់កម្ពុជាផងដែរ។

-ផលិតភាពកសិកម្ម អាចឲ្យប្រព័ន្ធធារាសាស្រ្តមានភាពល្អប្រសើរ ធានាបាននូវការផ្គត់ផ្គង់ទឹកសម្រាប់តំបន់កសិកម្មជុំវិញ ដែលបាននាំទៅដល់ការពង្រឹងសន្តិសុខស្បៀងជាមួយនឹងការដាំដុះអាហារសំខាន់ៗដូចជាអង្ករជាដើម។

-ការគ្រប់គ្រងទឹកក្នុងមូលដ្ឋាន ជួយគ្រប់គ្រងកម្រិតទឹក និងទប់ស្កាត់ការជន់លិចនៅក្នុងទីប្រជុំជនក្បែរនោះក្នុងរដូវវស្សាគឺជាអត្ថប្រយោជន៍ដ៏សំខាន់។

-អេកូទេសចរណ៍ និងការអភិវឌ្ឍន៍ប្រកបដោយនិរន្តរភាពផ្តល់ឱកាសសម្រាប់ទេសចរណ៍ធម្មជាតិ ទាក់ទាញអ្នកស្រាវជ្រាវ និងអ្នកចូលចិត្តធម្មជាតិរួមចំណែកដល់ការយល់ដឹងអំពីបរិស្ថាន និងផ្តល់ប្រាក់ចំណូលដល់សហគមន៍ក្បែរនោះ។

-វប្បធម៌ និងមោទនភាពជាតិ មិនត្រឹមតែជាហេដ្ឋារចនាសម្ព័ន្ធមួយមុខឡើយ វាតំណាងឲ្យភាពសុខដុមរមនាក្នុងសង្គម ការអភិរក្សវប្បធម៌ និងការបំផុសគំនិតច្នៃប្រឌិតរំលេចនូវកេរ្តិ៍ដំណែលដ៏សំបូរបែបរបស់កម្ពុជា បណ្តុះអារម្មណ៍មោទនភាពជាតិចំពោះប្រជាពលរដ្ឋ និងទាក់ទាញភ្ញៀវទេសចរឲ្យមកទទួលយកបទពិសោធន៍វប្បធម៌ដ៏រស់រវើករបស់ប្រទេសជាតិ។

«ព្រែកជីក ហ្វូណនតេជោ» គឺជាគម្រោងដ៏មានមហិច្ឆតាដែលមានសក្តានុពលយ៉ាងសម្បើមសម្រាប់អនាគតរបស់កម្ពុជាដែលជាសក្ខីភាពបញ្ជាក់យ៉ាងច្បាស់ថា ប្រទេសកម្ពុជាបានត្រៀមខ្លួនរួចជាស្រេចដើម្បីបើកសក្ដានុពលពេញលេញរបស់ខ្លួន និងឈានទៅរកយុគសម័យថ្មីនៃការអភិវឌ្ឍន៍ និងវិបុលភាពសម្រេចបាននូវចក្ខុវិស័យប្រែក្លាយកម្ពុជាជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០។

ក្នុងនាមប្រជាពលរដ្ឋខ្មែរ ពិតជាមានមោទនភាពយ៉ាងក្រៃលែងចំពោះគម្រោង «ព្រែកជីក ហ្វូណនតេជោ» ដែលជាសមិទ្ធផលដ៏អស្ចារ្យសម្រាប់បម្រើដល់សេដ្ឋកិច្ចជាតិ និងជាសមិទ្ធផលដ៏គួរឲ្យស្ញប់ស្ញែងសម្រាប់កូនខ្មែរតជំនាន់៕

អត្ថបទ៖ ចាន់រ៉ា