រូបរាងសង្ហារយ៉ាងនេះដែរ Rain បែរជាត្រូវ អតីតតារា Kpop ម្នាក់ទម្លាយថា លោកមាន ក្លិនមាត់ស្អុយ

កាលពីថ្មីៗនេះ តារាចម្រៀងកូរ៉េដ៏ល្បីល្បាញ Rain ដែលត្រូវបានយើងស្គាល់ថា ជាតួឯកប្រុសឈ្មោះ លីយ៉ុងជេ កំពុងតែទទួលបានការវាយប្រហារតាមរយៈខមិនរបស់អ្នកលេងបណ្ដាញសង្គម ដោយសារតែមានអតីតតារាប្រុស ដ៏ល្បីម្នាក់ បាននិយាយថា Rain មានក្លិនមាត់ស្អុយ។

គួរបញ្ជាក់ផងដែរថា ពាក្យចចាមអារាម ដែលថា ក្លិនមាត់របស់ Rain ស្អុយនេះ មិនមែនទើបតែកើតឡើងថ្មីៗនេះនោះទេ ប៉ុន្ដែវាបានចាប់ផ្ដើមតាំងពីឆ្នាំ២០១៩មកម្ល៉េះ ដោយសារតែអតីតសមាជិកក្រុម Sechs Kies ម្នាក់ឈ្មោះ Kang Sunghoon ដែលលោកបានទម្លាយរឿងរ៉ាវអាក្រក់អំពីតារាកូរ៉េជាច្រើននាក់ ដែលនៅក្នុងនោះ Rain នេះហើយ ដែលជាជនរងគ្រោះខ្លាំងជាងគេ។

មិនតែប៉ុណ្នោះ Sunghoon បាននិយាយពាក្យធ្ងន់ៗថា Rain មានក្លិនមាត់ស្អុយ គេមានកេរ្តិ៍ឈ្មោះល្បីល្បាញក្នុងចំណោមតារាកូរ៉េមែន តែបើអ្នកណាដែលប្រើមេក្រូបន្ដពីលោកហើយ ប្រាកដជាសន្លប់មិនខាន។ លើសពីនោះ អតីតសមាជិក Kpop រូបនេះ ថែមទាំងបាននិយាយពាក់ព័ន្ធនឹង Kim Tae Hee ដែលជាភរិយារបស់ Rain ទៀតថា គេពិតជាខកចិត្តនឹងនាងណាស់ ព្រោះមានស្វាមីរូបមិនសង្ហារ ហើយថែមទាំងប្រាប់ឲ្យលែងលះគ្នាទៅ ពួកគេមិនសមគ្នានោះឡើយ។

ក្រឡេកមកបច្ចុប្បន្នវិញ ពាក្យចចាមអារាមនេះ ត្រូវបានងើបមកបន្លាច Rain ម្ដងទៀតយ៉ាងខ្លាំងក្លា តាមរយៈវីដេអូរាំជាមួយនឹងតារាស្រី Amy Flamy1 ដោយអ្នកលេងបណ្ដាញសង្គមនាំគ្នាចូលខមិននៅក្នុងវីដេអូនោះដូចៗគ្នា សួរទៅកាន់តារាស្រីដែលរាំជាមួយនោះថា តើ Rain មានក្លិនមាត់ស្អុយមែនឬទេ។

យ៉ាងណាមិញ Amy បានឆ្លើយតបទៅនឹងសំណួរនេះថា តារាប្រុសរូបសង្ហារនេះ មិនត្រឹមតែមានក្លិនក្រអូបនោះទេ នាងតែទាំងចង់លង់នឹងក្លិនរបស់លោកថែមទៀតផង នាងថា Rain គឺជា God of Kpop ដែលវីដេអូរបស់រូបនាងទទួលបានអ្នកទស្សនាដល់ទៅ៦លាននាក់ឯណោះ៕