វេជ្ជបណ្ឌិតឯកទេស ណែនាំអ្នកជំងឺត្រូវលាងឈាម ដាច់ខាត កុំទទួលទានអាហារមានជាតិប៉ូតាស្យូម

ចំពោះអ្នកជំងឺដែលត្រូវលាងឈាម គឺតម្រូវឲ្យតមទទួលទានប្រៃ និងប្រយុងប្រយ័ត្នខ្ពស់ ចំពោះអាហារដែលមានសារជាតិប៉ូតាស្យូម ដែលសារជាតិទាំងនេះ ភាគច្រើនគឺសម្បូរនៅក្នុងបន្លែផ្លែឈើ ពិសេស ចេក និងទឹកដូង ព្រោះបើកាលណា អ្នកជំងឺទទួលទានសារជាតិបូតាស្យូមនេះច្រើន នឹងបង្កឲ្យគ្រោះថ្នាក់។ នេះបើតាមការបញ្ជាក់របស់លោកវេជ្ជបណ្ឌិត នីវ រត្នវីរៈ ឯកទេសផ្នែកតម្រងនោម និងលាងឈាម បម្រើការនៅ​មន្ទីរពេទ្យកាល់ម៉ែត ក្នុងបទសម្ភាសជាមួយកម្ពុជាថ្មីកាលពីពេលកន្លងទៅ។

បើតាមវេជ្ជបណ្ឌិតឯកទេសផ្នែកតម្រងនោម និងលាងឈាមរូបនេះ បានឱ្យដឹងដែរថា ការលាងឈាម មិនមែនជាដំណាក់កាលចុងក្រោយនៃជីវិតយើងទេ វាគ្រាន់តែជាការផ្តល់ថ្នាំថ្មីមួយទៀត សម្រាប់បញ្ចុះជាតិពុលសម្រាប់សម្អាតឈាម ដើម្បីស្តារសុខភាពអ្នកជំងឺមកវិញប៉ុណ្ណោះ។ ហេតុនេះ គប្បីកុំគេចវេសពីការលាងឈាម ព្រោះបើមិនទទួលការព្យាបាលនេះទេ នឹងធ្វើឲ្យស្ថានភាពសុខភាពកាន់តែគ្រោះថ្នាក់។

លោកវេជ្ជបណ្ឌិត ពន្យល់ដែរថា “ការលាងឈាម” គឺបែកចែកជា ២ករណី ដោយករណីទី១ អនុវត្តការព្យាបាលនេះ ទៅលើអ្នកដែលមានបញ្ហាតម្រងនោមរុំារ៉ៃ ជំងឺទឹកនោមប្រៃ ជំងឺទឹកនោមផ្អែម ឬលើសសម្ពាធឈាម​ជាដើម ​ដោយសារតែតម្រងនោមរបស់អ្នកជំងឺទាំងនេះខ្សោយខ្លាំង ឬខូច ជាហេតុតម្រូវឲ្យមានការលាងឈាមជាប្រចាំ និងទៀតទាត់។

ដោយឡែក ចំពោះករណីទី២វិញ គឺធ្វើឡើងសម្រាប់អ្នកជំងឺដែលមានស្ថានភាពសង្គ្រោះបន្ទាន់។ វេជ្ជបណ្ឌិតឯកទេស រូបនេះ ពន្យល់ថា ក្នុងស្ថានភាពដែលអ្នកជំងឺកំពុងសង្គ្រោះបន្ទាន់ អាចនឹងកើតមានបញ្ហាគាំង ឬផ្អាកដំណើរការ តម្រងនោម​មួយរយៈ។ ហេតុនេះ ការជួយដោយវិធីលាងឈាមនេះ នឹងធ្វើឡើងត្រឹមតែក្នុងស្ថានភាពខ្លីមួយប៉ុណ្ណោះ រហូតដល់ស្ថានភាពតម្រងនោមអ្នកជំងឺត្រឡប់មកជាប្រក្រតីវិញ។

តាមការគូសបញ្ជាក់ ជាទូទៅ អ្នកជំងឺដែលត្រូវព្យាបាលដល់ដំណាក់កាលនេះ បើតាមបច្ចេកទេស គឺត្រូវលាងឈាម ២-៣ដង​ ក្នុង១សប្តាហ៍ ជាទៀងទាត់ ហើយចំពោះការលាងឈាម ក្នុង១ដង គឺត្រូវប្រើពេល ៤ម៉ោង។ តួយ៉ាងអ្នកដែលមានបញ្ហាខ្សោយតម្រងនោមធ្ងន់ធ្ងរ ក៏ត្រូវប្រុងប្រយ័ត្នខ្ពស់ចំពោះអាហារដែលសម្បូរដោយជាតិប៉ូតាស្យូមដែរ ព្រោះបើកើនឡើងកម្រិតប៉ូតាស្យូមក្នុងឈាម​​ច្រើន នឹងអាចឈានដល់ការលាងឈាមជាប្រចាំ ហើយប្រឈមគ្រោះថ្នាក់ដល់អាយុជីវិត៕