ជីវិតកម្សាន្ដ

អាចារ្យធំ រៀបរាប់ទាំងអួលដើមក ក្រោយមរណភាពតារា Rapper RuthKo

បានផុស

២ years មុន

នៅ

ថ្ងៃចន្ទ ៦ មករា ២០២៥

ដោយ

តារាចម្រៀងរ៉េប លោកអាចារ្យធំ បង្ហាញអារម្មណ៍សោកស្ដាយ និងរៀបរាប់ទាំងអួលដើមក ក្រោយ លោក ដាវិឌ ឬទ្ធីរុទ្រ ឬ RuthKo តារា Rapper ល្បីឈ្មោះម្នាក់ បានជួបគ្រោះថ្នាក់ចរាចរណ៍ស្លាប់បាត់បង់ជីវិត កាលពីវេលាម៉ោង ០១ យប់រំលងអធ្រាត្រ ឈានចូលថ្ងៃទី ០៦ មករា តាមបណ្ដោយផ្លូវ ៦០ ម៉ែត្រ សង្កាត់ចាក់អង្រែក្រោម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី ០៦ ខែមករា ឆ្នាំ ២០២៥ នេះ តាមរយៈហ្វេសប៊ុកផ្លូវការរបស់ តារាចម្រៀងរ៉េប លោកអាចារ្យធំ បានសរសេររៀបរាប់ទាំងសោកស្ដាយ និងអួលដើមកយ៉ាងដូច្នេះថា «ម៉ែអើយម៉ែ កូនដឹងថាម៉ែកំពុងមានសម្ពាធផ្លូវចិត្តខ្លាំងណាស់ នៅពេលនេះ ប្អូនទៅចោលយើងហើយម៉ែ! ហេតុអីវាដាច់ចិត្តម្ល៉េះ? វាទុកពួកយើងចោលអ៊ីចឹងម៉ែ? កូនទទួលយកអត់បានទេ!»។

លោកអាចារ្យធំ បន្តថា «គ្រប់រឿងទាំងអស់ ម៉ែ និង បង តែងនៅពីក្រោយប្អូន ចាំជ្រោមជ្រែង ចាំផ្ដល់កម្លាំងចិត្តដល់ប្អូនជានិច្ច ប្អូនដឹងតើ ថា ម៉ែ និង បង តែងតែមានមោទនភាពណាស់ពេលឃើញប្អូនជោគជ័យ តើហេតុអ្វី? ពិតថាយើងមិនមែនបងប្អូនបង្កើត តែជាច្រើនឆ្នាំនេះ ម៉ែប្រៀបដូចអ្នកមានគុណទី ២ របស់បង ម៉ែទុកបងដូចកូនបង្កើត ហើយបងក៏គោរព និងចាត់ទុកម៉ែ និងប្អូន ដូចសាច់ឈាមតែមួយ! តែប្អូនដាច់ចិត្តណាស់ប្អូនអើយ សូមវិញ្ញាណក្ខន្ធប្អូនប្រុសបងបានទៅកាន់សុគតិភពណាប្អូនណា»។

តាមរយៈសំណេរ អាចារ្យធំ នេះ ក៏មានសិល្បករ-សិល្បការិនី និងអ្នកគាំទ្រជាច្រើន បានបង្ហាញការតក់ស្លុត សោកស្ដាយ រន្ធត់ចិត្ត និងចូលរួមរំលែកទុក្ខដ៏ក្រៀមក្រំចំពោះក្រុមគ្រួសាររបស់ លោក ដាវិឌ ឬទ្ធីរុទ្រ ឬ RuthKo តារា Rapper ផងដែរ។

គួររំលឹកថា លោក RuthKo ដែលគេស្គាល់ថាជាតារា Rap ដ៏ល្បីម្នាក់ បានជួបគ្រោះថ្នាក់ចរាចរណ៍ស្លាប់ភ្លាមៗ នៅកន្លែងកើតហេតុ ខណៈជិះម៉ូតូបុកជាមួយរថយន្តម៉ាក LEXUS RX330 ១ គ្រឿង ពាក់ស្លាកលេខ ខេមរភូមិន្ទ 2–4771 បើកបញ្ច្រាសឆ្លងផ្លូវ។

ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង ០១ និង ៤០ នាទីយប់រំលងអធ្រាត្រ ឈានចូលថ្ងៃទី ០៦ ខែមករា ឆ្នាំ ២០២៥ ស្ថិតលើផ្លូវ ៦០ ម៉ែត្រ មុខ បុរី ប៉េង ហួត សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ៕

អត្ថបទ ៖ ពិសី