ជីវិតកម្សាន្ដ

Zendaya និង Tom អាចភ្ជាប់ពាក្យហើយ ក្រោយឃើញចិញ្ចៀនពេជ្រដ៏ធំសម្បើមលើដៃ

បានផុស

៣ ខែ មុន

នៅ

ថ្ងៃពុធ ៨ មករា ២០២៥

ដោយ

សារព័ត៌មានអាមេរិកបានរាយការណ៍កាលពីថ្ងៃច័ន្ទអំពីពាក្យចចាមអារ៉ាមនៃការភ្ជាប់ពាក្យរបស់ Zendaya និង Tom Holland បន្ទាប់ពីនាងបង្ហាញខ្លួននៅក្នុងកម្មវិធី Golden Globe Awards។ តួស្រីក្នុងរឿង Challengers បង្ហាញស្ទាយងាកមុខចេញជាមួយនឹងលើកម្រាមដៃ ខណៈដែលទស្សនិកជនចាប់អារម្មណ៍ចិញ្ចៀនពេជ្រនៅលើដៃឆ្វេងរបស់នាង។

នៅក្នុងកម្មវិធី សម្លៀកបំពាក់របស់ Zendaya ដែលជាឈុតអាវទ្រនាប់សូត្រពីរជាន់របស់យីហោ Louis Vuitton គឺមិនមានអ្វីគួរឲ្យចាប់អារម្មណ៍នោះទេ ប៉ុន្តែវាគឺជាវត្តមានដែលមិននឹកស្មានដល់នៃចិញ្ចៀនដែលទាក់ទាញការចាប់អារម្មណ៍ពីអ្នកគាំទ្រ និងអ្នកសារព័ត៌មានដូចគ្នា។ ចិញ្ចៀនដែលមើលទៅដូចជាពេជ្រ បានផ្ទុះការជជែកគ្នានៅលើបណ្តាញសង្គមយ៉ាងឆាប់រហ័ស ដោយមនុស្សជាច្រើនបានប៉ាន់ស្មានថា Zendaya បានភ្ជាប់ពាក្យជាមួយមិត្តប្រុសរបស់នាងគឺ Tom Holland រួចហើយ។

ក្រៅពីលើចិញ្ចៀន អ្នកគាំទ្រក៏បានកត់សម្គាល់ឃើញស្នាមសាក់តូចមួយនៅលើខ្លួនរបស់ Zendaya ដែលនៅពីក្រោមអាវទ្រនាប់របស់នាង។ ស្នាមសាក់នេះហាក់ដូចជាអក្សរតូច T ដែលមនុស្សជាច្រើនជឿថាជាជាឈ្មោះមិត្តប្រុស។

ទោះបីជាយ៉ាងណា គូស្នេហ៍តារាសម្ដែងក៏មិនទាន់បញ្ជាក់ជាផ្លូវការអំពីការភ្ជាប់ពាក្យរបស់ពួកគេដែរ ការរួមផ្សំនៃចិញ្ចៀនពេជ្រ និងស្នាមសាក់បានធ្វើឲ្យអ្នកគាំទ្រមានភាពច្របូកច្របល់ និងគ្រប់គ្នាមានការងឿងឆ្ងល់ថា តើ Zendaya និង Holland ឈានជើងគ្នាជាផ្លូវការហើយឬនៅ?

គួរបញ្ចាក់ថា គូស្នេហ៍មួយគូនេះ បានណាត់ជួបគ្នាតាំងពីឆ្នាំ ២០២១ ហើយនាំឲ្យទំនាក់ទំនងរបស់ពួកគេទៅកម្រិតបន្ទាប់ក្នុងអំឡុងពេលបុណ្យណូអែលដ៏កក់ក្ដៅជាមួយគ្នា។ ក្រោយមក តារាសម្ដែងប្រុសវ័យ ២៨ ឆ្នាំបានលុតជង្គង់ម្ខាងក្នុងបរិយាកាសស្និទ្ធស្នាលយ៉ាងខ្លាំងនៅផ្ទះគ្រួសាររបស់ Zendaya លើទឹកដីសហរដ្ឋអាមេរិក។ គូស្នេហ៍ដែលបានជួបគ្នាក្នុងឈុតរឿង “Spider-Man: Homecoming” គឺជាគូស្នេហ៍មួយក្នុងចំណោមគូស្នេហ៍ដែលស្រលាញ់បំផុតរបស់ហូលីវូដ ៕