សួស វីហ្សា រង់ចាំសំណងជិត ៦ពាន់ដុល្លារ ពីបុគ្គលិកបំពានទំនុកចិត្ត បន្ទាប់ពីធ្វេីកិច្ចសន្យា

តារាចម្រៀងអ្នកនាង សួស វីហ្សា បានអះអាងថា រវាងខ្លួននិងបុគ្គលិកដែលបំពានទំនុកចិត្ត លួចលុយជិត ៦ពាន់ដុល្លារ គឺបានធ្វើការដោះស្រាយតាមរយ: ការធ្វើកិច្ចសន្យាសងលុយត្រឡប់វិញឱ្យបានគ្រប់ចំនួន។ អ្នកនាងបញ្ជាក់ទៀតថា ពេលនេះ ខ្លួនកំពុងរង់ចាំមើល ថាតើបុគ្គលរូបនោះបំពេញតាមកិច្ចសន្យាឬអត់។

គួររំលឹកថា មួយរយៈពេលមុននេះ តារាចម្រៀង សួស វីសា បានប្រកាសព្រមានចាត់វិធានការតាមផ្លូវច្បាប់ចំពោះនារីម្នាក់ ដែលបានបំពានលើទំនុកចិត្ត ដោយហ៊ានឆ្លៀតឱកាសលួចលុយ និងទូរស័ព្ទហើយគេចខ្លួនទៅបាត់។ ទោះបីយ៉ាងណា ក្រោយការព្រមាន បុគ្គលរូបនោះក៏បានធ្វើកិច្ចសន្យាដើម្បីសងប្រាក់ត្រឡប់មកវិញផងដែរ។

អ្នកនាង សួស វីសា បានប្រាប់ឱ្យដឹងដែរថា បុគ្គលិកដែលបានលួចលុយនាងជិត ៦ពាន់ដុល្លារ បានធ្វេីកិច្ចសន្យាថានឹងសងលុយវិញគ្រប់ចំនួន នាថ្ងៃទី១២ ខែមករា ឆ្នាំ២០២៥ ខាងមុខនេះ និងបញ្ជាក់ទៀតថា “រង់ចាំអ៊ុតមេីលទាំងអស់គ្នា សូម្បីលោកប៉ូលីសក៏កំពុងរង់ចាំដូចគ្នា”។

តារាចម្រៀងមានដើមកំណើតពីទឹកដីខេត្តស្វាយរៀង សួស វីសា បានបញ្ជាក់បន្ថែមថា ចាប់ពីពេលនេះទៅ ខ្លួនលែងមានមនោសញ្ចេតនាជាមួយអ្នកណាផ្តេសផ្តាសទៀតហេីយ មនុស្សណាក្បត់គឺបញ្ជូនឱ្យច្បាប់ជាអ្នកចាត់ការ។ ចំណែកឯអ្នកគាំទ្រ ក៏ចាំមើលដែរ ថាតើអ្នកនាង សួស វីហ្សា នឹងទទួលបានសំណងវិញតាមកិច្ចសន្យា ឬយ៉ាងណា៕ អត្ថបទ៖ ចាន់រ៉ា