ត្រូវនឹងបុណ្យ៧ថ្ងៃ Ruthko ផង ផេកនៅតែចាក់ឡាយកម្មវិធីឃើញវត្តមាននៅរស់រវើក ធ្វើឲ្យអ្នកគាំទ្រមើលទាំងទឹកភ្នែក

កាលពីម្សិលមិញនេះ អ្នកគាំទ្រមានការភ្ញាក់ផ្អើល ដោយផេកផ្លូវការរបស់លោក ​Ruthko បានធ្វើការឡាយកម្មវិធី Rapper Fighter ធម្មតាដូចជាមិនមានអ្វីកើតឡើង ហើយនៅក្នុងនោះ ក៏ឃើញវត្តមានរបស់​តារារ៉េប Ruthko ធ្វើជាគណកម្មការផងដែរប្រៀបដូចជាលោកនៅមានជីវិត។

តួយ៉ាង កម្មវិធីនេះ ត្រូវបានគេថតទុក កាលពីតារាប្រុសរូបនេះ នៅមានជីវិតនៅឡើយ ហើយវាក៏ជាវគ្គចុងក្រោយដែរ ដែលអ្នកគ្រប់គ្នាបានឃើញវត្តមានរបស់ Ruthko នៅលើលោកនេះទៀត។ ទន្ទឹមនឹងនោះ អ្នកគាំទ្របង្ហាញភាពសោកសៅ និង ការឈឺចាប់ក្រៃលែង ចំពោះការឃើញវត្តមានរបស់លោកនៅរស់រវើកបែបនេះ ទាំងដែលនៅក្នុងជីវិតពិត មិនមានវត្តមាន Ruthko ទៀតទេ។

អ្វីដែលធ្វើឲ្យអ្នកគាំទ្រកាន់តែឈឺចាប់ ក្ដុកក្ដួលក្នុងចិត្តទៀតនោះគឺ ថ្ងៃដែលឡាយកម្មវិធីនេះ ក៏ត្រូវនឹងថ្ងៃបុណ្យគម្រប់៧ថ្ងៃនៃការចាកចេញរបស់តារារ៉េបវ័យ២៤ឆ្នាំរូបនេះផងដែរ។ ជាពិសេស អ្នកគាំទ្រខ្លះក៏បានគិតថា វាជារឿងមិនសមគួរចំពោះវិញ្ញាណក្ខន្ធរបស់តារាប្រុសរូបនេះនោះទេ ដែលនៅតែយកផេករបស់មនុស្សដែលស្លាប់ទៅហើយ យកមកធ្វើការឡាយបែបនេះ។

ជាមួយគ្នានោះ គេសង្កេតឃើញថា នៅពេលដែល Ruthko បានបាត់បង់ជីវិតទៅហើយ បែរជាធ្វើឲ្យប្រជាប្រិយភាពកាន់តែល្បីទៅវិញ ផេកក៏មានចំនួនអ្នកចុច Like កើនឡើងជាលំដាប់។ គួរបញ្ជាក់ផងដែរថា លោក Ruthko មានឈ្មោះពិតថា ដាវិឌ ឬទ្ធិរុទ្រ បានទទួលមរណភាពនៅអាយុ២៤ឆ្នាំ កាលពីថ្ងៃទី០៦ ខែមករា ២០២៥ កន្លងទៅនេះ ដោយហេតុការណ៍គ្រោះថ្នាក់ចរាចរណ៍៕

សូមវិញ្ញាណក្ខន្ធរបស់លោក បានទៅកាន់សុគតិភពចុះ

យើងនៅតែចងចាំអ្នកជានិច្ច