ព័ត៌មានអន្ដរជាតិ

អាមេរិកពិចារណាដកហូតទិដ្ឋាការតារារ៉េបអង់គ្លេស ដែលច្រៀងថា «ស្លាប់ទៅ IDF»

បានផុស

១ year មុន

នៅ

ថ្ងៃចន្ទ ៣០ មិថុនា ២០២៥

ដោយ

Chheang

ក្រសួងការបរទេសសហរដ្ឋអាមេរិក កំពុងពិនិត្យមើលការដកហូតទិដ្ឋាការសម្រាប់ក្រុមចម្រៀងរ៉េបអង់គ្លេស Bob Vylan បន្ទាប់ពីការសម្តែងនៅឯទីក្រុង Glastonbury ជាកន្លែងដែលពួកគេបានដឹកនាំការស្រែកច្រៀងថា «ស្លាប់ទៅ ស្លាប់ទៅ IDF (Death, Death to the IDF)» ដោយពាក្យថា IDF នេះសំដៅទៅលើកងកម្លាំងការពារជាតិអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយថ្ងៃទី២៩ខែមិថុនារបស់ The Daily Wire ដែលដកស្រង់ប្រភពពីមន្ត្រីជាន់ខ្ពស់នៃក្រសួងការបរទេសអាមេរិកម្នាក់ ចំណាត់ការនេះកំពុងរៀបចំធ្វើហើយ ខណៈដែលតារាចម្រៀងរ៉េបទាំង២រូបកំពុងត្រៀមសម្រាប់ការប្រគុំតន្ត្រីក្នុងទីក្រុងចំនួន២០លើទឹកដីសហរដ្ឋអាមេរិកនារដូវស្លឹកឈើជ្រុះឆ្នាំនេះ។

ប្រភពដដែល បាននិយាយទៀតថា «ជាសាររំលឹកមួយ នៅក្រោមរដ្ឋបាល (លោក ដូណាល់) ត្រាំ រដ្ឋាភិបាលសហរដ្ឋអាមេរិកនឹងមិនផ្តល់ទិដ្ឋាការដល់ជនបរទេសណាដែលគាំទ្រពួកភេរវករនោះទេ»។

ក្រុម Bob Vylan មានសមាជិកក្រុម២រូប ដូចជា Bobby Vylan និង Bobbie Vylan។ ខណៈកំពុងសម្ដែងនៅកម្មវិធី Glastonbury Music Festival ដែលចាក់ផ្សាយផ្ទាល់លើទូរទស្សន៍ BBC ក្រុមចម្រៀងនេះ បាននាំអ្នកគាំទ្រប្រមាណ២០ម៉ឺននាក់របស់ខ្លួនឲ្យស្រែកច្រៀងថា «ស្លាប់ទៅ ស្លាប់ទៅ IDF» និងច្រៀងថា «ដោះលែង ដោះលែងប៉ាឡេស្ទីន (Free, Free Palestine)»។

ការសម្តែងកាលពីចុងសប្ដាហ៍មុននេះរបស់ក្រុម Bob Vylan ក៏បានទាក់ទាញការរិះគន់ពីអាជ្ញាធរអង់គ្លេសផងដែរ ដោយលោកនាយករដ្ឋមន្ត្រី Keir Starmer បានថ្កោលទោសវាថាជា«ភាសាដែលបង្កប់នូវការស្អប់ខ្ពើម»។ ចំណែកឯអ្នករៀបចំកម្មវិធីប្រគំតន្ត្រី និងប៉ុស្ដិ៍ទូរទស្សន៍ BBC ក៏បានចេញការសុំទោស និងការព្រមានទាក់ទងនឹងការយកវីដេអូនេះទៅចាក់ផ្សាយបន្តផងដែរ។

អាជ្ញាធរអង់គ្លេស កំពុងវាយតម្លៃថាតើការច្រៀងរបស់ Bob Vylan បានបំពានច្បាប់ក្នុងតំបន់ ដែលនឹងតម្រូវឲ្យមានការស៊ើបអង្កេតឧក្រិដ្ឋកម្មដែរឬក៏យ៉ាងណា៕

ដោយ៖ ឈាង