ជីវិតកម្សាន្ដ

ធ្លាប់ឈ្មោះគ្នាបែកផ្សែង ពេលនេះមេ MGI និង MU ឱបគ្នាលើឆាក លែងជាគូសត្រូវស្លាប់រស់

បានផុស

១ year មុន

នៅ

ថ្ងៃពុធ ១៩ កុម្ភៈ ២០២៥

ដោយ

លោកណាវ៉ាត់ (Nawat Itsaragrisil) បានសម្រេចទិញសិទ្ធិផ្តាច់មុខបវរកញ្ញាចក្រវាលថៃ ពី Anne Jakrajutatip ដោយបង្ហាញរូបភាពផ្អែមល្ហែម លែងជាគូប្រជែងជំនួញ។ ការប្រកាសនេះ បានធ្វើឡើងក្នុងអំឡុងពេលសន្និសីទសារព័ត៌មាននៃកម្មវិធី Miss Universe Thailand (MUT) 2025 នៅទីក្រុងបាងកក ប្រទេសថៃ កាលពីថ្ងៃទី១៨ ខែកុម្ភៈ ឆ្នាំ២០២៥ ។

នៅលើ X ស្ថាប័ន MUT បានចែករំលែករូបថតរបស់មេ MGI ជាមួយសហម្ចាស់ Miss Universe Organization គឺ Anne Jakrajutatip ឈរក្បែរគ្នា ព្រមទាំងឱបនិងចាប់ដៃគ្នា នៅចំពោះមុខអ្នកសារព័ត៌មានក្នុងសន្និសីទកាសែតកាលពីថ្ងៃនោះ។ ក្នុងនោះក៏មានសំណេរមួយបានសរសេរសារថា «យើងនៅជាមួយគ្នា»។

ដ្បិតតែថា នាពេលកន្លងមក ស្ថាប័ន MGI និង MU តែងតែលេចឮព័ត៌មានមិនល្អ ទាក់ទិននឹងភាពជាដៃគូប្រជែងទើបធ្វើឲ្យទស្សនិកជនជាច្រើនហាក់មិនចង់ជឿនឹងភ្នែកថា ពួកគេអាចវិលមកត្រូវរ៉ូវគ្នាឡើយ។ យ៉ាងណា ដើម្បីសាងទំនុកចិត្តដល់ហ្វេៗដែលគាំទ្រសម្រស់ Anne បានបញ្ជាក់ជាថ្មីនូវទំនុកចិត្តថាអ្វីដែលនឹងកើតឡើងបន្ទាប់គឺជាការពិត។ កាលដែលពួកគេចាប់ដៃគ្នាលើឆាកគឺមិនមែនជារឿងក្លែងក្លាយទេ។ កាលដែលធ្វើបែបនេះ ក៏ដើម្បីជួយស្ថាប័នឲ្យជោគជ័យ ចង់ឲ្យអ្នកគាំទ្រសប្បាយចិត្ត ហើយគោលបំណងធំរបស់មេ MUT គឺចង់ឲ្យមកុដនេះត្រូវប្រគល់ឲ្យប្រទេសថៃយ៉ាងហោចណាស់ម្ដងដែរ។

ទន្ទឹមគ្នានោះដែរ នៅក្នុងការបង្ហោះមួយលើ Instagram កាលពីថ្ងៃច័ន្ទរបស់លោកណាវ៉ាត់ បានបង្ហោះរូបថតខ្លួនឯងជាមួយនឹងឡូហ្គោ Miss Universe ជាផ្ទៃខាងក្រោយរបស់គាត់។ ក្នុងនោះ គាត់បានសរសេរនៅក្នុងចំណងជើងថា “Miss Universe x MGI Org” ។

ដោយឡែក យោងតាមកាសែតថៃ Nation Thailand កាលពីថ្ងៃច័ន្ទ លោកណាវ៉ាត់បានទិញសិទ្ធិធ្វើជាម្ចាស់ផ្ទះ MUT រយៈពេលប្រាំឆ្នាំ ក្នុងតម្លៃ ១៨០ លានបាត។ កម្មវិធីប្រកួតបវរកញ្ញាចក្រវាលឆ្នាំ ២០២៥ នឹងប្រព្រឹត្តទៅនៅថ្ងៃទី ២១ ខែវិច្ឆិកា នៅ Impact Muong Thong Thani ក្នុងទីក្រុងបាងកក ប្រទេសថៃផ្ទាល់តែម្ដង៕