សុវត្ថិឌី ធារីកា កំពុងពពោះកូនដំបូង ក្រោយរួមរស់ជីវិតគូជាង ១ឆ្នាំ

ប្រមាណជាជាង ១ ឆ្នាំនៃចំណងអាពាហ៍ពិពាហ៍ដ៏ល្អូកល្អើន សុវត្ថិឌី ធារីកា បានប្រកាសដំណឹងដែលខ្លួនកំពុងពពោះកូនដំបូង ជាមួយនឹងក្តីរំភើប ខណៈនេះជាបំណងដែលក្រុមគ្រួសារតារាចម្រៀងរូបនេះកំពុងទទឹងរង់ចាំ។

ក្រោយរៀបការក្លាយជាគូស្វាមីភរិយាស្របច្បាប់ និងតាមប្រពៃណី ក្នុងកម្មវិធីមង្គលយ៉ាងអធិកអធមកាលពីដើមឆ្នាំ២០២៤ កន្លងទៅ សុវត្ថិឌី ធារីកា និង ស្វាមី បានសម្រេចបំណងដោយទទួលបានទាយាទស្នងត្រកូល និងបានប្រកាសដំណឹងរំភើបនេះ ដល់អ្នកគាំទ្រខ្លួនបានជ្រាបផងដែរ។

តាមរយៈសំណេរលើគណនីបណ្តាញទំនាក់ទំនងសង្គមផ្ទាល់ខ្លួន សុវត្ថិឌី ធារីកា បានរៀបរាប់ថា “ឆ្នាំនេះពួកយេីងទទួលបានកាដូដែលក្រុមគ្រួសារទាំងមូលរង់ចាំ ហើយក្នុងឱកាសនេះនាងខ្ញុំនិងស្វាមី ចង់ចែករំលែកដំណឹងល្អនេះ ដល់ពុកម៉ែបងប្អូនអោយបានទទួលនូវអារម្មណ៍រំភើបនេះជាមួយគ្នាដែរ”។

គួររំលឹកថា សុវត្ថិឌី ធារីកា និង ស្វាមី បានអាពាហ៍ពិពាហ៍កាលពីខែមករា ដើមឆ្នាំ២០២៤កន្លងទៅ បើគិតមកដល់ពេលនេះ អ្នកទាំងពីរ បានចាប់ដៃគ្នាសាងសុភមង្គលគ្រួសារក្នុងឈ្មោះជាប្តីប្រពន្ឋជាង ១ឆ្នាំហើយ ជាមួយនឹងភាពផ្អែមល្អែមឱ្យគ្នា ធ្វើឱ្យអ្នកគាំទ្រកោតសរសើរផងដែរ៕