ព័ត៌មានអន្ដរជាតិ

ក្នុងមហាសង្គ្រាន្តឆ្នាំថ្មី លោកថាក់ស៊ីន និងកូនស្រីនាយករដ្ឋមន្ត្រី នឹងធ្វើដំណើរទៅស្រុកកំណើតនៅខេត្តឈៀងម៉ៃ

បានផុស

១ year មុន

នៅ

ថ្ងៃសុក្រ ១១ មេសា ២០២៥

ដោយ

នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា (Paethongtarn Shinawatra) នាឱកាសបុណ្យសង្ក្រាន្តឆ្នាំថ្មីខាងមុខនេះ គ្រោងនឹងនាំឪពុកបង្កើត គឺលោក ថាក់ស៊ីន ស៊ីណាវ៉ាត្រា (Thaksin Shinawatra) អតីតនាយករដ្ឋមន្ត្រីទៅសម្រាកលំហែជាលក្ខណៈគ្រួសារនៅស្រុកកំណើតនាខេត្តឈៀងម៉ៃ។ នេះបើយោងតាមការចុះផ្សាយរបស់សារព័ត៌មានថៃ naewna នៅថ្ងៃទី៩ខែមេសា។

លោកថាក់ស៊ីន បណ្តើរកូនស្រីស្បថចូលកាន់តំណែងជានាយករដ្ឋមន្ត្រីកាលពីខែសីហាឆ្នាំ២០២៤។ Khaosod

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ផែថងថាន ស៊ីណាវ៉ាត្រា នាយករដ្ឋមន្ត្រីថៃក្នុងឱកាសថ្ងៃឈប់សម្រាកអំឡុងពេលបុណ្យមហាសង្ក្រាន្តឆ្នាំថ្មីប្រពៃណីជាតិថៃរយៈពេលវែងចាប់ពីថ្ងៃទី១២ដល់ថ្ងៃទី១៦ខែមេសានេះ ក្នុងនាមរដ្ឋាភិបាលគ្រោងនឹងរៀបចំពិធីប្រស់ព្រំទឹកមន្តតាមប្រពៃណីជាតិថៃនៅល្ងាចថ្ងៃទី១២ខែមេសា នៅទីលានប្រជាធិបតេយ្យក្នុងទីក្រុងបាងកក ដើម្បីលើករាសីសុំសេចក្តីសុខចម្រើនក្នុងឱកាស «មហាសង្ក្រាន្តឆ្នាំថ្មីប្រពៃណីជាតិថៃឆ្នាំ២០២៥» ដោយមានការចូលរួមពីបណ្តារដ្ឋមន្ត្រី មន្ត្រីជាន់ខ្ពស់ និងបណ្តាមន្ត្រីការទូតនានាប្រចាំនៅប្រទេសថៃចូលរួមក្នុងពិធីនេះផងដែរ។

បន្ទាប់មកនៅថ្ងៃទី១៣ខែមេសា ជាថ្ងៃចាប់ផ្តើមនៃពិធីបុណ្យមហាសង្ក្រាន្តចូលឆ្នាំថ្មី នាយករដ្ឋមន្ត្រី ផែថងថាន នឹងនាំក្រុមគ្រួសារធ្វើដំណើរទៅកាន់ស្រុកកំណើតនៅក្រុងឈៀងម៉ៃ ហើយនៅរសៀលថ្ងៃដដែល នាយករដ្ឋមន្ត្រី ផែថងថាន នឹងចូលរួមជាអធិបតីក្នុងពិធីបើក «មហាសង្ក្រាន្តខេត្តឈៀងម៉ៃ» ហើយនៅពេលល្ងាចថ្ងៃដដែល នឹងចូលរួមជាអធិបតីក្នុងពិធីបើក «ពិធីបុណ្យអុំទូក-សង្ក្រាន្តឆ្នាំថ្មី២០២៥» នៅមណ្ឌលពាណិជ្ជកម្ម «Maya Lifestyle Shopping Center» ក្រុងឈៀងម៉ៃ ខេត្តឈៀងម៉ៃ។

តាមសារព័ត៌មានថៃ naewna ដដែល បានរាយការណ៍ថា សម្រាប់ដំណើរទៅស្រុកកំណើតនៅក្រុងឈៀងម៉ៃលើកនេះ នាយករដ្ឋមន្ត្រី ផែថងថាន នឹងធ្វើដំណើរព្រមគ្នាជាមួយឪពុករបស់លោកស្រី ពោលគឺលោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីដើម្បីទៅចូលរួមពិធីបុណ្យសង្ក្រាន្តឆ្នាំថ្មីនៅទឹកដីស្រុកកំណើតក្រុងឈៀងម៉ៃ។

ទន្ទឹមគ្នានេះ លោកស្រី ផែថងថាន និងលោក ថាក់ស៊ីន ក៏គ្រោងនឹងយកឱកាសនេះដើម្បីសម្រាកលំហែកាយជួបជុំជាមួយក្រុមគ្រួសារសាច់ញាតិនៅខេត្តឈៀងម៉ៃ និងឆ្លៀតឱកាសធ្វើបុណ្យនិងចូលរួមអបអរសង្ក្រាន្តឆ្នាំថ្មីជាមួយប្រជាពលរដ្ឋអ្នកស្រុកឈៀងម៉ៃផងដែរ ហើយនាយករដ្ឋមន្ត្រី ផែថងថាន នឹងបើកទ្វារភូមិគ្រឹះផ្ទាល់ខ្លួននៅទីនោះនៅថ្ងៃទី១៤ ខែមេសា ដើម្បីទទួលស្វាគមន៍សាច់ញាតិនិងស្រោចទឹកប្រស់ព្រំដើម្បីសុំសេចក្តីសុខចម្រើនពីទេវតាឆ្នាំថ្មី។

បន្ទាប់មកនាយករដ្ឋមន្ត្រី ផែថងថាន នឹងវិលត្រឡប់មកទីក្រុងបាងកកវិញនៅថ្ងៃទី១៥ ខែមេសា ខណៈដែលលោក ថាក់ស៊ីន នឹងវិលត្រឡប់មកវិញនៅថ្ងៃទី១៦ ខែមេសា។

សូមបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិថៃ ត្រូវបានធ្វើឡើងមុន (កម្ពុជា-ឡាវ-មីយ៉ាន់ម៉ា) រយៈពេល១ថ្ងៃជារៀងរាល់ឆ្នាំ៕

ដោយ ភ្នាក់ងារ