កូន​ស្រី​ថាក់ស៊ីន ប្រាប់ថា ឪពុកទំនងឈប់ពីឆាកនយោបាយ ក្រោយចេញពីពន្ធនាគារ

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ ប្រហែល​ជា​នឹងចូលនិវត្តន៍ពីឆាកនយោបាយ បន្ទាប់ពីការដោះលែងរូបលោកពីពន្ធនាគារនាពេលខាងមុខ។ នេះបើយោងតាម​ការ​ផ្សាយ​របស់​បាងកក​ប៉ុស្តិ៍ ដោយ​ដក​ស្រង់​ការលើកឡើងរបស់កូនស្រីលោកថាក់ស៊ីន​គឺអ្នកស្រី ផែថងថាន កាលពីថ្ងៃព្រហស្បតិ៍​ទី​២៦​ខែ​កុម្ភៈឆ្នាំ​២០២៦។

ថ្លែងនៅខាងក្រៅពន្ធនាគារកណ្តាល Klongprem អ្នកស្រី ផែថងថាន ដែលជាអតីតនាយករដ្ឋមន្ត្រីម្នាក់ដែរនោះ បានកត់សម្គាល់ថា បន្ទាប់ពីជាប់ឃុំអស់រយៈពេល៦​ខែ លោកឪពុករបស់អ្នកស្រីមិនទំនង នឹងបន្តសកម្មភាព​ក្នុងឆាកនយោបាយទៀតឡើយ។

មហាសេដ្ឋីវ័យ៧៦​ឆ្នាំ និងជាមេដឹកនាំនៃគណបក្សភឿថៃរូបនេះ បាននិងកំពុងអនុវត្តទោសជាប់ពន្ធនាគាររយៈពេលមួយឆ្នាំ ពីបទរំលោភអំណាច និងអំពើពុករលួយ ចាប់តាំងពីថ្ងៃទី៩​ខែកញ្ញាឆ្នាំមុន។ នាយកដ្ឋានពន្ធនាគារបានបញ្ជាក់នាពេលថ្មីៗនេះថា លោកថាក់ស៊ីន នឹងមានលក្ខណៈសម្បត្តិគ្រប់គ្រាន់ក្នុងការដោះលែង​ឲ្យនៅ​​​ក្រៅ​ឃុំនា​ខែឧសភា​ខាង​មុខ បន្ទាប់ពីបានអនុវត្តទោសអស់រយៈពេល២ភាគ៣។

លោកថាក់ស៊ីន​បានត្រឡប់មកប្រទេសថៃវិញក្នុងខែសីហាឆ្នាំ២០២៣ ក្រោយការនិរទេសខ្លួនអស់រយៈពេលជាង១៥ឆ្នាំ ហើយទោស៨​ឆ្នាំរបស់លោកត្រូវបានកាត់បន្ថយមកត្រឹម១ឆ្នាំវិញតាមរយៈព្រះរាជទានលើកលែង​ទោស។ យ៉ាង​ណា​មិញ តុលាការកំពូលបានសម្រេចកាលពីថ្ងៃទី៩ខែកញ្ញា​ឆ្នាំ២០២៥​ថា ការស្នាក់នៅមន្ទីរពេទ្យ​អំឡុង​ពេល​ជាប់​ពន្ធនាគារ​កាល​ពី​មុន​របស់​លោក​គឺខុសច្បាប់ ហើយ​លោកត្រូវត្រឡប់មកអនុវត្តទោស​រយៈពេលមួយឆ្នាំពេញឡើងវិញ៕