ព័ត៌មានអន្ដរជាតិ

មេគុកចង់យកលោក ថាក់ស៊ីន ធ្វើជាគ្រូបង្រៀនភាសាអង់គ្លេសសម្រាប់អ្នកទោស

បានផុស

៩ ខែ មុន

នៅ

ថ្ងៃសុក្រ ១០ តុលា ២០២៥

ដោយ

Chheang

មណ្ឌលកែប្រែថៃ កំពុងពិចារណាលើការចាត់តាំងអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រ ឲ្យជួយបង្រៀនភាសាអង់គ្លេសដល់អ្នកទោស ដែលជាផ្នែកមួយនៃកម្មវិធីអប់រំពន្ធនាគារ។ នេះបើយោងតាមការលើកឡើងរបស់លោក Prawut Wongsinin អគ្គនាយកមណ្ឌលកែប្រែ នាថ្ងៃសុក្រទី១០ខែតុលាឆ្នាំ២០២៥។

លោក ថាក់ស៊ីន ស៊ីណាវ៉ាត្រ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅទីស្នាក់ការកណ្តាលនៃមណ្ឌលកែប្រែក្នុងខេត្ត Nonthaburi លោក Prawut បាននិយាយថា គំនិតផ្តួចផ្តើមនេះមានគោលបំណងប្រើប្រាស់ជំនាញរបស់លោក ថាក់ស៊ីន ដើម្បីផ្តល់ផលប្រយោជន៍ដល់អ្នកទោសផ្សេងទៀត។ ទោះជាយ៉ាងណាក៏ដោយ លោកមិនបានបញ្ជាក់ថា គម្រោងនេះអាចនឹងចាប់ផ្ដើមនៅពេលណាឲ្យប្រាកដនោះឡើយ។

លោក Prawut បានបន្ថែមថា សកម្មភាពទាំងអស់ត្រូវតែអនុវត្តតាមយ៉ាងតឹងរ៉ឹងនូវបទប្បញ្ញត្តិពន្ធនាគារ និងនីតិវិធីត្រឹមត្រូវ ដោយសង្កត់ធ្ងន់ថា តួនាទីអប់រំណាមួយសម្រាប់ ថាក់ស៊ីន នឹងត្រូវការការអនុម័តជាផ្លូវការស្របតាមគោលនយោបាយរបស់មណ្ឌលកែប្រែ។

សូមជម្រាបថា កាលពីថ្ងៃទី៩ខែកញ្ញានេះ តុលាការកំពូលរបស់ប្រទេសថៃបានសម្រេចថា ការស្នាក់នៅរយៈពេល៦ខែរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រ នៅក្នុងមន្ទីរពេទ្យឯកជនមួយកាលពីឆ្នាំ២០២៣ មិនអាចរាប់បញ្ចូលក្នុងពន្ធនាគារបានទេ ដោយបញ្ជាឲ្យគាត់ត្រឡប់ទៅពន្ធនាគារវិញ និងអនុវត្តទោសដែលនៅសល់។

មហាសេដ្ឋីវ័យ៧៦ឆ្នាំរូបនេះ បានត្រឡប់មកពីនិរទេសខ្លួនរយៈពេល១៥ឆ្នាំកាលពីឆ្នាំ២០២៣ ដើម្បីប្រឈមមុខនឹងការកាត់ក្ដីអំពើពុករលួយ និងការរំលោភបំពានលើអំណាច។ ដំបូងឡើយ គាត់ត្រូវបានកាត់ទោសឲ្យជាប់ពន្ធនាគារ ៨ឆ្នាំ ដែលក្រោយមកត្រូវបានកាត់បន្ថយមកត្រឹម១ឆ្នាំ ដោយការលើកលែងទោសពីព្រះមហាក្សត្រ។ ប៉ុន្តែជំនួសឲ្យការស្នាក់នៅក្នុងពន្ធនាគារ លោក ថាក់ស៊ីន ត្រូវបានផ្លាស់ទៅមន្ទីរពេទ្យVIPរបស់ប៉ូលិសយ៉ាងឆាប់រហ័ស ជាកន្លែងដែលគាត់ស្នាក់នៅរយៈពេល៦ខែមុនពេលត្រូវបានដោះលែងឲ្យនៅក្រៅឃុំ៕